2 Jaach jin Diosal, asan jaach chach waoc yipoj jin cꞌul. Cꞌam ojabꞌ chin ja chaꞌ eyqꞌueyoj, yet watxꞌ cꞌam chi el jin qꞌuixwil. Cꞌam chi yal jin cꞌul chin tzeele yu ebꞌ chi jowi oc win.

3 Wotaj tol masanil ebꞌ chach yaoc yipoj scꞌul, cꞌam chi el sqꞌuixwil ebꞌ. Jaꞌ ojabꞌ ebꞌ comon cꞌal chi chichon oc scꞌul win yin naꞌbꞌacꞌal, jaꞌ ojabꞌ ebꞌ chi el sqꞌuixwil.

4 Jaach jin Diosal, txꞌox ja bꞌe ey jin; jaꞌ ojabꞌ yin watxꞌ bꞌeybꞌale chin ja wiꞌtoj.

5 Cuy jin cꞌal yin ja kꞌane yin sjichanil, yet watxꞌ chin bꞌeytoj yin swatxꞌil, yutol jin Diosal jaach, jin Colomal jaach. Asan jaach chach waoc yipoj jin cꞌul.

6 Jaach Jehová jin Diosal, naꞌtej ja camcꞌulal cꞌal ja watxꞌcꞌulal, jun jix ja txꞌox wilaꞌ.

7 Jantaj cꞌal jin penail, cꞌam ojabꞌxa cha naꞌtej. Cꞌam ojabꞌxa cha naꞌtej jin penail yet jix jin titoc yin achꞌeal. Chin ja naꞌtej yetoj ja miman camcꞌulal cꞌal ja watxꞌcꞌulal.

8 Jaꞌ Jehová ey scamcꞌulal, jichan toni. Yuxan chi tenchanele ebꞌ penawom yu, catuꞌ chi swaꞌne oc sbꞌeybꞌal ebꞌ.

9 Chi ijbꞌale ebꞌ yeynajil chi yute sbꞌa yin watxꞌ bꞌeybꞌale yu Jehová.

10 Yu scamcꞌulal, yuxan chi yun cꞌal tzet chi yalaꞌ, yuxan chi ijbꞌale ebꞌ chi jijen tzet chi yal ẍejbꞌanil.

11 Jaach jin Diosal, caw miman jin penail. Akꞌ mimancꞌulal win jaxca jix yun ja walon canoj.

12 Jaꞌ mactxequel jijem chi yute sbꞌa ey jaach, cha cuy ebꞌ, caw watxꞌ jun bꞌe bꞌey cha wiꞌtoj ebꞌ.

13 Caw oj yakꞌ tzalabꞌoj scꞌul ebꞌ yetoj ja yaxilal, jaxa yuninal ebꞌ oj majon can oc txꞌotxꞌ txꞌotxꞌ tiꞌ.

14 Jaꞌ ebꞌ ey xiwcꞌulal ey jaach, cha wakꞌ ja watxꞌcꞌulal tet ebꞌ, catuꞌ oj yun cꞌal bꞌey jix ja wakꞌcan ja tiꞌ tet ebꞌ.

15 Jaach jin Diosal, ey cꞌal oc jin naꞌbꞌal ja win, yutol jaach chin ja colel tet tzetyetal ey smey.

16 Ocan cꞌal wetoj jaach jin Diosal, okꞌ ojabꞌ ja cꞌul win; ilaꞌ tol jin txꞌojli, catuꞌ ey jin oc yin bꞌiscꞌulal.

17 Yel xacꞌal miman bꞌiscꞌulal chi jul win; col jin el xol jin somcꞌulal.

18 Il jin eytej xol jin cuscꞌulal, cꞌal xol jin yaꞌilal, catuꞌ cha wakꞌon lawoj jin penail.

19 Ilaꞌ tol caw ecꞌal ebꞌ chi chichon oc scꞌul win, chi yoche ebꞌ chin yakꞌ camoj.

20 Teyne jin, cꞌam ojabꞌ chin ja chaꞌoc yul skꞌabꞌ camich, cꞌam ojabꞌ chi el jin qꞌuixwil, yutol jaꞌ ja win chin col jin bꞌa.

21 Toloj wal chin ja coloꞌ, yutol watxꞌ jin bꞌeybꞌal, cꞌam jin penail. Asanne jaach, ey jaach oc yipoj jin cꞌul.

22 Jaach jin Diosal, colon can el xol masanil cu bꞌiscꞌulal jaon Israel jon tiꞌ.