Jaꞌ Jehová Juez Jichan Chi Yun Snaꞌon Ocoj
Jaꞌ tzet jix yal yin naj Cus, yicꞌaal naj Benjamín yu naj rey David, yuxan jix sbꞌitne jun bꞌit naj David tet Jehová.
7
Jaach jin Diosal, jaꞌ ja win lalan jin seyon jin colbꞌanil.Col jin cꞌal el yul skꞌabꞌ ebꞌ chin seyon ecꞌoj. Col jin cꞌal eloj,
2 ta cꞌam chin ja colecꞌoj, chim jin skocꞌtzilnetoj ebꞌ jaxca chi yute ẍiꞌbꞌe noꞌ bꞌalam, yutol cꞌam mactxequel chin colon eloj.
3 Jaach jin Diosal, ¿tzet wal yinal jix wetne ebꞌ? ¿tzet wal junoj spenail jix wun yin ebꞌ?
4 ¿Tumi ey bꞌey pena jix wute jin naꞌbꞌal yin ebꞌ jin watxꞌil ánima? ¿Tumi ey bꞌey jix wetne ebꞌ jin cajat?
5 Ta tol jix wetne ebꞌ, yakꞌ ojabꞌ snaꞌbꞌal ebꞌ jin yujten ecꞌoj. Watxꞌ ta chin michꞌcha yu ebꞌ, catuꞌ chin sjutxon ecꞌ ebꞌ sat txꞌotxꞌ. Catuꞌ chi el jin qꞌuixwil yu ebꞌ.
6 Jaach jin Diosal, titan yetoj sjowal ja cꞌul, ocan sattaj ebꞌ chi jowi oc win. Waꞌne wal yeoc yin sjichanil jaxca cha woche. Jaach jin Diosal, ocan cꞌal wetoj.
7 Oc ojabꞌ joyan ebꞌ mimej conobꞌlaj ja win, jaꞌ ojabꞌ bꞌey satcan bꞌey ey ja despacho chach ey chotan yet cha naꞌon oc yin ebꞌ.
8 Jaach jin Diosal, jaach ton oj ja naꞌoc yin junjun ebꞌ mimej conobꞌlaj. Catuꞌ cha naꞌon pax oc win, jatacꞌalaꞌ tzet yili jin bꞌeybꞌal yul ja sat, wotaj tol cꞌam jin penail.
9 Jaach Dios, caw jichan cꞌal chi yun ja naꞌon oc yin ebꞌ ánima, ja wotaj tzet chi snaꞌ ebꞌ, cꞌal tzet ey yin snaꞌbꞌal ebꞌ yin ewantajil. Qꞌuey ojabꞌ can el ebꞌ pena sbꞌeybꞌal, yet watxꞌ cꞌamxa chi yun spenail ebꞌ, catuꞌ cha wakꞌon stecꞌanil ebꞌ watxꞌ sbꞌeybꞌal.
10 Jaach jin Diosal, caw miman ja weloc apnoj, jin Colomal ja weocoj, yutol cha colel ebꞌ watxꞌ snaꞌbꞌal, jaxca wal junoj chꞌen jenan chꞌen bꞌey chi scol sbꞌa ebꞌ akꞌom jowal.
11 Jaꞌ Dios, jun Juez caw jichan chi yun snaꞌon oc yin ebꞌ ánima, yuxan junjun cꞌal cꞌu caw jow Naj yin ebꞌ penawom.
12 Ta cꞌam chi snaꞌ sbꞌa scꞌul ebꞌ, oj snij yespada Naj, catuꞌ watxꞌ xa yeoc sjulbꞌal.
13 Lalanxa yaon oc skꞌakꞌal sjulbꞌal; watxꞌ xa yeoc smitxꞌkꞌabꞌ yet jowal tol chi oc camich yu.
14 Ilwej tzet chi yun snaꞌon ebꞌ penawom, chi snaꞌ spenail ebꞌ yin yet animail, cꞌal yetnen ánima ebꞌ.
15 Caw naat yich jun jolan jix swaꞌne ebꞌ tuꞌ, yet watxꞌ jaꞌ tituꞌ oj toj ebꞌ ánima yalon ebꞌ, jaxa oj yun xin, jacꞌal oc ebꞌ oj tojcan yul jun jolan tuꞌ.
16 Jaꞌ yu spenail chi yun ebꞌ tuꞌ, oj tit can yibꞌan ebꞌ.
17 Jal jin jain tiꞌ an xin, oj wal watxꞌ kꞌane tet Jehová, yutol caw watxꞌ snaꞌbꞌal. Oj wakꞌ jin tiꞌ tet Naj yutol caw miman yeloc apnoj.