3 Ey cꞌal pax ecꞌ naj Tobías, Amonita yetoj naj. Catuꞌ jix yalon naj: Jaꞌ wan chꞌen chꞌen lalan swaꞌnen a ebꞌ yin smuroal tuꞌ, cꞌuun lalan yunen can aoj, ta chi atoj linan junoj noꞌ waax yibꞌan, chim el latzꞌna chꞌen stenon noꞌ, ẍi naj.

4 Jix lawi tuꞌ, jix txali naj Nehemías jaxca tiꞌ: Jaach Jehová jin Diosal, abꞌ ton wal chi yun sbꞌuchwa ebꞌ kin jon. Tol ojabꞌ chi too can sbꞌuchwal kꞌane ebꞌ tuꞌ yibꞌan, eyqꞌuey ojabꞌ ebꞌ naj yu ebꞌ scajat, tol ojabꞌ chi iꞌle cantoj ebꞌ naj yin yakꞌomaloj servil bꞌey junojxa nación. 5 Cꞌam ojabꞌ cha wakꞌ mimancꞌulal yin spenail ebꞌ, cꞌam ojabꞌ chi too qꞌueycꞌulal ja wu tzet jix yun ebꞌ, yutol caw pena tzet chi yal ebꞌ kin jaon chi cu waꞌne a jun muro tiꞌ, jin chi yin jin txa.

6 Jix kakꞌ cꞌal kip cu mulna yu swaꞌxi a jun muro tuꞌ, yutol lalanxa snanbꞌi aoj, yutol caw chi mulna ebꞌ conobꞌ yin tzalacꞌulal. 7 Jaꞌ naj Sambalat, yetoj Tobías, yetoj ebꞌ Árabe, ebꞌ Amonita, cꞌal yetoj ebꞌ a Asdod, jaꞌ yet jix yabꞌen ebꞌ tol lalan cꞌal cu caꞌ waꞌnen a smuroal conobꞌ Jerusalén, tol lalanxa smajcha el bꞌey poꞌonajtoj, yu jun tuꞌ, caw jix tit sjowal ebꞌ sicꞌlebꞌil. 8 Masanil ebꞌ jix syambꞌa oc sbꞌa kin, catuꞌ jix swa alne ebꞌ tzet chi yun smakꞌon ey smuroal conobꞌ Jerusalén ebꞌ junelxa yaloni. 9 Jix lawi tuꞌ xin, catuꞌ jix cu txali tet cu Diosal, jix kaon oc cu teynemal yet cꞌualil cꞌal yet akꞌbꞌalil, yet chi cu colon cu bꞌa tet ebꞌ. 10 Jix yalon cꞌal pax ebꞌ ánima a Judá jaxca tiꞌ: Caw jix el yip ebꞌ naj ijom chꞌen, caw miman bꞌey etexnajtoj jun icham muro tiꞌ, manxa oj cu tzaji cu waꞌnen a jun muro tiꞌ, ẍi ebꞌ.

11 Jaꞌ snaꞌon ebꞌ cu cajat tuꞌ, tol cꞌam chi kilaꞌ, jaxam la snaꞌon ebꞌ yoctej cu xol yet chi jul ebꞌ cu smakꞌon camoj, catuꞌ chi oc tucan jun mulnail tiꞌ. 12 Jaꞌ ebꞌ ket conobꞌ caan cu cawilal tiꞌ jix jul yal ebꞌ ey jon, tol oj jul ebꞌ pena snaꞌbꞌal tuꞌ kin yaloni, yal cꞌal bꞌeytuꞌ chi cu mulna ocoj. 13 Yu jun tuꞌ xin, jix waloni, tol yin junjun bꞌulan chi yute ey sbꞌa ebꞌ yinlaj jun muro tuꞌ, bꞌey jobꞌe eytoj cꞌal bꞌey lean kiloni, tol chi yiꞌa yespada ebꞌ, cꞌal chꞌen lanza yetoj chꞌen julbꞌal yet jowal. 14 Jaꞌ yet jix wiloni, tol chi xiw ebꞌ, catuꞌ jix walon tet ebꞌ icham winaj cꞌal tet ebꞌ syaawil conobꞌ, cꞌal tet masanil ánima; cꞌam ojabꞌ chex xiw tet ebꞌ, naꞌwejtej tol jaꞌ cu Diosal caw miman yeloc apnoj, caw wal ey smey Naj. Yu tuꞌ xin, cu colwej el cu conobꞌ, ebꞌ kuninal, ebꞌ ix kistil cꞌal cu na, jin chi tet ebꞌ.

