—Sowalil chi seyletej ebꞌ ix kꞌopo ix caw sakꞌal yili tet naj rey tuꞌ. 3 Sicꞌle ojabꞌ el junjunoj ẍejabꞌ naj rey bꞌey junjun mimej conobꞌ, yet chi too seyletej masanil ebꞌ ix kꞌopotaj ix sakꞌal yili, yet chi jul ebꞌ ix bꞌey spalacio naj rey bꞌey conobꞌ Susa, catuꞌ chi oc can ebꞌ ix yul skꞌabꞌ naj Hegai, naj chi teynen ebꞌ ix yistil naj rey, yet chi waꞌnele el yili ebꞌ ix. 4 Jaꞌ junoj ix kꞌopo tol oj ẍaꞌ scꞌul naj rey, jaꞌton ix tuꞌ oj oc yin reinail sqꞌuexeloj ix Vasti. Jaꞌ jun naꞌbꞌale tuꞌ jix ẍaꞌ scꞌul naj rey. Yuxan queytuꞌ tuꞌ jix yute naj rey jaxca tuꞌ.

5 Jaꞌ bꞌey conobꞌ Susa bꞌey caan naj rey, jatuꞌ caan jun winaj a Israel chi yij Mardoqueo, scꞌaal naj Jaír, titnaj yin yicꞌaal Simí. Jaꞌ naj Simí tuꞌ titnaj cꞌal pax yin yicꞌaal naj Quis yin yicꞌaal Benjamín. 6 Jaꞌjun pax naj Mardoqueo yetoj ebꞌ iꞌbꞌiltej yu naj rey Nabucodonosor bꞌey Jerusalén, jix apni can oc ebꞌ bꞌey Babilonia, junne jix yun yapni can oc ebꞌ yetoj naj Jeconías, sreyal Judá. 7 Jaꞌ naj Mardoqueo tuꞌ, ey jun scutzꞌin jun yican naj eyecꞌ yetoj, jaꞌton ix Hadasá, chi yal pax yin Ester, mebꞌa ix xacꞌal ix. Jaxa naj Mardoqueo tuꞌ jix ilon can chꞌibꞌ jaxca wal tol scutzꞌin yeocoj, yutol camnajxa smam cꞌal xutx ix; caw watxꞌ yili sat cꞌal smimanil jun kꞌopo tuꞌ. 8 Jaxa yet jix eltoj jun ley yu naj rey tuꞌ, caw ecꞌal ebꞌ ix kꞌopo ix jix yamcha oc bꞌey conobꞌ Susa, bꞌey spalacio naj rey, catuꞌ jix ale oc ebꞌ ix steyne naj Hegai, jaꞌton naj chi teynen cꞌaltaꞌ ebꞌ ix yistil naj rey. Eyoc ix Ester xol ebꞌ ix ix tuꞌ. 9 Jaꞌ ix Ester tuꞌ, caw watxꞌ yili ix jix yiloc naj Hegai tuꞌ, yuxan caw jix camcꞌulnele ix yu naj. Yu tuꞌ xin, yin eymanil jix yal naj tol chi waꞌnele a yili ix, cꞌal yakꞌle sloꞌbꞌe ix caw wal watxꞌ. Jix ale oc jujwan ebꞌ ix yakꞌomal servil naj rey yin yakꞌle servil ix, catuꞌ jix aletoj ebꞌ ix yetoj ix Ester bꞌey jun cuarto bꞌey caan ecꞌ ebꞌ ix yistil naj rey tuꞌ.

10 Jaꞌ ix Ester tuꞌ, ma yal yu tzet icꞌaaleal ma tzet conobꞌal ix, yutol jaꞌ naj Mardoqueo jix cam yalon tet tol cꞌam cꞌal niꞌoj tzet chi yalaꞌ. 11 Junjun cꞌal cꞌu chi ecꞌ naj Mardoqueo bꞌey sattaj snail bꞌey eyecꞌ ebꞌ ix ix tuꞌ, yu yabꞌen naj ta watxꞌ scꞌul ix Ester cꞌal tzet chi yun yil-le ix yu ebꞌ.

