Naj Mardoqueo Yetoj Amam
3
Jaꞌ yet jix bꞌey cꞌaltoj tiempo xin, jix ale oc yopiso naj Amam yu naj rey Asuero yin sat yaawil yibꞌan wanxa ebꞌ yaaw ey yul nación tuꞌ. Jaꞌ naj Amam tuꞌ scꞌaal Hamedata, yicꞌaal Agag naj. 2 Masanil ebꞌ chi akꞌon servil naj rey bꞌey spalacio tuꞌ, sowalil chi ey kaan ebꞌ cꞌal yey noan ebꞌ sattaj naj Amam bꞌey chi eqꞌui, yutol jaxca tuꞌ jix yun yalon naj rey; jal pax naj Mardoqueo xin, ma sjije jun chejbꞌanile tuꞌ naj.3 Jaxa ebꞌ eyoc yin yaawil yu naj rey tuꞌ, jix skꞌanlen ebꞌ tet naj Mardoqueo tzet yuxan cꞌam chi sjije jun chejbꞌanile tuꞌ. 4 Junjun cꞌal cꞌu chi yal ebꞌ tet, cꞌam cꞌal chi ẍaꞌ yabꞌ naj Mardoqueo tzet chi yal ebꞌ tuꞌ, yutol tuxa jix yal tet ebꞌ tol a Israel naj. Catuꞌ jix too yalon ebꞌ tet naj Amam, yet watxꞌ oj yilaꞌ ta tucꞌal oj can naj jaxca tuꞌ. 5 Jaꞌ yet jix yilon Amam tol yel toni cꞌam chi ey kaanoj cꞌal yey noan naj Mardoqueo tuꞌ bꞌey sattaj yet chi eqꞌui, yu jun tuꞌ, yuxan jix tit sjowal naj sicꞌlebꞌil. 6 Yutol jix yal naj Mardoqueo tuꞌ tzet conobꞌal, yuxan jix snaꞌ naj Amam, tol man asanne naj Mardoqueo tuꞌ chi ale oc syaꞌilal yibꞌan, yuxan jix snaꞌ cꞌal pax oj tzet chi yun sqꞌueyle el masanil ebꞌ Israel caan bꞌey yul snación naj rey Asuero tuꞌ.
Jun Ley Tol Chi Qꞌueyle El Masanil Ebꞌ Israel
7 Jaꞌ yet bꞌabꞌel xꞌaaw yul abꞌil, jaꞌton jun xꞌaaw chi yij Nisán, yet lacawebꞌxa abꞌil yoc naj rey Asuero yin reyal, jix akꞌle sicꞌle naj Amam yetoj jun chi yij purim,a yin tzet cꞌual cꞌal tzet tiempoal chi yiꞌ sbꞌa jun tzet chi snaꞌ naj tuꞌ. Jaxa jix yun xin, jaꞌ yet oxlajonebꞌ cꞌu yoc yet lacawebꞌ yoc jun xꞌaaw chi yij Adar. 8 Yu jun tuꞌ, yuxan jix yal naj Amam tet naj rey Asuero jaxca tiꞌ:
—Jaꞌ yul masanil ebꞌ conobꞌ eyoc yalan ja chejbꞌanil tiꞌ jaach rey, ey jun tujan ebꞌ ánima txꞌoj yeli. Txꞌoj yel sley yintaj wanxa conobꞌ, tol cꞌam chi sjije ja ley ebꞌ. Man smoo oj chi caey ecꞌ ebꞌ bꞌey yul ja nación tiꞌ. 9 Yu jun tuꞌ, yuxan ta chi ẍaꞌ ja cꞌul jaach rey, aeltoj junoj ley xol conobꞌ, yet chi yabꞌen oc ebꞌ tol chi qꞌueyle el ebꞌ masanil, jain tiꞌ oj wakꞌ junoj 7,500 quintal chꞌen plata tet naj chi cꞌubꞌan tumin, ẍi naj.
10 Yuxan jix yiꞌel scolkꞌabꞌ naj rey bꞌey eyoc selloal, jix yakꞌon tet naj Amam, jaꞌton jun chi jowi oc yin ebꞌ Israel, 11 jix yalon tet jaxca tiꞌ:
—Jaꞌ chꞌen plata jix ja wal tuꞌ can ojabꞌ cꞌal chꞌen ey jaach, yetoj cꞌal jun tujan ánima tuꞌ, ja wet chi yun can ocoj, chi skeꞌ cha waꞌne tzet chi ẍaꞌ ja cꞌul yin ebꞌ, ẍi tet naj.
12 Jaꞌ yet 13 yoc bꞌabꞌel xꞌaaw yul jun abꞌil tuꞌ, jix awtele masanil ebꞌ stzꞌibꞌlom naj rey, yu stzꞌibꞌen chejbꞌanile ebꞌ jix yakꞌ naj Amam yet chi too tet masanil ebꞌ yaaw bꞌey junjun conobꞌ eyoc yalan ẍejbꞌanil naj rey Asuero. Jaꞌ jun chejbꞌanile tuꞌ, jix tzꞌibꞌele yin stiꞌ cꞌal yin sletrail junjun conobꞌ. Jix oc sello naj rey tuꞌ yin, yutol jaꞌ naj jix aloni. 13 Yin eymanil jix yun spoꞌole eltoj an yuunal chejbꞌanile tuꞌ yul-laj wan conobꞌ eyoc yalan ẍejbꞌanil naj rey tuꞌ. Chi yal yin an ley tuꞌ jaxca tiꞌ, tol yin junne cꞌual chi qꞌueyle el masanil ebꞌ Israel, chi yal yeloc apnoj masanil ebꞌ winaj cꞌal ebꞌ ix ix, ebꞌ icham ánima cꞌal masanil ebꞌ unin, catuꞌ chi iꞌle can ecꞌ masanil stzetyetal ebꞌ. Jaꞌ jun cꞌual jix naꞌle tuꞌ, jaꞌton yet 13 yoc yet lacawebꞌ xꞌaaw chi yij Adar. 14 Jix too scopiail jun ley tuꞌ bꞌey masanil mimej conobꞌ eyoc yalan ẍejbꞌanil naj rey tuꞌ, jix al-le el skꞌaneal xol conobꞌ yet watxꞌ naꞌan xacꞌal yu masanil ebꞌ ánima yet jun cꞌual tuꞌ. 15 Eyman jix sajlemtoj an yuunal tuꞌ yu ebꞌ, jatacꞌalaꞌ chejbꞌanile jix yakꞌ naj rey. Eyman jix al-le el jun kꞌane tuꞌ bꞌey yul conobꞌ Susa. Yajbꞌan chi ucꞌwi an naj rey yetoj naj Amam, jaxa ebꞌ ánima bꞌey conobꞌ Susa tuꞌ, caw chi somchatoj snaꞌbꞌal ebꞌ yu jun kꞌane tuꞌ.