Jaꞌ Stzejejial Dios, Yetoj Cꞌal Tzet Yeoc Ebꞌ Ánima
Jaꞌ sbꞌit naj David
8
¡Jaach jin Diosal, Jaach jin Reyal!Asanxane ja bꞌi miman yeloc apnoj yul yibꞌankꞌinal tiꞌ, yetoj cꞌal bꞌey satcan, chi al-le watxꞌ kꞌane ja win.
2 Jaꞌ ebꞌ unin, cꞌal ebꞌ chi txutxwi, cha kꞌanbꞌalne ebꞌ yin yalon el ja wipalil, syaꞌiloj cꞌal ebꞌ chi jowi oc ja win, yet watxꞌ chi tzꞌini ey ebꞌ ja cajat, cꞌal ebꞌ chi chichon oc scꞌul ja win.
3 Jaꞌ yet chin atoj tꞌanan bꞌey satcan, chin naꞌoni tol jaach jix ja waꞌne masanil tzettaj yetal, jix ja waꞌne cꞌu, xꞌaaw cꞌal masanil weycan, catuꞌ jix ja wakꞌon can bꞌey chi can junjun.
4 Yu tuꞌ xin, chin naꞌon jaxca tiꞌ: ¿Tzet wal keloc apnoj jaon ánima jon tiꞌ, yuxan chon ja naꞌtej, catuꞌ chi naꞌnon yecꞌ ja cꞌul yu cu watxꞌiloj?
5 Jix jon ja waꞌne, txenxane man laan oj jon ja wetoj, jix ja walon canoj, tol chi cu bꞌina jon, caw miman keloc apnoj ja wu.
6 Jix ja waon oc kopiso yibꞌan masanil tzet jix ja waꞌne, jix ja wakꞌon can masanil tzetyetal tuꞌ yul cu kꞌabꞌ jon.
7 Jaꞌton noꞌ meꞌ, noꞌ wacax, cꞌal masanil noꞌ xol-laj teꞌal noꞌ,
8 cꞌal masanil junjun tujan noꞌ tzꞌiquin chi ecꞌ satcan, yetoj cꞌal junjun tujan noꞌ pescado cꞌal jantaj tzetyetal ey yul jaꞌ mar.
9 Jaach Kaawil, jaach cu Diosal, caw bꞌinabꞌil jaach, caw miman ton ja weloc apnoj sat txꞌotxꞌ txꞌotxꞌ tiꞌ.