Jix Qꞌueyle El Ebꞌ Chi Jowi Oc Yin Ebꞌ Israel
9
Jaꞌ yet oxlajonebꞌ cꞌu yoc yet slacawebꞌ xꞌaaw, jaꞌton xꞌaaw Adar, jaꞌton jun cꞌual tuꞌ txequelxa yeoc yet chi yunen el tzet chi yal jun ley albꞌilcan yu naj rey, jaꞌton yet jun cꞌual tuꞌ tol tꞌinan sqꞌueyle el ebꞌ Israel jaxca yalon ebꞌ chi jowi oc yin ebꞌ. Jaxa jix yun xin, ma eloc jaxca tzet chi snaꞌ ebꞌ tuꞌ, yutol jaꞌ ebꞌ jix eyqꞌuey yu ebꞌ Israel. 2 Jaꞌ masanil bꞌey chi yakꞌ yaawil naj rey Asuero, jix syambꞌa oc masanil ebꞌ Israel bꞌey yul-laj conobꞌ bꞌey eyecꞌ ebꞌ tuꞌ, catuꞌ jix oc ian yakꞌon jowal yetoj ebꞌ chi yoche tol chi qꞌueyle el ebꞌ tuꞌ. Cꞌam junoj mactxequel jix stecꞌbꞌa sbꞌa sattaj ebꞌ Israel tuꞌ, yutol jix oc xiwcꞌulal xol masanil ebꞌ ánima tuꞌ. 3 Masanil ebꞌ mimej yaaw eyoc yul-laj mimej conobꞌ, cꞌal ebꞌ tol mimej yeoc yopiso bꞌey chi yakꞌ yaawil naj rey, jix yaoc sbꞌa ebꞌ yetoj ebꞌ Israel, yutol caw chi xiw ebꞌ tet naj Mardoqueo tuꞌ. 4 Yutol caw miman yaaw yeoc naj bꞌey spalacio naj rey tuꞌ. Yutol jix too skꞌumal bꞌey masanil wan mimej conobꞌ, junjun cꞌal cꞌu chi yiꞌ yip yopiso naj. 5 Jix smakꞌon cam wan scajat ebꞌ Israel yetoj chꞌen espada. Jix qꞌueyle el masanil ebꞌ yu ebꞌ Israel tuꞌ, jaxca wal jix yoche scꞌul ebꞌ. 6 Jaꞌ bꞌey conobꞌ Susa jix makꞌle cam 500 ebꞌ winaj yu ebꞌ Israel tuꞌ. 7 Jix makꞌle cꞌal pax cam naj Parsandata, Dalfón, Aspata, 8 Porata, Adalías, Aridata, 9 Parmasta, Arisai, Aridai cꞌal Vaizata, 10 jaꞌton ebꞌ laonwan scꞌaal naj Amam, scꞌaal Hamedata, jun chi jowi oc yin ebꞌ Israel. Cꞌam cꞌal niꞌoj stzettaj yetal ebꞌ jix cam tuꞌ, jix smitxꞌ ebꞌ.11 Jaꞌ yet jun cꞌual tuꞌ, yet jix yabꞌen oc naj rey jantaj wal sbꞌisil ebꞌ ánima jix cam bꞌey conobꞌ Susa bꞌey caan ecꞌ naj tuꞌ, 12 catuꞌ jix yalon naj tet ix reina Ester jaxca tiꞌ:
—Jaꞌ ebꞌ ja wet conobꞌ jix smakꞌ cam 500 ebꞌ winaj yetoj laonwan ebꞌ scꞌaal Amam bꞌey conobꞌ Susa tiꞌ. ¿Jaxca tam wal bꞌey wanojxa conobꞌ bꞌey chi ina wakꞌon yaawil tiꞌ, jantaj xam wal cꞌal tzet tol qꞌueyubꞌtaj yili jix yun ebꞌ? Yuxan al tzet chi yoche ja cꞌul, catuꞌ oj wakꞌon ey jaach, ẍi naj tet ix.
