6 Jaꞌ yet jix wabꞌen yalon ebꞌ ánima tzet wal yeocoj, caw jix tit jin jowal. 7 Jix lawi tuꞌ, jix jin naꞌon sicꞌlebꞌil, catuꞌ jix jin tenchanen ebꞌ miman yeloc apnoj yetoj cꞌal ebꞌ syaawil conobꞌ, yutol chi skꞌan miman yuneꞌ tumin ebꞌ tet ebꞌ yet conobꞌ. Yuxan jix jin yambꞌa oc masanil ebꞌ ánima yin jun miman yambꞌabꞌail yu snaꞌle yibꞌan jun kꞌane tuꞌ. 8 Catuꞌ jix walon tet ebꞌ jaxca tiꞌ: Jaꞌ tinaniꞌ caw jix kakꞌ kip cu colon eltej ebꞌ ket conobꞌ txonbꞌil cantoj bꞌey junxa txꞌoj nación, ¿tumi oj to je txon cꞌal toj ebꞌ ket conobꞌ tiꞌ, catuꞌ jaon xa oj cu man pax eltej ebꞌ junelxa? jin chi tet ebꞌ.

Tzꞌin xacꞌal ẍi ebꞌ masanil. Cꞌamxa chi naꞌcha tzet chi yun spajtzen ebꞌ. 9 Catuꞌ jix walon tet ebꞌ: Caw wal man watxꞌoj jun tzet che yun tiꞌ. Smoo wal tol che txꞌoxeloj tol miman yeloc apnoj Dios yul je sat, yet cꞌamxa chi bꞌuchwa ebꞌ ánima chi jowi oc je yin. 10 Yetoj cꞌal pax ebꞌ eyto wu jin bꞌa yetoj, cꞌal ebꞌ chi mulna wetoj, jix kakꞌ tumin smaane ebꞌ, cꞌal ixim tiriw jix kakꞌ tet ebꞌ, yuxan jaꞌ tinaniꞌ joꞌwej tan wan sjec ebꞌ tuꞌ yibꞌan. 11 Yuxan chi wal ey jex, tol che yakꞌ meltzo xꞌotxꞌ ebꞌ tinaniꞌ, cꞌal yawo ebꞌ, teꞌ yolivo ebꞌ, cꞌal sna ebꞌ, che joꞌon tan sjec ebꞌ tuꞌ yibꞌan, catuꞌ che yakꞌon meltzo yuneꞌ stumin ebꞌ, ma tiriw, ma yal uva, ma aceite olivo, yetoj cꞌal wanxa jix je kꞌan tet ebꞌ, jin chi tet ebꞌ. 12 Catuꞌ jix takꞌwi ebꞌ masanil: Oj kakꞌ meltzo masanil tet ebꞌ. Cꞌamxa cꞌal tzet oj kal yu wan tuꞌ. Oj cu jije masanil tzet cha walaꞌ, ẍi ebꞌ ey jin.

Queytuꞌ jix yun wawten cꞌal pax ebꞌ yakꞌomal xaambꞌal, sattaj wal ebꞌ jix yakꞌon stiꞌ ebꞌ, tol oj yun ebꞌ tzet jix yal tuꞌ. 13 Yetoj cꞌal pax oj, jix jin tzicoꞌtane jin pichil, jix walon jaxca tiꞌ: Jaxca wal tuꞌ oj yun yiꞌon eltej je tzetyetal Dios yul je na, ta tol man oj je jije je yunen bꞌey che yakꞌ can je tiꞌ tinaniꞌ. Jaxca tuꞌ oj yun yiꞌon ecꞌ Dios jantaj tzet ey, ey jex tinaniꞌ, jin chi tet ebꞌ. Jix takꞌwi ebꞌ masanil, jix yalon ebꞌ: Yun ojabꞌ jaxca tuꞌ, oj cu jije, ẍi ebꞌ. Catuꞌ jix yalon watxꞌ kꞌane ebꞌ tet Dios. Jix sjije ebꞌ yunen tzet jix yal tuꞌ.

14 Jaꞌ yet 20 abꞌil xa yoc naj Artajerjes yin reyal bꞌey conobꞌ Persia, catuꞌ jix jin yaon oc yin gobernadoral bꞌey yul yet Judá, masantaꞌcꞌal jix tzꞌajna 32 abꞌil yoc naj Artajerjes yin reyal. Jaꞌ yet lacawebꞌ abꞌil xa woc yin gobernadoral tuꞌ, jin cuenta jin bꞌa yetoj jin gasto, cꞌam chꞌen stumin ebꞌ gobernador tuꞌ jix jin kꞌanaꞌ, cꞌam cꞌal pax tzet jix jin kꞌan tet ebꞌ wican. 15 Jaxca ebꞌ gobernador tol ecꞌnaj eltoj yet yalantoj, yet cꞌamto chin oqui, jaxca wal junoj ijatz eyoc yibꞌan ebꞌ conobꞌ. Junjun cꞌal cꞌu chi skꞌanon el 40 siclo chꞌen tumin plata yu stool sloꞌbꞌe ebꞌ, cꞌal yu svino ebꞌ. Yetoj cꞌal pax oj chi etnele ebꞌ conobꞌ yu ẍejabꞌ ebꞌ, jal jin jain tiꞌ an xin, man jaxca oj tuꞌ jix wute ebꞌ, yutol caw wal miman yeloc apnoj Dios yul jin sat. 16 Yetoj cꞌal pax junxa, jix jin jije jin waꞌnen a junxa tujan smuroal conobꞌ yetoj ebꞌ jin chejabꞌ, jix mulna cꞌal ebꞌ wetoj. Cꞌam junoj mactxequel jix wiꞌecꞌ xꞌotxꞌ. 17 Ey cꞌal pax 150 ebꞌ winaj chi low wetoj an, jaꞌton ebꞌ wet conobꞌ, cꞌal ebꞌ eyoc yin yaawilal, jal pax ebꞌ tucꞌal chi julecꞌ cu cꞌatan, chi tit ebꞌ bꞌey wanxa nación joyan oc kinlaj tiꞌ, cꞌam ebꞌ eyoc stzꞌajiloj. 18 Jaꞌ tzetyetal tol wet yeocoj chi waꞌxi junjun cꞌu: Jun noꞌ icham wacax chi cami, wajcꞌon noꞌ icham meꞌ chi cami, txꞌoj pax ye noꞌ caẍlan. Catuꞌ yin junjuntaj laonebꞌ cꞌual chi iꞌletej an vino, cꞌam cꞌaltaꞌ bꞌey jix jin kꞌan tzet jix jin loꞌ yin wopiso tiꞌ, tol jin moo taꞌle jin chaꞌoni, yutol miman yeoc scawxinajil jun conobꞌ tiꞌ chi wilaꞌ. 19 Yuxan jix jin txali tet Dios, jix walon jaxca tiꞌ: Jaach jin Diosal, naꞌ jin cꞌaltej yu masanil tzet jix jin waꞌne bꞌey jun conobꞌ tiꞌ yet cha wakꞌon spaj ey jin, jin chi yin jin txa.