Jix Poꞌole Ecꞌ Mulnail
3
Junjun cꞌal ebꞌ ánima jix ẍaꞌ smajul smulnail ebꞌ yet oj swaꞌnen jun muro tuꞌ ebꞌ. Jaꞌ ebꞌ jix ijbꞌan mulnail tuꞌ, jaꞌton ebꞌ tiꞌ: Naj Eliasib yetoj cꞌal ebꞌ yet yakꞌomal xaambꞌal jaꞌjun yetoj. Jaꞌ ebꞌ jix caꞌ waꞌnen oc smajil stiꞌ conobꞌ bꞌey chi octoj noꞌ meꞌ. Jix waꞌxi yu ebꞌ, jix yaon oc smajil ebꞌ, catuꞌ jix swaꞌnen pax oc smuroal ebꞌ, jix ecꞌtoj bꞌey jun torre chi yij Cien, masantaꞌcꞌal jix apni oc bꞌey jun torre chi yij Hananel. Jix lawi tuꞌ, jix yaon can oc ebꞌ yul skꞌabꞌ Dios cꞌal yalon ebꞌ yu diosalil. 2 Jal junxa tujan smuroal chi bꞌey cꞌal stoo xin, jaꞌ ebꞌ a conobꞌ Jericó jix caꞌ waꞌnen aoj. Ey junxa tujan jix scaꞌ waꞌne a ebꞌ yet Zacur, jaꞌton naj scꞌaal Imrí. 3 Jaꞌ ebꞌ yicꞌaal naj Senaá, jix caꞌ waꞌnen oc smajil bꞌey chi iꞌle octoj noꞌ pescado yu ebꞌ. Jix yaoc wan chꞌen hierro smitxꞌbꞌaniloj bꞌey sjolomtaj atoj tuꞌ ebꞌ. 4 Jaꞌ junxa tujan smuroal chi bꞌey cꞌal stoo xin, jaꞌ Meremot, naj scꞌaal Urías yitxiquin naj Cos, jaꞌ jix caꞌ waꞌnen aoj. Jal junxa tujan xin, jaꞌ naj Mesulam scꞌaal Berequías, yitxiquin naj Mesezabel jix caꞌ waꞌnen aoj. Jal junxa tujan xin, jaꞌ naj Sadoc scꞌaal Baaná jix caꞌ waꞌnen aoj. 5 Jal junxa tujan xin, jaꞌ ebꞌ a Tecoa jix waꞌne aoj, asan xin, jaꞌ ebꞌ naj miman yeloc apnoj xol ebꞌ conobꞌ tuꞌ, ma yal scꞌul ebꞌ chi colwa yetoj ebꞌ chi ijbꞌan jun mulnail tuꞌ. 6 Jaꞌ naj Joiadá scꞌaal Paséah, cꞌal Mesulam scꞌaal Besodías, jaꞌ ebꞌ jix caꞌ waꞌnen a bꞌey eyoc spuertail chi yij Jesaná. Jix swaꞌne oc spuertail ebꞌ, catuꞌ jix yaon oc hierro ebꞌ smitxꞌbꞌaniloj. 7 Jal junxa tujan smuroal chi bꞌey cꞌaltoj, jaꞌ naj Melatías a conobꞌ Gabaón jix waꞌnen aoj yetoj cꞌal naj Jadón a conobꞌ Meronot, yetoj cꞌal ebꞌ a Gabaón yetoj cꞌal ebꞌ a Mizpá. Jaꞌton wan conobꞌ tuꞌ eyoc yalan ẍejbꞌanil naj gobernador eyoc bꞌey jun conobꞌ ey skꞌaxepal ecꞌtej jaꞌ miman jaꞌ Éufrates. 8 Jal junxa tujan xin, jix caꞌ waꞌnele a yu naj Uziel, scꞌaal Harhaías, jaꞌton naj chi waꞌnen wan chꞌen chꞌen watxꞌ yili. Jal junxa tujan xin, jaꞌ naj Ananías, jaꞌton naj waꞌnem perfume, jaꞌ jix waꞌnen aoj. Jaꞌton ebꞌ cawan tiꞌ jix caꞌ waꞌnen a smuroal Jerusalén masantaꞌcꞌal bꞌey miman yeoc sat smuroal. 9 Jal junxa tujan jix scaꞌ waꞌne a naj Refaías, scꞌaal Hur; jaꞌton naj alcal yeoc yibꞌan nan tujan ebꞌ a conobꞌ Jerusalén. 10 Jal junxa tujan jix scaꞌ waꞌne a naj Jedaías, scꞌaal Harumaf, chi can bꞌey sattaj ecꞌtoj, jal junxa tujan, jix scaꞌ waꞌne a naj Hatús, scꞌaal naj Hasabnías.11 Jaꞌ naj Malquías scꞌaal Harim, cꞌal naj Hasub, scꞌaal Pahat-moab, jaꞌ ebꞌ tuꞌ jix caꞌ waꞌnen a junxa tujan yetoj jun torre chi yij Hornos. 