12 Masanil wan ebꞌ ix kꞌopo tuꞌ, jun wal abꞌil chi waꞌnele a yili ebꞌ ix. Yin sbꞌabꞌelal chi bꞌonle smimanil ebꞌ ix yetoj yaceiteal teꞌ mirra yin wajebꞌ xꞌaaw. Jaxa yin wajebꞌ xa xꞌaaw xin, chi bꞌonle ebꞌ ix yetoj perfume cꞌal yetoj crema jaxca cꞌaltaꞌ wan chi skꞌan ebꞌ ix ix. Jaꞌ yet chi lawi jun abꞌil yin swaꞌnele el yili ebꞌ ix ix tuꞌ xin, yin junjunal chi yun xꞌoxon sbꞌa ebꞌ ix sattaj naj rey Asuero. 13 Queyton tuꞌ jix yun stoo cꞌal junjun ebꞌ ix sattaj naj rey. Jaꞌ yet chi eltoj ebꞌ ix bꞌey snail bꞌey yaman oc ebꞌ ix tuꞌ, chi cꞌal skeꞌ yiꞌontoj ebꞌ ix tzet chi yoche scꞌul. 14 Chi too ebꞌ ix bꞌey spalacio naj rey yet yeycꞌualil, jaxa yet junxa skꞌinibꞌalil, jaxa yecꞌtoj ebꞌ ix bꞌey junxa snail bꞌey eyecꞌ ebꞌ ix scaabꞌ yistil naj rey, bꞌey eyoc naj Saasgaz yilomaloj yu naj. Cꞌamxa chi too ebꞌ ix sattaj naj rey, asan ta ey junoj ix caw jix ẍaꞌ scꞌul naj yilon oc xin. Jaꞌ jun ix tuꞌ chi awtele sbꞌi, catuꞌ chi too ix.

15 Jaxa jix yun xin, jaꞌ yet jix jul awtebꞌal yin ix Ester, scutzꞌin naj Abihail, ix yican naj Mardoqueo, yet chi too ix sattaj naj rey, asan tzet jix yal naj Hegai naj chi teynen ebꞌ ix, asan jix yiꞌtoj ix. Caw watxꞌ ix Ester tuꞌ yul sat masanil ebꞌ chi iloni. 16 Jaꞌ yet laonebꞌ yoc jun xꞌaaw chi yij Tebet, yet jujebꞌ abꞌil xa yoc naj Asuero yin reyal, jix iꞌletoj ix Ester bꞌey spalacio yet chi apni oc ix sattaj naj rey tuꞌ. 17 Yel xacꞌal jix camcꞌulnele ix Ester tuꞌ yu naj rey, yutol cꞌam junojxa ix ey scamcꞌulal naj yin jaxca scamcꞌulal naj yin ix Ester tuꞌ. Miman swatxꞌcꞌulal naj yin ix yintaj cꞌal wanxa ebꞌ ix kꞌopo ix jix eecꞌ yetoj naj, yuxan jix ale oc jun corona yet sreyal yin sjolom ix yu naj, jaxa yoc can ix yin reinail sqꞌuexeloj ix Vasti. 18 Yin eymanil jix swaꞌne jun miman loꞌbꞌe naj yu yiꞌle a can ix Ester tuꞌ. Jaꞌ yin jun loꞌbꞌe tuꞌ jix yawte masanil ebꞌ yaaw eyoc yin yopiso yetoj yul sconobꞌ tuꞌ. Jix yiꞌon eytej toolabꞌal eyoc yibꞌan ebꞌ ánima, catuꞌ caw miman tzetyetal jix spoꞌoecꞌ xol conobꞌ tuꞌ. Queytuꞌ jix yun xꞌoxon el swatxꞌcꞌulal naj rey tuꞌ.

19 Jaꞌ yet jix lawi syambꞌale oc wanxa ebꞌ ix kꞌopo tuꞌ, bꞌey junxa snail bꞌey eyecꞌ ebꞌ ix scaabꞌ yistil naj rey, catuꞌ jaꞌ naj Mardoqueo ey yopiso chotan ey naj bꞌey spuertail spalacio naj rey, 20 cꞌam cꞌal niꞌoj tzet jix yal ix Ester yu tzet conobꞌal cꞌal tzet icꞌaaleal ix, jaxca jix yun yalon naj Mardoqueo tet ix, yutol eyoc yin scꞌul ix sjijen tzet chi yal naj, jaxca cꞌaltaꞌ yet eyecꞌ ix yetoj bꞌey sna. 21 Jaꞌ yet chotan ey naj Mardoqueo bꞌey spuertail spalacio naj rey tuꞌ, catuꞌ jix yabꞌen skꞌanabꞌ cawan ebꞌ chi teynen spuertail palacio tuꞌ, jaꞌton naj Bigtán cꞌal Teres, tol caw chi el sjowal ebꞌ yin naj rey; chi yoche ebꞌ tol chi makꞌle cam naj rey tuꞌ. 22 Jaꞌ yet jix yabꞌen wan kꞌane naj Mardoqueo tuꞌ, jix yalon naj tet ix Ester, jaxa ix jix alon tet naj rey yu naj Mardoqueo tuꞌ. 23 Jaꞌ jun kꞌane tuꞌ, jix abꞌcha oc sicꞌlebꞌil ta yel, jaxa yet jix abꞌcha ocoj tol yel toni, jaꞌ ebꞌ cawan yakꞌomal servil naj rey tuꞌ jix a locan ebꞌ yin teꞌ teꞌ, yu yakꞌle cam ebꞌ. Jaꞌ jun tzet jix yun tuꞌ, jix ẍej naj rey tol chi tzꞌibꞌelecan yul an juun bꞌey chi tzꞌibꞌele skꞌaneal jun nación tuꞌ.