2 Jix ja wakꞌ jantaj tzet chi yoche scꞌul; yutol jix ja wakꞌ jantaj tzet jix skꞌanaꞌ.

3 Caw miman syaaxilal jix ja wakꞌ tet, catuꞌ jix ja waon atoj jun corona yin sjolom, tol oro xacꞌal eloj.

4 Jix skꞌan skꞌinal ey jaach, jix ja wakꞌon tet.

5 Caw bꞌinabꞌil naj yin yopiso; yutol jix yakꞌ eyqꞌuey jowal yetoj ja colwal, caw bꞌinabꞌil yin yopiso jix ja wakꞌ tet.

6 Caw miman ja watxꞌcꞌulal jix ja wakꞌ tet; yuxan caw chi tzala scꞌul naj ja sattaj.

7 Jaach Jehová jin Diosal, caw miman ja weloc apnoj, jaꞌ ja camcꞌulal eyoc yipoj jin cꞌul jain rey jin tiꞌ, yuxan cꞌam bꞌakꞌin oj jin eyqꞌueyoj.

8 Jaach rey, oj ja wakꞌ eyqꞌuey masanil ebꞌ chi jowi oc ja win, catuꞌ oj ja mitxꞌon ey ebꞌ cꞌam chach ocheni.

9 Jaꞌ yet oj ja txꞌoxon ja bꞌa tet ebꞌ, catuꞌ oj ja qꞌueyon can el ebꞌ, jaxca chi yun stzꞌaꞌtoj junoj tzetyetal yu kꞌakꞌ. Jaꞌ Jehová oj qꞌueyon can el ebꞌ yetoj sjowal scꞌul, jaꞌton kꞌakꞌ kꞌakꞌ oj akꞌon xacꞌal lawoj el ebꞌ.

10 Oj qꞌueycan el masanil yuninal ebꞌ sat txꞌotxꞌ txꞌotxꞌ tiꞌ, yet watxꞌ manxa oj bꞌinale ecꞌ yicꞌaal ebꞌ yet bꞌakꞌin.

11 Caxcꞌal chi yoche scꞌul ebꞌ chach yetne, caxcꞌal chi snaꞌ ebꞌ tzet chi yun ja weyqꞌueyi, man cꞌaltaꞌ oj skeꞌ yu ebꞌ.

12 Jaꞌ yet oj ja waontoj ja julbꞌal yin ebꞌ, tol oj el ebꞌ ey jaach.

13 Jaach Jehová jin Diosal, miman ojabꞌ yeloc apnoj ja bꞌi, yutol chi skeꞌ masanil tzetyetal ja wu. Oj cu bꞌitne ja wipalil, yu kalon cu watxꞌ kꞌane ey jaach.