12 Jal junxa tujan xin, jix scaꞌ waꞌne a naj Salum, scꞌaal Halohés. Jaꞌ naj tuꞌ alcal yeoc naj bꞌey nanxa tujan ebꞌ a Jerusalén. Jix colwa cꞌal pax ebꞌ ix scutzꞌin naj yetoj. 13 Jaꞌ naj Hanún yetoj ebꞌ caan bꞌey Zanóah, jaꞌ ebꞌ jix caꞌ waꞌnen a bꞌey eyoc spuertail jun panan acꞌal. Jix yaon oc spuertail ebꞌ, catuꞌ jix yaon oc chꞌen hierro ebꞌ smitxꞌbꞌaniloj, jaꞌ jun mulnail jix scaꞌ waꞌne a ebꞌ tuꞌ, ey 450 metro yeocoj, masantaꞌcꞌal jix apni oc bꞌey spuertail bꞌey chi bꞌet cancan kꞌalem. 14 Jaꞌ naj Malquías scꞌaal Recab, yaaw yeoc naj yibꞌan conobꞌ Bet-haquérem, jaꞌ naj tuꞌ jix caꞌ waꞌnen oc spuertail bꞌey chi bꞌet cancan kꞌalem, jix yaon oc wan chꞌen hierro smitxꞌbꞌaniloj spuertail tuꞌ.
15 Jaꞌ naj Salum scꞌaal Colhozé, yaaw yeoc naj bꞌey conobꞌ Mizpá, jaꞌ naj tuꞌ jix caꞌ waꞌnen oc spuertail bꞌey jaꞌ snukꞌ jaꞌ. Jix yaoc spatil yibꞌan, catuꞌ jix yaon oc spuertail cꞌal chꞌen hierro jix yaoc yin smitxꞌbꞌaniloj. Catuꞌ jix scaꞌ waꞌnen pax a smuroal chi ecꞌtoj yin scꞌul jun stanqueal yet jaꞌ chi yij Siloé bꞌey scawilal yawbꞌen teꞌ ebꞌ rey, masantaꞌcꞌal jix apni oc bꞌey chi eytoj skꞌoochal sbꞌeal conobꞌ David. 16 Jaꞌ naj Nehemías scꞌaal Azbuc, gobernador yeoc naj yibꞌan nan tujan conobꞌ Bet-sur, jaꞌ naj jix caꞌ waꞌnen a junxa tujan smuroal jix too tacꞌal bꞌey sattaj smujbꞌanil naj rey David masantaꞌcꞌal jix apni oc bꞌey chi yambꞌale jaꞌ jaꞌ, jix apni oc bꞌey scuartel ebꞌ soldado.
17 Jal junxa tujan mulnail jix scaꞌ waꞌne a ebꞌ Levita, jaꞌ naj Rehúm scꞌaal Baní jix ijbꞌan ebꞌ, yetoj cꞌal sattajto, jaꞌ naj Hasabías yaaw yeoc naj yibꞌan nan tujan conobꞌ Queilá. Jaꞌ naj tuꞌ jix caꞌ waꞌnen a junxa tujan muro sqꞌuexeloj ebꞌ yet conobꞌ. 18 Jal junxa tujan mulnail xin, jaꞌ ebꞌ yet mulnawomal sbꞌa yetoj, jaꞌ ebꞌ jix caꞌ waꞌnen aoj, jaxa naj Bavai scꞌaal Henadad, jaꞌ naj jix ijbꞌan ebꞌ, jaꞌ naj yaaw yeoc yibꞌan nanxa tujan ebꞌ conobꞌ a Queilá. 19 Jaꞌ naj Éser scꞌaal Josué, yaaw yeoc naj yibꞌan conobꞌ Mizpá, jaꞌ naj jix caꞌ waꞌnen a niꞌanxa bꞌey sattaj ecꞌtoj bꞌey chi yambꞌale oc chꞌen julbꞌal yet ebꞌ akꞌom jowal, masantaꞌcꞌal bꞌey xiquin ecꞌtoj. 20 Jix bꞌey cꞌaltoj xin, jaꞌ naj Baruc scꞌaal Zabai, jaꞌ naj jix caꞌ waꞌnen a junxa tujan smuroal chi ẍaꞌel yich bꞌey xiquin ecꞌtoj masantaꞌcꞌal jix apni oc bꞌey spuertail sna naj Eliasib, jaꞌton naj sat yakꞌomal xaambꞌal. 21 Jaꞌ naj Meremot scꞌaal Urías, yitxiquin naj Cos, jaꞌ naj jix caꞌ waꞌnen a junxa tujan muro tuꞌ, jix ẍaꞌel yich bꞌey spuertail sna naj Eliasib masantaꞌcꞌal bꞌey jix lawi yapni oc jun mulnail tuꞌ.
