2 Jaach Jehová jin Diosal, jix wal ey jaach: Tol Waawil jaach, jaꞌ masanil swatxꞌilal ey yul jin kꞌabꞌ, jaꞌ ey jaach chi tita.

3 Jaꞌ ebꞌ jijem chi yute sbꞌa xol ebꞌ ja conobꞌ, caw watxꞌ yet ebꞌ. Chi yoche jin cꞌul chin caey ecꞌ xol ebꞌ.

4 Jaach oj ja waoc syaꞌilal ebꞌ chi oc tzajan yintaj comon dios. Man oj waoc jin bꞌa yetoj ebꞌ yet chi yakꞌon ẍiqꞌuil noꞌ xaambꞌal ebꞌ. Man oj wal jin bꞌa tet sdiosal ebꞌ tuꞌ.

5 Jaach Jehová jin Diosal, asan ey jaach chi tit masanil swatxꞌil. Jaach ton cha wakꞌ masanil tzet chi yoche jin cꞌul. Yul ja kꞌabꞌ ey jin kꞌinal.

6 Watxꞌ xacꞌal tzetyetal jix chaꞌlo wu. Manxa jantajoj swatxꞌil jin majul jix ja wakꞌ ey jin.

7 Jaach jin Diosal, chi wal watxꞌ kꞌane ey jaach yutol jaach cha wakꞌ jin naꞌbꞌal, tol cha cuy jin naꞌbꞌal yet akꞌbꞌalil.

8 Naꞌan jaach cꞌal wu. Yutol ey jaach ecꞌ wetoj bꞌey jin watxꞌ kꞌabꞌ, yuxan cꞌam chi somcha el jin naꞌbꞌal.

9 Yu jun tuꞌ, yuxan caw chi tzala jin cꞌul, catuꞌ chin bꞌitni ey jaach yin tzalacꞌulal.

Caxcꞌal oj cam jin mimanil tiꞌ, cꞌam tzet chin naꞌ yutol chach waoc yipoj jin cꞌul,

10 yutol man oj ja bꞌejcan jin pixan bꞌey cambꞌal, tam wal oj ja chaꞌ kꞌaꞌtoj jin mimanil jain tol sicꞌbꞌil jin el ja wu tiꞌ.

11 Jix ja wakꞌ wotajne el sbꞌeal kꞌinale, oj ja wakꞌ tzalabꞌoj jin cꞌul yet ey jin ecꞌ ja wetoj. Oj el leeoj yin jin pixan yet ey jin xa ecꞌ ja wetoj.