4 Jaꞌ ebꞌ ix ix chi akꞌon servil ix reina Ester, cꞌal ebꞌ winaj chi teyneni, jix yal ebꞌ tet yu tzet chi yun naj Mardoqueo. Yu jun tuꞌ, yuxan caw jix cusa scꞌul ix reina Ester, jix yaontoj an pichile tet naj Mardoqueo yet chi sqꞌuexon el an eel pichile eyoc yu naj tuꞌ, ma yal scꞌul naj jix ẍaꞌecꞌ wan pichile tuꞌ. 5 Catuꞌ jix awtele ix Ester yu jun yakꞌomal servil naj rey chi yij Hatac, tol yakꞌomal pax servil ix Ester tuꞌ yeoc naj. Jaꞌ naj tuꞌ jix chejletoj bꞌey naj Mardoqueo yet chi too yabꞌen tzet utbꞌil wal yeoc jun kꞌane chi al-le tuꞌ. 6 Yuxan jix too naj Hatac kꞌanabꞌ yetoj naj Mardoqueo tuꞌ. Jatuꞌ eyecꞌ naj bꞌey sattaj spuertail spalacio naj rey. 7 Jaxa yalon naj Mardoqueo masanil tzetyetal chi al-le tet, cꞌal yu jantaj sbꞌisil chꞌen plata chi yalte naj Amam yakꞌon tet naj chi cꞌubꞌan tumin tet naj rey yet watxꞌ chi makꞌle cam masanil ebꞌ Israel, yaloni. 8 Jix yakꞌon cꞌal pax jun scopiail ley tet naj Hatac tuꞌ, yet watxꞌ chi xꞌox naj tet ix Ester tzetyetal lalan yal-le el bꞌey yul conobꞌ Susa tuꞌ, yet watxꞌ chi yotajne eloj, catuꞌ jix yalon cꞌal pax oj tol chi yal ix Ester tet naj rey, jaxta wal chi too skeꞌ yecꞌ el jun kꞌane yibꞌan ebꞌ yet conobꞌ tuꞌ.

9 Jix lawi tuꞌ xin, catuꞌ jix meltzotej naj Hatac, jix jul yalon tet ix Ester masanil tzet jix yal naj Mardoqueo tuꞌ. 10 Jix ẍejon pax toj ix Ester tuꞌ naj Hatac junelxa yet chi too yalon wan kꞌane tet naj Mardoqueo jaxca tiꞌ: 11 Masanil mac eyoc ẍejabꞌoj naj rey, cꞌal masanil conobꞌ ey yalan ẍejbꞌanil naj rey tuꞌ, yotaj ebꞌ tol masanil mactxequel chi octoj bꞌey yul stiꞌ spalacio naj, ta winaj ma ix, yin tol manaj naj chi awteni, ey jun ley chi aloni tol tꞌinan cꞌal scami, asan ta tol chi yiꞌa skꞌojoch naj rey tol oro xacꞌal eloj, catuꞌ chi yaon eltej naj tet jun mactxequel tuꞌ, jaꞌ jun tuꞌ cꞌam chi cami, yuxan jain tiꞌ, cꞌam tocꞌal bꞌey chin awtele juneloj yu naj yul jun xꞌaaw tiꞌ, ẍi toj ix tet naj.

12 Jix yalon naj Hatac masanil tzet jix yal ix Ester tet naj Mardoqueo tuꞌ. 13 Catuꞌ jix yalontej spajtzebꞌal kꞌane naj Mardoqueo tet ix Ester jaxca tiꞌ: Manche ja naꞌ tol yu ey jaach ecꞌ bꞌey spalacio naj rey tuꞌ, yuxan oj jaach colcha can eloj, yajbꞌan masanil ebꞌ ket conobꞌ oj cam ebꞌ. 14 Ta jaach tiꞌ cꞌam cꞌal tzet oj ja wal tinaniꞌ, ey cꞌaltaꞌ bꞌey oj tit junoj mactxequel oj cu colon eloj, jal jaach xin yetoj masanil ebꞌ ja wican oj jex qꞌueyle eloj. Tumi yu wal yu jun kꞌane chi jul kibꞌan tiꞌ, yuxan jix jaach sicꞌle oc yin reinail yet chi cu colcha eloj, ẍi toj naj Mardoqueo tet ix Ester.

15 Catuꞌ jix spajtzen pax toj ix Ester tet naj Mardoqueo jaxca tiꞌ: 16 Yambꞌa oc masanil ebꞌ ket conobꞌ caan bꞌey yul conobꞌ Susa tiꞌ, tol chi yijle nocha sbꞌa ebꞌ yin oxebꞌoj cꞌual cꞌal oxebꞌoj akꞌbꞌal, quey cꞌal pax tuꞌ oj yun ebꞌ ix ix chin akꞌon servil tiꞌ wetoj an. Oj lawoj tuꞌ xin, jaxa jin too wilon naj rey tuꞌ, caxcꞌal mi man jaxca oj tuꞌ yalon ley, caxcꞌal mi chin makꞌle camoj, chi skeꞌ cꞌal jin cami, ẍi toj ix Ester tet naj.

17 Jix sjije naj Mardoqueo masanil tzet jix yal ix Ester tuꞌ.