Jix Bꞌinale Naj Mardoqueo
6
Jaꞌ yet jun akꞌbꞌal tuꞌ, caw ma oc sweyan naj rey tuꞌ, yuxan jix yalaꞌ tol chi iꞌletej an juun bꞌey chi yal masanil tzetyetal jix ecꞌtoj bꞌey snación tuꞌ, catuꞌ jix awtele a an sattaj naj. 2 Cꞌuxan cꞌal jix ilcha yul an bꞌey chi yalaꞌ tzet utbꞌil tol jaꞌ naj Mardoqueo jix alon tzetyetal jix snaꞌ naj Bigtán cꞌal Teres, ebꞌ naj eyoc steynemaloj spuertail spalacio naj rey yet jix snaꞌon ebꞌ tzet oj yun yakꞌle cam naj rey Asuero yu ebꞌ, yaloni. 3 Yu jun tuꞌ, yuxan jix skꞌanle naj rey tet ebꞌ eyoc yopiso yu naj tituꞌ:—¿Tzetyetal jix akꞌle tet cꞌal tzet jix utele Mardoqueo yu jun tzet jix yun tuꞌ? ẍi naj. Jix takꞌwi ebꞌ tet naj jaxca tiꞌ:
—Cꞌam cꞌal niꞌoj tzetyetal jix akꞌle tet naj, ẍi ebꞌ.
4 Jix yalon naj rey jaxca tiꞌ:
—¿Mactxequel eyecꞌ bꞌey stiꞌ na tuꞌ? Asiꞌwej je yilaꞌ, ẍi naj.
Jaꞌ yet tuꞌ lalan yapni oc naj Amam bꞌey sattaj eltoj stiꞌ spalacio naj rey tuꞌ, yu jul skꞌanlen tet naj rey, tol chi locbꞌale a naj Mardoqueo yin jun teꞌ teꞌ jix swaꞌne a tuꞌ.
5 Yuxan jix yal ebꞌ yakꞌomal servil naj rey jaxca tiꞌ:
—Jaꞌ naj Amam eyecꞌ bꞌey stiꞌ palacio tiꞌ, ẍi ebꞌ. Jix yalon naj rey tol chi awtele octej bꞌey yul spalacio tuꞌ.
6 Jaxa yoctoj naj Amam tuꞌ xin, jix skꞌanlen naj rey tet jaxca tiꞌ:
—¿Tzetyetal sowalil chi utele junoj winaj tol chi yoche jin cꞌul chi iꞌle a can? ẍi naj.
Catuꞌ jix snaꞌon naj Amam jaxca tiꞌ yin snaꞌbꞌal, yu yiꞌle a can yaloni: ¿Macto wal junojxa oj yiꞌa can naj rey tuꞌ, jain cꞌaltaꞌ an? ẍi naj yin snaꞌbꞌal. 7 Yuxan jix takꞌwi naj jaxca tiꞌ:
—Jaꞌ tzetyetal smoo chi utele jun mactxequel tuꞌ, 8 tol chi iꞌletej junoj an ja pichil cha kꞌan yin ja wopiso tiꞌ, jaach rey, cꞌal noꞌ ja che cha kꞌan cꞌal pax oj. Jaꞌ yin sjolom noꞌ tuꞌ chi oc junoj yelawil jaxca corona, yet chi txeclo eloj tol ja wet noꞌ che tuꞌ, 9 catuꞌ chi akꞌle tet junoj ebꞌ yaaw tol miman yeloc apnoj yin yopiso, chi ale pax oc an ja pichil cha kꞌan yin ja wopiso yin jun mactxequel tuꞌ, catuꞌ chi ale atoj yibꞌan noꞌ che tuꞌ, catuꞌ chi quetzle ecꞌ noꞌ che tuꞌ yul-laj scalleal conobꞌ tiꞌ cꞌal bꞌey txombꞌal, catuꞌ chi yalon naj quetznen oc noꞌ che tuꞌ jaxca tiꞌ: ¡Jaxca wal tiꞌ chi utele junoj winaj tol chi ẍaꞌ scꞌul naj rey yiꞌon a can! ẍi naj Amam.
10 Jix lawi tuꞌ xin, jix yalon naj rey tet naj Amam jaxca tiꞌ:
—Asiꞌ yin eymanil xin, iꞌtoj an jin pichil tuꞌ cꞌal noꞌ jin che jaxca jix yun ja walon tuꞌ, queytuꞌ cha wute naj Mardoqueo, a Israel, naj chotan ey bꞌey stiꞌ spuertail jin palacio tiꞌ. Pilan cꞌal oj ja wun wan tzetyetal jix ja wal tuꞌ, ẍi naj rey tet naj.
11 Yu jun tuꞌ xin, jix yiꞌontoj an pichile cꞌal noꞌ che naj Amam tuꞌ, catuꞌ jix yaon oc an yin naj Mardoqueo tuꞌ. Jix lawi tuꞌ xin, jix squetzon ecꞌ noꞌ che bꞌey yul-laj scalleal conobꞌ tuꞌ cꞌal bꞌey txombꞌal, jix el yaw naj, jix yalon jaxca tiꞌ: ¡Jaxca wal tiꞌ chi yun yiꞌle a can junoj mactxequel chi yoche scꞌul naj rey chi yiꞌa can! ẍi xacꞌal naj.
12 Jix lawi yiꞌle ecꞌ naj Mardoqueo tuꞌ yu naj xin, catuꞌ jix toocan Mardoqueo tuꞌ bꞌey spuertail palacio tuꞌ junelxa, jaxa naj Amam xin, jix paxtoj naj bꞌey sna yin eymanil, cusiltaj xacꞌal scꞌul jix smajchen el sat yu qꞌuixwilal. 13 Jix yalon tet yistil cꞌal tet ebꞌ swatxꞌil ánima yu masanil tzetyetal jix utelei, yuxan jix yal ebꞌ tet jaxca tiꞌ:
—Yutol a Israel jun Mardoqueo tuꞌ, yuxan lalan yiꞌle ecꞌ ja wopiso syaꞌiloj. Man cꞌaltaꞌ oj eyqꞌuey ja wu xin, jaach mi tiꞌ oj jaach eyqꞌuey yu, chi yal tuꞌ, ẍi ebꞌ tet naj.
14 Cꞌam tocꞌal chi lawi skꞌanabꞌ naj tuꞌ, catuꞌ jix apni oc ebꞌ yakꞌomal servil naj rey yin xacꞌal eymanil, yet chi iꞌletoj naj Amam tuꞌ yu ebꞌ bꞌey jun miman loꞌo jix swaꞌne ix Ester.