2 Jaach jin Diosal, chach wawte yet cꞌualil, cꞌam chach takꞌwi ey jin; chach wawte cꞌal pax yet akꞌbꞌalil, cꞌam cꞌal chach takꞌwi ey jin.

3 Yel toni, jaach tiꞌ tol yel Asanxane Jaach Ocoj, yuxan chi bꞌitne ebꞌ wet Israelal tiꞌ ey jaach.

4 Jaꞌ ebꞌ cu mam icham jon, jix jaach yaoc ebꞌ yipoj scꞌul, yuxan jix ja colcan el ebꞌ.

5 Jix yal sbꞌa ebꞌ ey jaach, jix ja colcan el ebꞌ. Ey jaach oc yipoj scꞌul ebꞌ, yuxan ma el sqꞌuixwil ebꞌ.

6 Jaxa jin jain tiꞌ, manxa animaoj jin chi wabꞌe, laan jin jaxca junoj noꞌ yaax jaꞌ. Tzeebꞌetaj jin yu ebꞌ wet animail, catuꞌ intajnebꞌil jin can el yu ebꞌ.

7 Jaꞌ yet chi yilon win ebꞌ, tol chi bꞌuchwa ebꞌ win; chin yetzꞌe ebꞌ, chi syumon sjolom ebꞌ,

8 catuꞌ chi yalon ebꞌ jaxca tiꞌ: Jaꞌ jun winaj tiꞌ, jaꞌ Jehová jix yaoc yipoj scꞌul, yuxan, col-le ojabꞌ el yu tinaniꞌ. Ta chi tzala Dios yetoj, jajle ojabꞌ eloj, ta tol ochebꞌil yu, ẍi ebꞌ.

9 Yel toni, jaach jix jin ja wakꞌ aloj; jix jin ja wakꞌ xew bꞌey xaamscꞌul jin txutx.

10 Yet tax jix jin ali, jix jin oc can yul ja kꞌabꞌ, jatax cꞌal yet ey jin to oc yin jin txutx, jin Diosal jaach xacꞌaltaꞌa.

11 Yu tuꞌ xin, cꞌam ojabꞌ cha bꞌosel ja bꞌa jin cꞌatan; yutol ey jin oc yin mimej syaꞌilal, cꞌam pax mac chi oc wetoj.

12 Tuxa wal jix oc joyan ebꞌ chi jowi oc win, jaxca noꞌ wacax caw jow ey yul yet txꞌotxꞌ Basán, queywal tuꞌ ebꞌ.

13 Chi jorori yul snukꞌ ebꞌ jaxca noꞌ bꞌalam; chi sjaj stiꞌ ebꞌ, catuꞌ chi jul ebꞌ win.

14 Jix el wip, jaxca chi yun smaltoj jaꞌ jaꞌ; tuxa chi spoꞌole sbꞌa jin bꞌajil; tuxa chi ulitoj jin pixan jaxca noꞌ ixcabꞌ.

15 Tuxa chi tajtoj yul jin nukꞌ jaxca junoj tajin txꞌotxꞌ; tuxa chi cancan lakꞌan wakꞌ yin jin pikꞌom; jix jin ja bꞌejcan ey xol pojoj jaxca junoj camom.

16 Ey jun bꞌulan ebꞌ penawom jix oc bꞌulan win jaxca noꞌ txꞌiꞌ; jix jolchatoj jin kꞌabꞌ cꞌal wajan yu ebꞌ.

17 Chi skeꞌ sbꞌischa masanil jin bꞌajil. Tꞌanan cꞌal oc ebꞌ jin cajat win.

18 Jix spoꞌoecꞌ jin pichil ebꞌ yin, jix stulne ecꞌ an jin jojan pichil ebꞌ.

19 Jaxa jaach Jehová jin Diosal, wipomal ja weocoj. Cꞌam ojabꞌ cha wiꞌel ja bꞌa jin cꞌatan. Colwaan wetoj, titan yin eymanil.

20 Col jin cꞌal eloj, cꞌam ojabꞌ chin ja cha tzokꞌle camoj. Cꞌam ojabꞌ chin ja chaꞌ makꞌle cam jaxca chi yun junoj noꞌ txꞌiꞌ.

21 Col jin el yul skꞌabꞌ ebꞌ ánima laan jaxca noꞌ bꞌalam chi ochen chin cami, col jin el tet yucꞌaꞌ ebꞌ jaxca yucꞌaꞌ noꞌ xol-laj teꞌal wacax.

22 Oj wal can el ja kꞌaneal bꞌey chi syambꞌa sbꞌa ebꞌ conobꞌ; oj jaach jin bꞌitne xol ebꞌ, oj walon jaxca tiꞌ:

23 Kalwej watxꞌ kꞌane yin Jehová, mac jex tol ey yeloc apnoj Naj yul je sat. ¡Cu bꞌinanewej sbꞌi Naj, je masanil jex yicꞌaal Jacob; je masanil jex yicꞌaal Israel, ocojonwej yin eyilal tet!

24 Yutol ma bꞌejlecan ebꞌ ey syaꞌilal cꞌal ebꞌ eyoc yin sbꞌiscꞌulal yu Naj; man tucꞌal oj jix yilocoj; ma yewbꞌa el sbꞌa Naj tet ebꞌ. Jaꞌ yet jix yalon sbꞌa ebꞌ tet, jix colwa Naj yetoj ebꞌ.

25 Yuxan oj jaach jin bꞌitne sattaj junoj miman bꞌulan conobꞌ yaman ocoj, cꞌal sattaj ebꞌ chach camcꞌulneni, oj wakꞌ eloc bꞌey chi wakꞌcan jin tiꞌ ey jaach.

26 Jaꞌ ebꞌ mebꞌa oj low ebꞌ sicꞌlebꞌil, catuꞌ oj no scꞌul ebꞌ. Jaꞌ ebꞌ chi oc yin eyilal tet Jehová oj yal watxꞌ kꞌane ebꞌ tet; iquis ojabꞌ ecꞌ spixan ebꞌ.

27 Masanil mimej conobꞌ, cꞌal ebꞌ icꞌaale caan bꞌey slawubꞌ txꞌotxꞌ txꞌotxꞌ tiꞌ, oj snaꞌtej Dios ebꞌ. Oj jul ebꞌ sattaj Naj, catuꞌ oj ey kaan ebꞌ sattaj.

28 Yutol jaꞌ Jehová ey yet masanil opiso, tol jaꞌ Naj eyoc Yaawil yibꞌan masanil nacionlaj bꞌey yul yibꞌankꞌinal tiꞌ.

29 Masanil ebꞌ bꞌeom yul yibꞌankꞌinal tiꞌ oj low ebꞌ, catuꞌ oj oc ebꞌ yin eyilal tet Jehová. Masanil ebꞌ ánima cambꞌeal yeocoj, oj ey kaan ebꞌ sattaj Naj. Cꞌam mactxequel chi skeꞌ scolon el sbꞌa tet camich.

30 Jaꞌ ebꞌ itxiquine yet bꞌakꞌin, oj yiꞌey sbꞌa ebꞌ tet Dios. Oj al-le skꞌaneal Naj Yaaw tet ebꞌ ánima tol to oj aloj cu sattajto tuꞌ.

31 Jaꞌ ebꞌ oj aloj cu sattajto tuꞌ, oj al-le el skꞌaneal swatxꞌcꞌulal, cꞌal jantaj tzet waꞌnebꞌil can yu Dios.