3 Jaꞌ yet jix lawi oxebꞌ abꞌil yoc naj Asuero yin reyal, jix yakꞌon jun miman loꞌbꞌe tet ebꞌ miman yeloc apnoj eyoc yin yaawilal yetoj, cꞌal tet ebꞌ syaawil ebꞌ soldado bꞌey Persia cꞌal ebꞌ bꞌey Media, yetoj cꞌal ebꞌ yaaw miman yeloc apnoj yul junjun mimej conobꞌ. 4 Nan abꞌil jix oc jun kꞌin tuꞌ yu naj, yet chi xꞌoxon el sbꞌeomal cꞌal sjelanil yin yopiso tet ebꞌ jix awtele tuꞌ. 5 Jix lawi tuꞌ, catuꞌ jix yaon oc jujebꞌxa cꞌual kꞌin bꞌey sattaj spalacio. Masanil ebꞌ yaman ecꞌ bꞌey conobꞌ Susa, jaxca ebꞌ miman yeloc apnoj cꞌal ebꞌ yeynajil, jix awtele ebꞌ yu naj. 6 Watxꞌ xacꞌal yili sattaj spalacio tuꞌ yetoj an sajin kꞌap, cꞌal an kꞌejweinaj, jaxa an púrpura eyoc xꞌaniloj, catuꞌ mitxꞌbꞌil a locan yetoj chꞌen slocxomal tol plata chꞌen cꞌal eloj, jaxa yoyal mitxꞌnen aoj, chꞌen mármol xacꞌal eloj. Ey cꞌal pax oc oro cꞌal plata yinlaj ẍila, jaxa sattaj eltoj spalacio tuꞌ, eey chꞌen chꞌen caw sakꞌal xacꞌal yili, chꞌen sajin cꞌal chꞌen kꞌejin. 7 Jaꞌ svaso bꞌey chi yucꞌ svino, oro xacꞌal eloj, txꞌoj txꞌoj cꞌal yili junjun vaso tuꞌ. Caw miman yal uva jix el yin scꞌul naj rey tuꞌ yakꞌoni. 8 Jix yalon naj rey tet ebꞌ yet yaawil, cꞌal tet ebꞌ chi akꞌon servil naj, tol cꞌam chi akꞌle pural ebꞌ yuqꞌuen vino tuꞌ; jatacꞌalaꞌ jantaj cꞌal chi yoche scꞌul ebꞌ chi yuqꞌueꞌ. 9 Quey cꞌal pax tuꞌ jix yun ix reina Vasti, jix swaꞌne cꞌal pax jun miman loꞌbꞌe ix bꞌey spalacio naj rey Asuero, yet watxꞌ chi low ebꞌ ix awtebꞌil.

10 Jaꞌ yet sjuj cꞌual jun kꞌin tuꞌ, caw jix tzala xacꞌal a scꞌul naj rey yu vino, yu jun tuꞌ, yuxan jix ẍejtoj jujwan ebꞌ yakꞌomal servil eyoc yipoj scꞌul, jaꞌton Mehumán, Biztá, Harboná, Bigtá, Abagtá, Zetar cꞌal Carcás. 11 Jaꞌ yet chi too iꞌletej ix reina Vasti yu ebꞌ sattaj naj rey yetoj scorona ix tuxa cꞌal chi kopopi yili, yet chi txꞌoxle swatxꞌil yili ix sattaj masanil conobꞌ cꞌal sattaj masanil ebꞌ mimej yaaw, tol caw watxꞌ yili ix. 12 Jaxa ix reina tuꞌ, ma ẍaꞌ scꞌul ix tol chi tit jaxca yalon ẍejbꞌanil naj rey jix too yal ebꞌ yakꞌomal servil tuꞌ, yuxan ma tit ix. Yu tuꞌ xin, caw jix tit sjowal naj rey tuꞌ yin ix. 13 Yuxan jix yawtetej jujwan eyoc yopiso yu bꞌey Persia cꞌal bꞌey Media, yutol jaxca tuꞌ yakꞌon xolilal yet chi waꞌxi yeoc junoj kꞌane, tol jaꞌ ebꞌ otajnen tzet yeoc sleyalil chi awtelei yiloni. 14 Jaꞌ ebꞌ caw eyoc yipoj scꞌul naj rey tuꞌ, jaꞌton: Carsená, Setar, Admata, Tarsis, Meres, Marsená cꞌal Memucán, jaꞌton jujwan winaj tuꞌ tol sat yaaw yeoc ebꞌ bꞌey Persia cꞌal bꞌey Media, jaꞌton ebꞌ chi oc yin yambꞌabꞌail yetoj naj rey tuꞌ. 15 Jix skꞌanle naj rey tet ebꞌ jaxca tiꞌ:

