—Kꞌan tzetyetal chi yoche ja cꞌul, catuꞌ oj wakꞌon ey jaach, caxcꞌal mi jaꞌ nanoj tujan jin majul wopiso tiꞌ cha kꞌanaꞌ, ẍi naj tet ix.

3 Jix takꞌwi ix Ester jaxca tiꞌ:

—Jaach rey, ta ey ja camcꞌulal win an xin, ta watxꞌ jin yul ja sat, jaꞌ tzetyetal chi yoche jin cꞌul chin kꞌan ey jaach tol cha wakꞌ mimancꞌulal win yetoj ebꞌ wet conobꞌ an, tol cꞌam ojabꞌ chi cu makꞌle cam jon. 4 Yutol jain tiꞌ yetoj cꞌal ebꞌ wet conobꞌ, xax cu txonle el jon, yet chi cu qꞌueyle el yin junelne jon. Tol oj wal tucꞌal chi cu txonletoj yu koc yin yakꞌomaloj servil yetoj ebꞌ wet conobꞌ tiꞌ, man mi smoo oj tol chi wiꞌecꞌ ja tiempo, jal xin, tol abꞌ oj cu qꞌueyle xacꞌal el yin junelne jon, ẍi ix tet naj.

5 Catuꞌ jix skꞌanlen naj rey Asuero jaxca tiꞌ:

—¿Mactxequel jun chi alon jaxca tuꞌ? ¿Bꞌeytuꞌ eyoc jun mac chi naꞌon a jun kꞌane tol eyxa smey yeoc tuꞌ? ẍi naj.

6 Jix yalon ix Ester jaxca tiꞌ:

—Jaꞌ jun naj tol pena snaꞌbꞌal tuꞌ, jaꞌton naj Amam tiꞌ, ẍi ix.

Jaꞌ yet jix yabꞌen oc naj Amam jun kꞌane tuꞌ, saj xacꞌal yili jix yuntoj sat naj Amam tuꞌ yu xiwcꞌulal sattaj naj rey cꞌal sattaj ix reina Ester tuꞌ. 7 Jix a waan naj rey Asuero yetoj sjowal sjolom, jix eltej bꞌey yul snail bꞌey chi oc loꞌo tuꞌ, jix eltoj bꞌey ey an xumac teꞌ bꞌey stiꞌ spalacio. Jal naj Amam tuꞌ xin, jaꞌ yet jix yiloni tol oj ale oc camich yibꞌan, jix cancan bꞌey yul snail bꞌey chi oc loꞌo tuꞌ, catuꞌ jix oc tean yin ix reina Ester tol chi yakꞌ mimancꞌulal yibꞌan. 8-9 Jix lawi tuꞌ xin, jix meltzo pax octoj naj rey yul na bꞌey chi oc loꞌo tuꞌ, jix yiloni, tol jix sbꞌejey telan sbꞌa naj Amam bꞌey sat xꞌat ix Ester yu skꞌanon mimancꞌulal tuꞌ. Jix yalon naj rey jaxca tiꞌ:

—¿Tumi chi yoche ja cꞌul cha wun mul yin ix reina tiꞌ bꞌey yul jin na tiꞌ? ẍi naj.

Jaꞌ yet jix yalon naj rey wan kꞌane tuꞌ, eyman jix majchele el sat naj Amam tuꞌ yu ebꞌ yakꞌomal servil naj. Jix yalon jun yakꞌomal servil chi yij Harboná tet naj rey jaxca tiꞌ:

—Jaꞌ bꞌey sna naj Amam tiꞌ, ey jun teꞌ teꞌ jix yakꞌ waꞌnele aoj, ey jun txꞌanil steel teꞌ, bꞌey tꞌinan slocbꞌale a naj Mardoqueo tuꞌ yaloni, jaꞌton naj watxꞌ jix yun tzetyetal ey jaach, jaach rey, ẍi ebꞌ.

—Tinaniꞌ xin, jatuꞌ che locbꞌawej a naj Amam yin jun teꞌ teꞌ tuꞌ, ẍi naj rey tet ebꞌ.

10 Yu jun tuꞌ, jaꞌton tituꞌ jix locbꞌale naj Amam yin jun teꞌ teꞌ jix swaꞌne a tuꞌ, tol yet taꞌ naj Mardoqueo jix yun swaꞌnen a yaloni. Queytuꞌ jix yun yecꞌtoj sjowal scꞌul naj rey tuꞌ.