2 Chi cam ja wabꞌeni, yet chi walon jin bꞌa ey jaach; yutol jin Reyal jaach, jin Diosal jaach, asanne ey jaach chin txali.

3 Jaach Jehová, yet skꞌinibꞌalil chi a waw ey jaach. Jaꞌ yet skꞌinibꞌalil oj wal jin bꞌa ey jaach, catuꞌ oj wechbꞌaneni tol oj ja pajtze jin txa.

4 Yutol Dios jaach toni, yuxan cꞌam chi tzala ja cꞌul yetoj ebꞌ chi unen spenail, jaꞌ ebꞌ pena sbꞌeybꞌal ma skeꞌ yapni oc ebꞌ scolon sbꞌa ja cꞌatan.

5 Ma skeꞌ yapni oc ebꞌ chi yiꞌa can sbꞌa ja sattaj; cꞌam chi ẍaꞌ ja cꞌul ebꞌ chi unen spenail.

6 Oj ja qꞌueycan el ebꞌ lekꞌtiꞌ, cꞌal ebꞌ chi naꞌon a kꞌane, yetoj cꞌal ebꞌ makꞌom cam ánima.

7 Jal jin jain tiꞌ, yu caw ey ja miman camcꞌulal win, yuxan chi skeꞌ wapni oc yul snail ja kꞌane, yet chin oc eyilal ey jaach.

8 Ijbꞌa jin yin sjichanil, jichlone cꞌal oc jin bꞌeybꞌal, yet watxꞌ cꞌam chin eyqꞌuey jaxca chi yoche ebꞌ jin cajat.

9 Jaꞌ ebꞌ tuꞌ, lekꞌtiꞌ kꞌane cꞌal chi yal ebꞌ, man yeloj tzet chi yal ebꞌ, pena cꞌal tzet chi snaꞌ ebꞌ, caw laan yul snukꞌ ebꞌ jaxca bꞌey jajan smujbꞌanil camom, caw lekꞌtiꞌ kꞌane cꞌal chi yal ebꞌ.

10 Jaach jin Diosal aoc syaꞌilal yibꞌan ebꞌ, cꞌam ojabꞌ chi eloc jaxca tzetyetal chi snaꞌ ebꞌ tuꞌ, yu tuꞌ xin, intajne can el ebꞌ yu spenail chi yun ebꞌ tuꞌ, yutol chi cajtzan oc ebꞌ ja win.

11 Jal masanil ebꞌ chi yaoc scꞌul ja win, akꞌ tzalacꞌulal tet ebꞌ. Bꞌitnoj ojabꞌ ebꞌ ey jaach yin tzalacꞌulal, yutol jaach cha teyne ebꞌ. Ey ojabꞌ tzalacꞌulal yin ebꞌ chach camcꞌulneni.

12 Jaach jin Diosal, akꞌ ja yaxilal yibꞌan ebꞌ watxꞌ chi yute sbꞌa ey jaach, cha colon el ebꞌ yetoj ja camcꞌulal jaxca junoj chꞌen jenan chꞌen bꞌey chi scol sbꞌa ebꞌ soldado.