13 Catuꞌ jix takꞌwi ix Ester tet naj jaxca tiꞌ:
—Ta chi ẍaꞌ ja cꞌul jaach rey, chi skeꞌ cha walaꞌ tol quey ojabꞌ tuꞌ chi yun pax ebꞌ wet conobꞌ bꞌey conobꞌ Susa tiꞌ yet yecal, jaxca jix yun ebꞌ tinaniꞌ jatacꞌalaꞌ yalon ja ley; catuꞌ cha walon cꞌal pax oj, tol chi locbꞌale a smimanil ebꞌ laonwan scꞌaal naj Amam yin teꞌ teꞌ, ẍi ix.
14 Jix yalon naj rey tol chi yun jaxca tuꞌ. Jix al-le el jun chejbꞌanile tuꞌ bꞌey masanil yul conobꞌ Susa. Catuꞌ jix locbꞌale a smimanil ebꞌ laonwan scꞌaal naj Amam tuꞌ.
15 Masanil ebꞌ Israel caan bꞌey conobꞌ Susa tuꞌ, jix syambꞌa oc sbꞌa ebꞌ yet 14 yoc jun xꞌaaw chi yij Adar, catuꞌ jix smakꞌon cam junxa 300 winaj ebꞌ. Cꞌam cꞌal niꞌoj stzettaj yetal ebꞌ ánima tuꞌ jix smitxꞌ ebꞌ. 16-17 Jaꞌ masanil ebꞌ Israel caan bꞌey wanxa mimej conobꞌ, jix syambꞌa cꞌal pax oc sbꞌa ebꞌ yet oxlajonebꞌ yoc xꞌaaw tuꞌ, yin steynen sbꞌa ebꞌ, cꞌal yu scolon sbꞌa ebꞌ yul skꞌabꞌ ebꞌ chi jowi oc yin ebꞌ tuꞌ. Jix smakꞌon cam junxa 75,000 scajat ebꞌ, cꞌam cꞌal niꞌoj stzettaj yetal ebꞌ tuꞌ jix smitxꞌ ebꞌ, jaxa yet 14 yoc xꞌaaw tuꞌ xin, jix xew ebꞌ, jix low ebꞌ yin tzalacꞌulal.
18 Yutol jaꞌ ebꞌ Israel caan bꞌey conobꞌ Susa tuꞌ, jix syambꞌa oc sbꞌa ebꞌ yet 13 cꞌal yet 14 yoc xꞌaaw yu scolon sbꞌa ebꞌ, yuxan jaxa yet 15 yoc xꞌaaw tuꞌ xin, jix xew ebꞌ, jix yaon oc kꞌin ebꞌ, catuꞌ jix low ebꞌ yin tzalacꞌulal. 19 Jaxa pax ebꞌ Israel caan bꞌey conobꞌlaj cꞌal bꞌey aldealaj tol cꞌam smuroal eyoc yinlaj, jaꞌ yet 14 yoc xꞌaaw Adar tuꞌ, jix yaon oc kꞌin ebꞌ yin tzalacꞌulal, jix saꞌlen ecꞌ tzettaj yetal ebꞌ tet junjun.
