2 Jaach Dios, Tol Jaxa Cꞌal Jaach Ocoj. Yetoj wal jin tzalacꞌulal chin bꞌitni ey jaach an. Chi waon el waw yin ipal yu jin bꞌitnen ja bꞌi.

3 Jaꞌ ja sattaj, chi el ebꞌ chi jowi oc win, chi telcꞌotoj ebꞌ, catuꞌ chi cam ebꞌ.

4 Yaaw jaach yin sjichanil. Jix jaach ey chotan bꞌey ja despacho, catuꞌ jix jaach takꞌwi ey jin yu tzet jix jin kꞌan ey jaach.

5 Jix ja wakꞌ jowal yin ebꞌ conobꞌlaj, jix ja qꞌueyon can el ebꞌ chi unen spenail, jix ja joꞌon qꞌuey sbꞌi ebꞌ, yet watxꞌ cꞌamxa bꞌakꞌin chi naꞌletej ebꞌ.

6 Tuxa jix cam ebꞌ chi jowi oc win, jix qꞌueyle el sconobꞌ ebꞌ yin junelne. Jaach jix ja wakꞌ qꞌueyle eloj, cꞌamxa junoj jix cancanoj, yet watxꞌ cꞌamxa bꞌakꞌin chi naꞌletej ebꞌ.

7 Jal jaach Jehová, tol Rey jaach cꞌaltaꞌa, chotan jaach ey bꞌey ja despacho, yet cha naꞌon oc yin ebꞌ ánima.

8 Oj ja naꞌoc yin jun yul yibꞌankꞌinal tiꞌ yin swatxꞌil. Oj ja wakꞌ yaawil yibꞌan masanil conobꞌ yin sjichanil.

9 Jaach Jehová jin Diosal, jaach cha colel ebꞌ chi etnelei, cha wakꞌon yip ebꞌ eyoc yin syaꞌtajilal.

10 Jaach Jehová jin Diosal, jaꞌ ebꞌ otajnen jaach, jaꞌton ebꞌ tuꞌ ey jaach oc yipoj scꞌul, yutol cꞌam bꞌey cha bꞌejcan ebꞌ chi oc yin eyilal ey jaach.

11 Bꞌitnojonwej tet Jehová, Naj Yaaw bꞌey Sión. Kalwej el skꞌaneal tet ebꞌ conobꞌ yu tzet jix swaꞌne Naj.

12 Jaꞌ Jehová chi aon oc syaꞌilal ebꞌ makꞌom cam ánima, man tucꞌal oj chi yabꞌe yet chi yalon sbꞌa ebꞌ eyoc yin syaꞌilal.

13 Jaach Jehová jin Diosal, okꞌ ojabꞌ wal ja cꞌul win an, il jintej yetoj jin cuscꞌulal eyoc win yu ebꞌ cꞌam chin ocheni. Col jin el yul skꞌabꞌ camich.

14 Queyton wal tuꞌ oj yun walon watxꞌ kꞌane ey jaach sattaj ebꞌ ánima bꞌey spuertail conobꞌ Jerusalén. Chin tzalai, yutol jix jin ja colcan eloj.

15 Jaꞌ wanxa txꞌoj conobꞌal man otajnenoj jaach, jix telcꞌotoj ebꞌ bꞌey yul jolan jix swaꞌne. Jix oc bꞌacꞌna wan txꞌan yaal yin yajan ebꞌ, tol jaꞌ ebꞌ jix waꞌnen eyoj.

16 Jaach Jehová caw otajbꞌil jaach yu ebꞌ watxꞌ chi el yuneni. Jaxa ebꞌ chi unen spenail xin, jacꞌal oc ebꞌ chi syaalne sbꞌa.

17 Jaꞌ ebꞌ chi unen spenail, cꞌal ebꞌ chi too qꞌueycꞌulal Dios yu, oj tojcan ebꞌ bꞌey camich.

18 Jaxa ebꞌ mebꞌa man oj toj qꞌueycꞌulal ebꞌ yu Dios; oj jul scꞌual ẍaꞌon spajtzebꞌal ebꞌ jantaj tzetyetal eyoc yipoj scꞌul ebꞌ.

19 Jaach Jehová jin Diosal, txꞌoxel ja wipalil. Cꞌam ojabꞌ chi smimanbꞌane sbꞌa ebꞌ ánima ey jaach. Naꞌoc yin wan conobꞌlaj eyoc ja sattaj, catuꞌ cha wakꞌon spajtzebꞌal tet ebꞌ.

20 Aoc xiwcꞌulalil yin ebꞌ. Akꞌ yotajne el ebꞌ yutol naꞌbꞌa ánima cꞌal ebꞌ.