2 Jaꞌ ebꞌ chi unen spenail chi smimanbꞌane sbꞌa ebꞌ, catuꞌ chi jowi oc ebꞌ yin ebꞌ yeynajil ánima; yuxan jacꞌal oc ebꞌ oj eyqꞌuey yul yaal jix swaꞌne tuꞌ.

3 Jaꞌ ebꞌ chi unen spenail, chi yiꞌa can sbꞌa ebꞌ yin tzetyetal chi yoche ocoj. Chi tzala scꞌul ebꞌ yin ebꞌ eyoc yin spenail, catuꞌ chi yintajne can el Jehová ebꞌ.

4 Jaꞌ ebꞌ pena sbꞌeybꞌal, cꞌamxa chi snaꞌ niꞌoj ebꞌ ta ey Dios, tol jaxa cꞌal ebꞌ miman yeloc apnoj snaꞌoni. Cꞌam bꞌey txequel yeoc Dios yul sat ebꞌ.

5 Caw pena cꞌal tzet chi yun ebꞌ masanil tiempo, cꞌam chi naꞌcha el yu ebꞌ, ta tol oj ja waoc syaꞌilal yibꞌan ebꞌ. Chi yintajne cꞌal pax el scajat ebꞌ.

6 Chi snaꞌ ebꞌ yul yet jaxca tiꞌ: Cꞌam bꞌakꞌin chi cu eyqꞌueyi, cꞌam bꞌakꞌin chi cu oc yin cuscꞌulal, ẍi xacꞌal ebꞌ.

7 Asanne pena kꞌane chi yal ebꞌ, chi yalon lekꞌtiꞌal kꞌane ebꞌ, chi xibꞌtele cꞌal ebꞌ ánima yu ebꞌ. Yin eymanil chi kꞌanabꞌ ebꞌ yetoj sjowal scꞌul, cꞌal spenail.

8 Chi eltoj ebꞌ smajon bꞌey stiꞌlaj conobꞌ, yin ewantajil chi makꞌle ebꞌ ánima cꞌam spenail yu ebꞌ; ey cꞌal oc sat ebꞌ yin ebꞌ cꞌam chi skeꞌ scolon sbꞌa.

9 Jaxca junoj noꞌ león eyoctoj yul nachꞌen, chi ey pajanoj, chi ecꞌ lininoj, queytuꞌ chi yute sbꞌa ebꞌ. Chi yewbꞌa el sbꞌa catuꞌ chi makꞌle ebꞌ yeynajil ánima yu ebꞌ. Jaꞌ yet chi michꞌcha ey yu ebꞌ, catuꞌ chi yiꞌontoj ebꞌ.

10 Chi ey mocꞌanoj, catuꞌ chi a jucnaoj, jaxca junoj noꞌ león, catuꞌ chi eyqꞌuey ebꞌ tol cꞌam chi skeꞌ scolon sbꞌa yul skꞌabꞌ ebꞌ.

11 Chi snaꞌon ebꞌ chi unen spenail jaxca tiꞌ: Jix too qꞌueycꞌulal yu Dios, ma cu yilaꞌ, txꞌoj mi bꞌey tꞌanantoj, ma cꞌaltaꞌ cu yilaꞌ, ẍi ebꞌ.

12 Jaach Jehová jin Diosal, akꞌ ja wip ja waon oc syaꞌilal ebꞌ chi unen spenail tuꞌ. Cꞌam ojabꞌ chi too qꞌueycꞌulal ebꞌ eyoc yin cuscꞌulal tiꞌ ja wu.

13 ¿Tzet yuxan chach intajnele el yu ebꞌ penawom? Jaꞌ snaꞌon ebꞌ tol man oj ja naꞌoc yin ebꞌ.

14 Caw cha wiloc jantaj spenail chi el yunen ebꞌ, yu jun tuꞌ, yuxan jaach oj ja wakꞌ spajtzebꞌal tet ebꞌ. Jaach oj jaach colwa cꞌal pax tet ebꞌ unin cꞌamxa smam xutx.

15 Makꞌ kꞌatoj skꞌabꞌ ebꞌ chi unen spenail. Akꞌ sowalil yin spenail chi yun ebꞌ tuꞌ. Tzꞌajan ojabꞌ chi yun stoolanen el spenail chi yun ebꞌ.

16 Jaach Jehová, Rey jaach. Jaꞌ ebꞌ txꞌoj conobꞌal oj ja wiꞌel ebꞌ yul yibꞌankꞌinal tiꞌ.

17-18 Jaach Jehová jin Diosal, jaach ton cha wabꞌ xa ebꞌ yeynajil chi yute sbꞌa; jaach ton wal cha wakꞌ yip ebꞌ. Jaach ton wal cha wabꞌ yalon sbꞌa ebꞌ chi etnelei, cꞌal ebꞌ unin cꞌamxa smam xutx. Jaach ton oj ja wil tzet oj yun cantoj ebꞌ penawom tol cambꞌeal yeocoj, yet watxꞌ cꞌamxa chi xibꞌtele ebꞌ ánima yeynajil yu ebꞌ.