—¿Tzet sowalil chi utele ix reina Vasti, yutol ma sjije jin chejbꞌanil ix an, jix watoj ebꞌ jin chejabꞌ yet chi awtele ix, ma tit pax ix? ¿Tzet chi yal cu leyalil yin jun tiꞌ? ẍi naj tet ebꞌ.

16 Jaꞌ sattaj masanil ebꞌ yaman ecꞌ yin jun yambꞌabꞌail tuꞌ, jix yal naj Memucán jaxca tiꞌ:

—Jaꞌ ix reina tuꞌ, man asanne oj ja sattaj jaach rey jix oc spenail ix, jix oc cꞌal pax spenail ix cu sattaj jaon mimej yaaw jon tiꞌ, cꞌal tet masanil ebꞌ conobꞌ. 17 Jaꞌ tzet jix yun ix tuꞌ, oj yotajne el masanil ebꞌ ix ix, catuꞌ oj scuyontoj yet ebꞌ ix yintaj ix, yet tol cꞌamxa yeloc apnoj yichamil ebꞌ ix yul sat, catuꞌ oj mi yalon ebꞌ ix tet yichamil jaxca tiꞌ: Jaꞌ ix reina Vasti, jix awtele ix yu naj rey Asuero, jaxa jix yunne ma tit ix yawtelei, ẍim ebꞌ ix. 18 Jaxa mi wal yet oj yabꞌen oc ebꞌ ix yistil ebꞌ naj mimej yaaw bꞌey Persia cꞌal bꞌey Media, yu tzet jix yute sbꞌa ix reina tuꞌ, oj mi yal ebꞌ ix jun tiꞌ tet yichamil. Jaꞌ yu jun tuꞌ, oj mi yintajne can el yichamil ebꞌ ix, catuꞌ oj mi tit sjowal ebꞌ naj yin yistil. 19 Yu tuꞌ xin, tumi watxꞌ jun tiꞌ cha wabꞌ jaach rey, yel xacꞌal mi watxꞌ tol cha wakꞌ tzꞌibꞌelecan yul sleyal Persia cꞌal Media, tol cꞌamxa chi qꞌuexle junelxa: Tol cꞌamxa bꞌakꞌin chi jul ix reina Vasti tuꞌ ja sattaj, jaxa junojxa ix ecꞌbꞌan swatxꞌil yintaj ix tuꞌ chi oc yin reinail sqꞌuexeloj ix. 20 Jaꞌ jun ley tuꞌ sowalil chi otajnele el bꞌey masanil yul ja nación tiꞌ. Queytuꞌ oj yun sjijen masanil ebꞌ ix ix tet yichamil yal cꞌal tzet conobꞌal ebꞌ ánima, ẍi naj Memucán tuꞌ.

21 Jaꞌ jun naꞌbꞌale jix yakꞌ naj Memucán tuꞌ, caw jix ẍaꞌ scꞌul naj rey yetoj cꞌal masanil ebꞌ chi wa alnen junoj kꞌane yetoj, catuꞌ jix oc xacꞌal yopiso jun kꞌane tuꞌ yu naj rey. 22 Yuxan jix yakꞌ tzꞌibꞌeletoj yuunal bꞌey junjun mimej conobꞌ eyoc yalan ẍejbꞌanil tuꞌ, jix tzꞌibꞌeletoj yin stiꞌ junjun conobꞌ. Jix yalontoj yul an juun tuꞌ, tol ey ojabꞌ yeloc apnoj ebꞌ winaj yul sna, asanne ojabꞌ ebꞌ chi alon tzet chi yun ebꞌ ix ix.