22 Jal junxa tujan muro jix bꞌey cꞌaltoj xin, jaꞌ ebꞌ yakꞌomal xaambꞌal caan bꞌey spananil acꞌal bꞌey jaꞌ Jordán, jaꞌ ebꞌ jix caꞌ waꞌnen aoj. 23 Jix bꞌey cꞌaltoj jun muro jix swaꞌne ebꞌ tuꞌ, jaxa naj Benjamín yetoj naj Hasub, jaꞌ ebꞌ jix caꞌ waꞌnen a smuroal bꞌey sattaj sna ebꞌ. Jix lawi tuꞌ xin, jaꞌ naj Azarías scꞌaal Maaseías, yitxiquin Ananías, jaꞌ naj jix caꞌ waꞌnen cꞌal pax a bꞌey scawilal sna. 24 Jal junxa tujan xin, jaꞌ naj Binuy scꞌaal naj Henadad, jaꞌ jix caꞌ waꞌnen aoj, jix ẍaꞌel yich bꞌey sna naj Azarías masantaꞌcꞌal jix apni oc bꞌey xiquin ecꞌtoj. 25 Jix bꞌey cꞌaltoj xin, jaꞌ naj Palal scꞌaal Usai, jaꞌ jix caꞌ waꞌnen a bꞌey sattaj ecꞌtoj xiquin yetoj jun torre miman yea steel bꞌey spalacio naj rey, sattaj eltoj stiꞌ na bꞌey chi teynele yu ebꞌ soldado. Jal junxa tujan xin, jaꞌ naj Pedaías, scꞌaal Parós jix caꞌ waꞌnen aoj, 26 masantaꞌcꞌal bꞌey sattaj spuertail bꞌey chi ecꞌ ebꞌ ánima iꞌo jaꞌ, chi too yetcꞌulal bꞌey chi too cꞌu, scawilal jun torre miman yea steel. Jaꞌton ebꞌ tiꞌ chi akꞌwi cꞌaltaꞌ servil bꞌey templo bꞌey Ófel. 27 Jaꞌ ebꞌ a Tecoa jix caꞌ waꞌnen a junxa tujan smuroal, jix ẍaꞌel yich sattaj torre masantaꞌcꞌal jix apni bꞌey smuroal Ófel.
28 Jal ebꞌ yakꞌomal xaambꞌal xin, jaꞌ ebꞌ jix caꞌ waꞌnen a smuroal bꞌey sattaj sna ebꞌ junjun, jix too tacꞌal bꞌey spuertail bꞌey chi octoj noꞌ che. 29 Jix bꞌey cꞌaltoj ebꞌ sattajto, jaxa naj Sadoc scꞌaal Imer, jaꞌ naj jix caꞌ waꞌnen a smuroal bꞌey sattaj sna. Jal junxa tujan xin, jaꞌ naj Semaías, scꞌaal Secanías, jaꞌ naj jix caꞌ waꞌnen aoj, jaꞌton naj tiꞌ chi teynen cꞌaltaꞌ spuertail yetcꞌulal bꞌey chi aol cꞌu. 30 Jaꞌ yet jix el cꞌaltoj txololoj ebꞌ yin jun mulnail tuꞌ, jaꞌ naj Hananías scꞌaal Selemías, yetoj Hanún, jaꞌton naj yet swaj yuninal naj Salaf, jix swaꞌne a jun tujan yet naj. Jaꞌ yet jix lawi swaꞌxi yet ebꞌ tuꞌ, jaxa naj Mesulam scꞌaal naj Berequías, jaꞌ naj jix caꞌ waꞌnen a jun tujan bꞌey sattaj sna. 31 Jal naj Malquías, naj chi mulna yin waꞌne chꞌen caw watxꞌ yili, jaꞌ naj jix caꞌ waꞌnen a smuroal masantaꞌcꞌal jix apni oc bꞌey sna ebꞌ chi akꞌwi servil bꞌey templo, cꞌal bꞌey sna ebꞌ txonwom, cꞌal sattaj puertail bꞌey eyoc ebꞌ chi majoni masantaꞌcꞌal bꞌey eyoc ebꞌ chi teynen bꞌey xiquintaj ecꞌtoj tuꞌ. 32 Jaꞌ ebꞌ naj chi mulna yin waꞌne chꞌen caw watxꞌ yili, yetoj ebꞌ naj txonwom, jaꞌ ebꞌ jix caꞌ waꞌnen a muro, jix el yich bꞌey chi teynele bꞌey xiquin ecꞌtoj masantaꞌcꞌal jix apni oc bꞌey spuertail bꞌey chi octoj noꞌ meꞌ.