—Ta watxꞌ jin yul ja sat, jaach rey, catuꞌ ta watxꞌ cꞌal yoc tzet chin kꞌan ey jaach cha wabꞌe, ta caw yel ey ja camcꞌulal win, tol cha wakꞌ tzꞌibꞌele junoj ley yet chi akꞌle lawoj tzet chi yal an yuunal jix yatoj Amam scꞌaal Amedata bꞌey masanil yul-laj ja nación tiꞌ, bꞌey chi yalaꞌ tol chi makꞌle cam masanil ebꞌ wet conobꞌ Israel. 6 ¡Caw manxa oj techa wu wilon oc tzetyetal tꞌinan oj tit yibꞌan ebꞌ wet conobꞌ cꞌal yibꞌan masanil ebꞌ wican! Yutol oj cu qꞌueyle el cu masanil jon, ẍi ix tet naj.

7 Jix yalon naj rey Asuero tet ix Ester cꞌal tet naj Mardoqueo jaxca tiꞌ:

—Jaꞌ naj Amam tuꞌ, tuxa jix wakꞌ locbꞌale a naj yin teꞌ, yutol pena tzet jix snaꞌ naj yin ebꞌ je yet conobꞌ tuꞌ, tuxa jix wakꞌ masanil stzetyetal naj ey jaach. 8 Jaꞌ tinaniꞌ tzꞌibꞌewejtoj jaxca tzet chi yoche je cꞌul, yu swatxꞌiloj masanil ebꞌ je yet conobꞌ, catuꞌ chi oc jin bꞌi cꞌal selloal wopiso yin an, yutol jaꞌ junoj an juun bꞌey eyoc jin bꞌi cꞌal jin sello yin, cꞌam chi skeꞌ tenle tzet chi yalaꞌ, ẍi naj rey.

9 Eyman jix awteletej ebꞌ stzꞌibꞌlom naj rey, yet 23 yoc yet yox xꞌaaw, jaꞌton jun xꞌaaw Siván. Masanil tzet jix yal naj Mardoqueo jix tzꞌibꞌeletoj tet masanil ebꞌ Israel cꞌal tet ebꞌ mimej yaaw yul-laj conobꞌ, cꞌal tet ebꞌ syaawil ebꞌ soldado yetoj cꞌal tet masanil ebꞌ yaaw yeoc bꞌey 127 mimej conobꞌ, chi too tacꞌal bꞌey India masantaꞌcꞌal bꞌey Etiopía. Jix tzꞌibꞌeletoj yin stiꞌ cꞌal yin sletra junjun conobꞌ. Jix tzꞌibꞌele cꞌal pax toj yin stiꞌ ebꞌ Israel. 10 Jix oc cꞌal pax sello naj rey Asuero yin an juun tuꞌ, yu xeclo eloj tol jaꞌjun naj chi aloni. Jaꞌ ebꞌ jix too poꞌon el an yuunal jun ley tuꞌ, jix oc ebꞌ yibꞌan noꞌ che jelan sbꞌeyi, jaꞌton noꞌ ẍej naj rey eyecꞌ bꞌey pat ẍe naj, catuꞌ jix too ebꞌ yakꞌon an juun tuꞌ yul-laj conobꞌ. 11 Jaꞌ yin an juun tuꞌ, jatuꞌ jix yaltoj naj rey tol chi skeꞌ scolon sbꞌa ebꞌ Israel yal cꞌal tzet conobꞌal bꞌey caan ecꞌ ebꞌ. Tol chi skeꞌ syambꞌan sbꞌa ebꞌ yu steynen sbꞌa ebꞌ, catuꞌ chi smakꞌon cam ebꞌ ta ey ebꞌ chi yakꞌ jowal yin ebꞌ. Jaxa ebꞌ chi yiꞌon can oc masanil stzettaj yetal chi ecꞌ yu ebꞌ tet scajat ebꞌ, yal cꞌal tzet conobꞌal chi yakꞌ jowal yetoj ebꞌ. Jaꞌ ebꞌ chi yakꞌ jowal yin ebꞌ tuꞌ, asan tol chi cami, cꞌam cꞌal yeloc apnoj ebꞌ ix ix cꞌal ebꞌ unin yul sat ebꞌ. 12 Jaꞌ masanil wan tuꞌ, junne cꞌual chi yun bꞌey masanil bꞌey chi lawi apnoj yakꞌon yaawil naj rey Asuero tuꞌ; jaꞌton yet jun cꞌual tol txequelxa yeoc yet oxlajonebꞌ yoc yet slacawebꞌ xꞌaaw, jaꞌton jun xꞌaaw chi yij Adar. 13 Jaꞌ scopiail an ley tuꞌ, sowalil chi too bꞌey masanil yul-laj mimej conobꞌ, catuꞌ chi al-le el xol masanil ánima tol ley yeoc jun tuꞌ, yet watxꞌ jaꞌ yet jun cꞌual tuꞌ, jaꞌ masanil ebꞌ Israel naꞌan xacꞌal yu ebꞌ yet chi spajtzen sbꞌa ebꞌ ta ey mac chi yakꞌ jowal yin ebꞌ. 14 Yin eymanil jix yun stoo ebꞌ yibꞌan che, jatacꞌalaꞌ jix yun yalon naj rey. Jix al-le cꞌal pax el jun ley tuꞌ bꞌey conobꞌ Susa, jaꞌton bꞌabꞌel conobꞌ yeoc bꞌey chi yakꞌ yaawil naj rey tuꞌ.

15 Jaꞌ yet jix eltej naj Mardoqueo bꞌey yul spalacio tuꞌ, eyoc an yaxin cꞌal an sajin pichile yu jaxca yet ebꞌ rey. Eya jun miman corona oro yin sjolom yetoj jun xotile lino kꞌejweinaj yili eyoc yu. Jaꞌ yet tuꞌ, masanil ebꞌ a conobꞌ Susa jix ya el yaw ebꞌ yu tzalacꞌulal. 16 Yu jun tuꞌ, jaꞌ ebꞌ Israel caw jix el leena jix yil ebꞌ, cꞌamxa chi alcha jantaj jun tzalacꞌulal ey xol ebꞌ, jix iꞌle a can ebꞌ jix yabꞌe. 17 Jaꞌ yet jix apni oc jun ley tuꞌ xol ebꞌ bꞌey masanil yul-laj conobꞌ, jaꞌ masanil ebꞌ Israel caw jix tzala a ebꞌ sicꞌlebꞌil. Jix yaon oc kꞌin ebꞌ, jix oc mimej loꞌo yu ebꞌ. Caw ecꞌal ebꞌ ánima bꞌey wanxa conobꞌ jix yaoc sbꞌa yin Israelal yu xiwcꞌulal ebꞌ tet ebꞌ Israel tuꞌ.