—Chi cus ja cꞌul chi wilaꞌ. ¿Tzet cha wabꞌ syaꞌil? ¿Tumi ey bꞌey chi yaꞌbꞌi ey ja jolom? ¿Ey mi wal tzet eyecꞌ yin ja pixan? ẍi naj rey tuꞌ ey jin.

Jaꞌ yet jun txolan tuꞌ, jix jul jun miman xiwcꞌulal win. 3 Catuꞌ jix walon tet naj jaxca tiꞌ:

—¡Miman ojabꞌ cꞌal yeloc apnoj ja wopiso jaach rey! ¿Tzet wal yu, yuxan man oj cus jin cꞌul, yutol jaꞌ conobꞌ bꞌey mujan ebꞌ jin mam icham, tol etexnajtoj yetoj cꞌal smajil jun conobꞌ tuꞌ pilan tzꞌaꞌnajtoj? jin chi tet naj.

4 —¿Tzet watxꞌ chi yun jin colwa ja wetoj xin? ẍi naj rey tuꞌ ey jin.

Tuxa jix jin kꞌan scolwal naj sDiosal satcan yu jun tiꞌ, 5 yuxan jix jin takꞌwi tet naj rey jaxca tiꞌ:

—Ta chi ẍaꞌ jaꞌ cꞌul, ta watxꞌ jin yul ja sat, chin kꞌan ey jaach tol chin ja chaꞌtoj bꞌey conobꞌ Judá bꞌey mujan ebꞌ wichmam tuꞌ, catuꞌ chin caꞌ waꞌnen aoj, jin chi tet naj an.

6 Chotan ey naj rey, chotan cꞌal pax ey ix reina yin scꞌul naj, catuꞌ jix yalon naj jaxca tiꞌ:

—¿Jayebꞌ wal cꞌu chach too ecꞌ tituꞌ xin? ¿Bꞌakꞌin wal chach meltzo pax tej? ẍi naj ey jin.

Jix walon jantaj tiempo chin too ecꞌoj, jix ẍaꞌ scꞌul naj tzet jix jin kꞌan tet. 7 Jix walon junelxa tet naj rey jaxca tiꞌ: Ta chi skeꞌ wal cha wabꞌe, atoj junoj yuunal ey jin yet chi too tet ebꞌ naj gobernador ey skꞌaxepal ecꞌtoj jaꞌ miman jaꞌ Éufrates, yet watxꞌ chin chaꞌle ecꞌtoj yu ebꞌ masantaꞌcꞌal chin apni oc bꞌey conobꞌ Judá. 8 Catuꞌ chi too junojxa an juun tet naj Asaf, naj eyoc yilomaloj teꞌ teꞌ tituꞌ, yet watxꞌ chi skeꞌ yakꞌon teꞌ teꞌ naj ey jin, yet chi oc teꞌ spuertailoj na bꞌey ey ebꞌ chi teynen templo, cꞌal spuertailoj smuroal conobꞌ, cꞌal yoc teꞌ yinlaj na bꞌey oj jin caey ecꞌoj, jin chi tet naj. Yu swatxꞌcꞌulal jin Diosal wibꞌan, yuxan jix yakꞌ naj rey masanil tzet jix jin kꞌanaꞌ.

9 Jix yaontoj wan soldado naj rey eyoc yibꞌan che wetoj an, yetoj cꞌal syaawil ebꞌ. Jaꞌ yet jix jin apni oc scꞌatan ebꞌ eyoc yin gobernadoral bꞌey skꞌaxepal jaꞌ miman jaꞌ Éufrates,^a catuꞌ jix waontoj an carta jix yatej naj rey tuꞌ ey jin. 10 Ey cawan ebꞌ yaaw, jaꞌton naj Sambalat a Horón, yetoj naj Tobías yaaw yeoc xol ebꞌ a Amón, caw jix tit sjowal ebꞌ win, yutol chin apni oc colwa yetoj ebꞌ wet Israelal.

11 Yet xa yox cꞌual, jix jin apni oc bꞌey Jerusalén. 12 Jix jin a waan yet akꞌbꞌalil yetoj jaywan ebꞌ naj jaꞌjun wetoj an, cꞌam cꞌal junoj bꞌey jix walaꞌ tzet jix yaoc Dios yin jin naꞌbꞌal cꞌal tzet oj wun bꞌey Jerusalén. Ma xa kiꞌtoj wanxa noꞌ che, asanne xacꞌal noꞌ wijomal jix wiꞌtoj an. 13 Jaꞌ yet jun akꞌbꞌal tuꞌ, jix jin eltej bꞌey jun spuertail bꞌey spananil stiꞌ jun jobꞌe chi ecꞌtoj yetcꞌulal jaꞌ snukꞌ jaꞌ chi yij Dragón, jix jin ecꞌ cꞌal pax toj bꞌey spuertail bꞌey chi bꞌet cancan kꞌalem. Jaꞌ tituꞌ jix ecꞌ jin bꞌeytze smuroal conobꞌ Jerusalén, tuxa cꞌal wejan eyoj, cꞌal smajil conobꞌ tuꞌ, pilan tzꞌaꞌnajtoj. 14 Catuꞌ jix jin bꞌeytzen cꞌal spuertail bꞌey scawilal snukꞌ jaꞌ, yetoj cꞌal spila naj rey. Jaꞌ tituꞌ ma xa skeꞌ yecꞌtoj noꞌ wijomal tuꞌ. 15 Akꞌbꞌalil tocꞌal catuꞌ jix jin atoj bꞌey stiꞌlaj jaꞌ Cedrón, jix lawi cꞌal jin bꞌeytzen smuroal tuꞌ, catuꞌ jix jin meltzo octoj bꞌey spuertail jun panan acꞌal tuꞌ.

16 Man yotaj oj ebꞌ yaaw bꞌeytuꞌ jix jin toocoj, man pax yotaj ebꞌ tzet chi wunne. Cꞌam tocꞌal pax tzet jix wal tet ebꞌ wet Israelal, cꞌal tet ebꞌ yakꞌomal xaambꞌal, cꞌal tet ebꞌ ey yopiso, yetoj cꞌal tet ebꞌ mulnawom. 17 Jix lawi tuꞌ, jix walon tet ebꞌ jaxca tiꞌ:

—Jaex tiꞌ je yotaj sicꞌlebꞌil, tol caw pena yeoc cu conobꞌ Jerusalén tiꞌ, ilaꞌ tol makꞌbꞌil ey wejlabꞌoj smuroal, catuꞌ tzꞌaꞌnajtoj spuertail. Yuxan jaꞌ tinaniꞌ xin, titanwej junxane chi kutewej cu bꞌa, catuꞌ chi cu caꞌ waꞌnewej a smuroal cu conobꞌ Jerusalén tiꞌ, yet watxꞌ cꞌamxa chi cu tzeelei yu wanojxa conobꞌ, jin chi tet ebꞌ.

18 Jaꞌ yet jix walon tet ebꞌ jantaj swatxꞌcꞌulal Dios jix yakꞌ wibꞌan, yetoj cꞌal tzet jix yal naj rey ey jin, jix yalon ebꞌ jaxca tiꞌ:

—Cu chaꞌel yich cu waꞌnewej xin, ẍi ebꞌ. