Jun Bꞌulan Ebꞌ Chi Jowi Yin Naj Nehemías
6
Jaꞌ yet jix yabꞌen naj Sambalat, naj Tobías, Guésem naj a Arabia, cꞌal yetoj wanxa chi jowi oc kin, tol jix waꞌxi a jun muro tuꞌ, jix joycha ey masanil caxcꞌal mi cꞌamto chi waꞌxi octoj spuertail, 2 jix yatej jun ẍejabꞌ naj Sambalat cꞌal naj Guésem tuꞌ jin cꞌatan yu yaloni tol chi cu yambꞌa cu bꞌa yetoj ebꞌ bꞌey jun aldea bꞌey spananil stiꞌ sjobꞌeal Onó. Yutol chi yoche ey tzet chin yute ebꞌ an. 3 Yuxan jix jin chejtoj jun jin chejabꞌ yalon tet ebꞌ: Cꞌam jin colanil an, tol caw wal witzꞌan jin yin jin mulnail tol caw wal miman yeloc apnoj. Yu jun tuꞌ, yuxan cꞌam chi skeꞌ jin to ey jex tuꞌ, yutol ta chin too an, jaꞌ jun jin mulnail tiꞌ chi oc can tucanoj, jin chi too tet ebꞌ. 4 Canel wal jix yatej ẍejabꞌ ebꞌ yu jul yalon ebꞌ ey jin, jacꞌalaꞌ jix yun jin pajtzen tet ebꞌ.5 Jix lawi tuꞌ, yin xa sjoelal jaꞌcaw jun ẍejabꞌ naj Sambalat tuꞌ, jix ẍejtej jul yakꞌon jun an carta tol jajan stiꞌ.a 6 Bꞌey jix yal jaxca tiꞌ: Chi al-le xol ánima, yetoj cꞌal pax oj chi yalon naj Guésem, tol jaach tiꞌ yetoj ebꞌ ja wet Israelal lalan je naꞌon tzetyetal man watxꞌoj, yuxan lalan je waꞌnen a jun muro tuꞌ, tol abꞌcha woche jaach chach oc yin reyal. 7 Tol abꞌ jix ja wal tet ebꞌ ẍejabꞌ Dios yet chi yalon tet ebꞌ a Jerusalén cꞌal tet ebꞌ a Judá tol rey jaachxa. Jaꞌ jun chi al-le tuꞌ, tucꞌaltaꞌ oj yabꞌ naj rey Artajerjes, yu jun tuꞌ, yuxan chi skeꞌ ja tita, catuꞌ chi cu kꞌanabꞌ wal ja wetoj, ẍi naj Sambalat yin jun carta tuꞌ.
8 Jix lawi tuꞌ xin, jix waontoj spajtzebꞌal an carta tuꞌ tet ebꞌ, jix walontoj tol jaꞌ wan kꞌane chi al-le tuꞌ man yeloj, yutol tucꞌal che naꞌ aoj, jin chi toj tet ebꞌ. 9 Jix yal ebꞌ jaxca tuꞌ, yu jin xibꞌtele yu ebꞌ. Chim snaꞌ ebꞌ tol oj kakꞌ caabꞌcꞌulal yet watxꞌ cꞌamxa chi lawi jun cu mulnail tiꞌ. Yuxan jix jin txali jaxca tiꞌ: Jaach jin Diosal akꞌ jin tecꞌanil, jin chi. 10 Jix lawi tuꞌ xin, jix jin bꞌetecꞌ bꞌey sna naj Semaías, scꞌaal Delaías, yitxiquin naj Mehetabel. Jaꞌ naj tuꞌ xax smajche octoj sbꞌa naj yul sna. Jix yalon ey jin jaxca tiꞌ: Cu yambꞌa oc cu bꞌa bꞌey stemplo Dios, catuꞌ chi cu majchen spuertail, yutol jaꞌ yet jun akꞌbꞌal tiꞌ chi snaꞌ ebꞌ jaach jul smakꞌon camoj, ẍi naj ey jin. 11 Catuꞌ jix jin takꞌwi tet jaxca tiꞌ: ¿Man jin moo oj chin cꞌubꞌa el jin bꞌa cꞌal jin majchen octoj jin bꞌa yul stemplo Dios yet chin colon jin bꞌa? Yuxan ma skeꞌ woctoj jaxca cha wal tuꞌ, jin chi tet.
12 Jix naꞌcha el wu, tol manaj Dios chi alon jun kꞌane tuꞌ. Jaꞌ jun kꞌane tuꞌ, asan yu jin xibꞌtele yet chi oc jin penail tet Dios, jix yal yu yakꞌon penacꞌulal ebꞌ win, yutol jaꞌ naj Sambalat yetoj naj Tobías jix yakꞌ tumin ebꞌ tet naj. 13 Jix stoolane ebꞌ yu jin xibꞌtele a yu ebꞌ, yet chi oc jin penail yalon ebꞌ, yet watxꞌ caw wal pena oj yun yal-le kꞌane win snaꞌon ebꞌ, catuꞌ chi el jin qꞌuixwil. 14 Yuxan jix jin txali tet Dios jaxca tiꞌ: Jaach jin Diosal naꞌ jintej, yet cha waon oc syaꞌilal yibꞌan naj Sambalat yetoj Tobías yu tzet chi snaꞌ ebꞌ win an. Naꞌ cꞌal pax tej ix Noadías yalomal el ja kꞌane yaloni, cꞌal yetoj wanxa ebꞌ ẍejabꞌ chi yoche ebꞌ chin xibꞌte, jin chi yin jin txa.
15 Jix lawi swaꞌxi jun muro yet 25 yoc xꞌaaw Elul; ey 52 cꞌual jix oc mulnail tuꞌ. 16 Jaꞌ yet jix yabꞌen masanil ebꞌ pena snaꞌbꞌal, yetoj cꞌal masanil wanxa nacionlaj joyan oc cu cawilal, queytuꞌ jix yun xiwa ebꞌ, cꞌal yiꞌle can eytej ebꞌ yin tol cꞌam yeloc apnoj niꞌoj ebꞌ, yutol jix naꞌcha el yu ebꞌ, tol jaꞌ jun mulnail tiꞌ jix yiꞌ sbꞌa yetoj scolwal cu Diosal.
17 Jaꞌ yet wan cꞌual tuꞌ caw ecꞌal an carta jix stzꞌibꞌetoj ebꞌ naj a Judá, ebꞌ naj miman yeloc apnoj yin yopiso tet naj Tobías, jix jul cꞌal spaj wan carta tuꞌ. 18 Yutol ecꞌal ebꞌ naj miman yeloc apnoj yin yopiso watxꞌ yakꞌon yetoj naj Tobías, yu cꞌal tol niꞌe yeoc naj bꞌey naj Secanías, scꞌaal Árah, cꞌal Johanán scꞌaal Tobías, jix nupi naj yetoj ix cutzꞌin naj Mesulam, jaꞌton scꞌaal naj Berequías. 19 Yu jun tuꞌ xin, yuxan watxꞌ xacꞌal tzet jix yal ebꞌ jin sattaj, catuꞌ jix yalon ebꞌ tet naj Tobías masanil tzetyetal jix wal jain tiꞌ. Jal pax naj Tobías xin, jix yatej scarta ey jin yin jin xibꞌtele yu.