Jaꞌ Jehová Eyoc Yipoj Cu Cꞌul
Jaꞌ sbꞌit naj David
4
Jaach jin Diosal, asanne jaach chin ja waꞌne oc yin sjichanil,chach takꞌwi ey jin yet chach wawteni. Jaꞌ yet ey jin oc xol syaꞌilal, jaach chin ja coleloj. Okꞌ ojabꞌ wal ja cꞌul win tinaniꞌ; abꞌ tzet chi wal yin jin txa.
2 Jex wet animail, ¿bꞌakꞌin oj je bꞌej je yalon jin kꞌumal? ¿bꞌakꞌin oj je bꞌejcan je kꞌane tol cꞌam niꞌoj yeloc apnoj, tol man yeloj?
3 Otajnewej eloj tol jaꞌ Jehová jix sicꞌon el ebꞌ ánima eyoc snaꞌbꞌal yin, yet watxꞌ chi oc ebꞌ yetoj. Chi takꞌwi Naj ey jin yet chi wawteni.
4 Bꞌilwaanwej yu xiwcꞌulal, cꞌam ojabꞌxa chi oc je penail yet chi tit sjowal je jolom. Jaꞌ yet telan jex ey yet akꞌbꞌalil yet tzꞌinini xacꞌal, che naꞌonwejtej, tzet chi el je yuneni.
5 Akꞌwej je xaambꞌal tet Jehová yin yel, catuꞌ che yaonwej oc je cꞌul yin Naj.
6 Caw ecꞌal ebꞌ chi aloni: ¿Mactxequel chi txꞌoxon swatxꞌilal ey jon? ẍi ebꞌ. Jaach cu Diosal, txꞌox ja watxꞌilal ey jon.
7 Jaach jix ja wakꞌ tzalacꞌulal yin jin pixan, yel xacꞌal miman yeloc apnoj wet yintaj ebꞌ chi tzala scꞌul yet chi yamcha oc miman tiriw cꞌal vino yu ebꞌ.
8 Cꞌam tzet chin naꞌ yet chin ey telanoj, tzalacꞌulal chi tit jin weyan, yutol jaach ey jaach oc wetoj, yuxan cꞌam tzet chin naꞌ.