Jaꞌ Jun Kꞌin Purim Sbꞌi
20 Jix ẍejon naj Mardoqueo tol chi tzꞌibꞌele masanil wan tzet jix ecꞌ eltoj tuꞌ, catuꞌ jix yaontoj scartail bꞌey masanil ebꞌ yet Israelal caan bꞌey masanil bꞌey chi ina yakꞌon yaawil naj rey Asuero, tet ebꞌ caan bꞌey scawilal cꞌal tet ebꞌ caan bꞌey naat. 21 Jix yalon cꞌal pax oj tol junjun cꞌal abꞌil yet 14 cꞌal 15 yoc xꞌaaw Adar, sowalil chi naꞌletej jun kꞌin tuꞌ yu ebꞌ. 22 Yutol jaꞌ yet wan cꞌual tuꞌ jix smakꞌ cam wan scajat ebꞌ Israel tuꞌ. Jaꞌ yet jun cꞌual tuꞌ, tꞌinan chi okꞌ ebꞌ cꞌal yel yaw ebꞌ scami, jaxa jix yun xin, tol jix qꞌuexchatoj, yin xa loꞌo cꞌal tzalacꞌulal jix yun can aoj, yuxan jix yaoc kꞌin ebꞌ yet wan cꞌual tuꞌ, chi saꞌlen ecꞌ tzettaj yetal ebꞌ tet junjun, cꞌal yakꞌon scolwal ebꞌ tet ebꞌ mebꞌa. 23 Jaxa ebꞌ Israel xin, jix sbꞌeybꞌalne xacꞌal jun ley ebꞌ jix yal naj Mardoqueo tuꞌ. 24 Yutol jaꞌ naj Amam, naj scajat ebꞌ Israel tol jix sicꞌle wal naj tzet cꞌual chi qꞌueyle el masanil ebꞌ yu naj. 25 Yu cꞌal tol jix apni oc ix Ester kꞌanabꞌ yetoj naj rey tuꞌ, yuxan jix stzꞌibꞌe jun chejbꞌanile naj tol jaꞌ masanil spenail jix snaꞌ naj Amam yin ebꞌ Israel tuꞌ, jaꞌ yibꞌan naj jix toocan masanil, yuxan jix locbꞌale a naj Amam yin jun teꞌ teꞌ, catuꞌ jix locbꞌale pax a masanil ebꞌ scꞌaal naj yetoj. 26 Yu jun tuꞌ, yuxan jaꞌ wan cꞌual tuꞌ chi yij scꞌual Purim. Jaꞌ jun kꞌane tuꞌ chi yal yeloc apnoj wan tzetyetal chi skꞌan ebꞌ yin sicꞌlen wal tzet chi yoche.
Yu jun tuꞌ xin, jaxca tzet jix stzꞌibꞌetoj an carta naj Mardoqueo tuꞌ, cꞌal tzet jix yun ebꞌ, 27 yuxan jix sbꞌeybꞌalne xacꞌal ebꞌ Israel wan tuꞌ, yetoj yicꞌaal yetoj cꞌal masanil ebꞌ chi yaoc sbꞌa yin Israelal yetoj ebꞌ. Sowalil caabꞌ cꞌual chi yaoc jun kꞌin tuꞌ ebꞌ yul junjun abꞌil, jaxca scꞌual jix naꞌle canoj, jatacꞌalaꞌ tzet jix yun stzꞌibꞌelecanoj. 28 Jix can xacꞌal can jun tuꞌ yin junelne, tol jaꞌ masanil yicꞌaal ebꞌ Israel bꞌey yul-laj masanil mimej conobꞌ, cꞌal yul-laj masanil yaliẍ conobꞌ, tol sowalil chi yaoc kꞌin ebꞌ jun chi yij Purim yin wan scꞌual jix txeclo can yeoc. 29 Jal pax ix reina Ester xin, ix scutzꞌin naj Abihail, cꞌal naj Mardoqueo a Israel, jaꞌ yin sbꞌi yopiso ebꞌ tuꞌ jix yakꞌon tzꞌibꞌelecan yuunal jun kꞌin yet Purim, yet chi ale oc yip an bꞌabꞌel juun jix tzꞌibꞌelecan yu ebꞌ tuꞌ. 30 Catuꞌ jix yalon ebꞌ tol chi poꞌole eltoj an bꞌey masanil ebꞌ yet Israelal caan bꞌey 127 mimej conobꞌ bꞌey chi yakꞌ yaawil naj rey Asuero tuꞌ. Jix stzꞌibꞌentoj scawilcꞌule ebꞌ yin an carta tuꞌ. 31 Jix lawi tuꞌ xin, jix al-letoj tol sowalil chi ale oc kꞌin yet Purim yet scꞌual tol txequelxa ye canoj, jaxca jix yun yalon naj Mardoqueo yetoj ix reina Ester. Sowalil chi sjije ebꞌ yetoj cꞌal yicꞌaal ebꞌ, yu snaꞌletej slawubꞌal yet jix yijle nocha sbꞌa ebꞌ cꞌal yu cuscꞌulal. 32 Jaꞌ jun chejbꞌanile jix yal ix Ester tuꞌ, jaꞌton chi alon tzet utbꞌil wal chi yun yoc skꞌinal Purim, jaꞌ jun tuꞌ jix tzꞌibꞌelecan yul jun an juun.