15 Jaxa yet jix yabꞌen ebꞌ cu cajat tuꞌ tol majbꞌil ku jon, yutol jaꞌ Dios jix uchontoj masanil jun tzet jix swa alne ebꞌ tuꞌ, queytuꞌ jix yun cu chaꞌon el yich cu mulna junelxa. 16 Jaꞌ yet jun cꞌual, nan ebꞌ naj mulnawom tuꞌ chi mulnai, jal nanxa ebꞌ xin, jaꞌ ebꞌ chi teyneni, iꞌbꞌil a smitxꞌkꞌabꞌ yet jowal ebꞌ: Chꞌen lanza, chꞌen majbꞌal sat julbꞌal, yetoj chꞌen julbꞌal yetoj cꞌal pax chꞌen pichile. Eyoc ebꞌ syaawil conobꞌ yetoj ebꞌ mulnawom tuꞌ, caw wal chi iptzele pax ebꞌ, 17 jaꞌton ebꞌ ánima eyoc yin mulnail yin swaꞌxi a muro tuꞌ. Ebꞌ ijtzom jix oc pax ian ebꞌ yijontej tzetyetal junelxa, junne skꞌabꞌ ebꞌ chi mulnai, jal junxa xin, iꞌbꞌil a chꞌen mitxꞌkꞌabꞌe yet jowal yu ebꞌ. 18 Masanil ebꞌ chi mulna yin jun muro tuꞌ eyoc yespada ebꞌ yin snan. Jaꞌ jin cꞌatan an, jatuꞌ eyecꞌ naj chi xuon noꞌ cacho. 19 Catuꞌ jix walon tet ebꞌ icham winaj cꞌal tet ebꞌ syaawil conobꞌ, cꞌal tet ebꞌ ánima masanil: Caw wal miman yeoc jun mulnail tiꞌ, jal jon jaon tiꞌ, poꞌoquiẍtaj keoc cu waꞌnen a jun muro tiꞌ, txꞌoj txꞌoj xacꞌal bꞌey ey jon cantoj junjun jon. 20 Yu jun tuꞌ xin, jaꞌ yet che yabꞌen xuꞌle noꞌ cacho, catuꞌ chex tit cu cꞌatan jon, jaꞌ cu Diosal, oj akꞌon jowal cu qꞌuexeloj.

21 Yu jun tuꞌ xin, nanoj jon chi cu mulnai, chi ẍaꞌel yich cu mulna yet skꞌinibꞌ masantaꞌcꞌal yet yeycꞌu, jal nanxa ebꞌ eyoc slanza ebꞌ yul skꞌabꞌ. 22 Jaꞌ yet jun tiempoal tuꞌ, jix walon tet ebꞌ wet conobꞌ an, tol chi can ebꞌ wey yetoj ebꞌ mulnawom yul conobꞌ Jerusalén tiꞌ, yet chi steynen sconobꞌ ebꞌ ketoj yet akꞌbꞌalil; jal yet cꞌualil xin, chi cu mulnawej. 23 Jacꞌalaꞌ cꞌal pax jin jain tiꞌ yetoj ebꞌ wican, cꞌal ebꞌ jin chejabꞌ, cꞌal ebꞌ chin teyneni, cꞌam chi kiꞌel cu pichil yet akꞌbꞌalil, iꞌbꞌil cꞌal a cu lanza ku jon.