—¿Tzet chach iꞌon jaach reina Ester? ¿Tzet wal chi yoche ja cꞌul? Ta chi yoche ja cꞌul cha kꞌan nanoj tujan jin majul yet wopiso tiꞌ, chi skeꞌ wakꞌon ey jaach, ẍi naj tet ix. Catuꞌ jix takꞌwi ix Ester jaxca tiꞌ:

4 —Ta chi ẍaꞌ ja cꞌul jaach rey, ey jun miman loꞌo jix wakꞌ waꞌxoj yet chach too low wetoj tinaniꞌ yetoj naj Amam, yu miman je yeloc apnoj yul jin sat, ẍi ix. Jix yalon naj rey jaxca tiꞌ:

5 —Awtewej naj Amam yin eymanil, tol chi cu jije masanil tzet chi yal ix reina Ester, ẍi naj.

Yu jun tuꞌ, yuxan jix too naj rey yetoj naj Amam bꞌey jun miman loꞌo jix swaꞌne ix Ester tuꞌ. 6 Jaꞌ yet lalan yuqꞌuen vino ebꞌ, jix yalon naj rey tet ix jaxca tiꞌ:

—Kꞌan masanil tzet chi yoche ja cꞌul ey jin an, oj wakꞌ ey jaach, caxcꞌal mi cha kꞌan nanoj tujan jin majul yet wopiso tiꞌ, chi cꞌal skeꞌ wakꞌon ey jaach, ẍi naj tet ix.

7 Catuꞌ jix yalon ix Ester jaxca tiꞌ:

—Jaach rey, jaꞌ tzet chi yoche jin cꞌul chi wal ey jaach, jaꞌton tiꞌ: 8 Ta tol ey ja camcꞌulal win an, catuꞌ ta bꞌejan ja cꞌul ja wakꞌon tzet chin kꞌan ey jaach, ẍaꞌ ojabꞌ ja cꞌul tol chach tit pax low junelxa yet yecal yetoj naj Amam tiꞌ, tol oj wakꞌ waꞌnele junojxa loꞌbꞌe, yutol caw miman ja weloc apnoj yul jin sat, jaxa yet yecal tuꞌ, oj walon tzet chi yoche jin cꞌul ey jaach, ẍi ix tet naj rey tuꞌ.

9 Caw jix tzala a naj Amam yet jix eltej bꞌey jix oc jun loꞌo tuꞌ, jaxa pax yet jix il-le oc naj Mardoqueo yu naj, tol chotan ey naj bꞌey stiꞌ spuertail spalacio naj rey tuꞌ, caw jix tit sjowal naj sicꞌlebꞌil, yutol jaꞌ yet jix ecꞌ eltoj naj tituꞌ, ma a waan naj, catuꞌ ma ey noan naj tet naj Amam yet jix ecꞌ eltoj. 10 Jaꞌ yet jun txolan tuꞌ ma xꞌoxel sjowal scꞌul naj tuꞌ, tucꞌal jix paxtoj bꞌey sna, catuꞌ jix yawten yistil, jaꞌton ix Zeres yetoj cꞌal ebꞌ swatxꞌil ánima. 11 Jix cꞌoli yalon naj tet ebꞌ, yutol yel xacꞌal miman yeoc sbꞌeomal, ecꞌal pax sbꞌisil ebꞌ yuninal, yetoj cꞌal pax oj, tol jix sicꞌle el yu naj rey xol wanxa ebꞌ ey yopiso yetoj, catuꞌ jix akꞌle yopiso naj yin sat yaawil yibꞌan wanxa ebꞌ tuꞌ. 12 Jix yalon jayebꞌ xa bꞌelan kꞌane jaxca tiꞌ:

—Yetoj cꞌal pax oj, asanne jin jix jin awtele low yetoj naj rey bꞌey jun miman loꞌo jix swaꞌne ix reina Ester, catuꞌ awtebꞌil jin pax low junelxa yetoj naj rey yet yecal yin junxa miman loꞌo oj yakꞌ ix tet naj rey tuꞌ. 13 Asan taꞌ wal yet chi wilon oc yin jun naj a Israel chi yij Mardoqueo tuꞌ, yet chotan ey bꞌey stiꞌ spuertail spalacio naj rey tuꞌ, jaꞌ masanil wan tzet ey, ey jin tiꞌ, caw cꞌamxa yeloc apnoj niꞌoj ebꞌ yul jin sat syaꞌiloj naj, ẍi Amam.

14 Yuxan jix yal ix yistil naj tuꞌ cꞌal ebꞌ swatxꞌil ánima tet jaxca tiꞌ:

—Jaꞌ tinaniꞌ, akꞌ waꞌnele junoj teꞌ teꞌ tol jun txꞌanil chi yun steel. Cha kꞌanon tet naj rey yet skꞌinibꞌ yecal tol chi locbꞌale a naj Mardoqueo tuꞌ yin teꞌ, yet watxꞌ yin xacꞌal tzalacꞌulal chi yun ja too bꞌey jun miman loꞌo bꞌey chach awtele yetoj naj rey tuꞌ, ẍi ebꞌ tet naj.

Jaꞌ jun naꞌbꞌale tuꞌ, caw jix ẍaꞌ scꞌul naj Amam, catuꞌ jix ẍejon waꞌnele jun teꞌ teꞌ jaxca yalon ebꞌ tuꞌ.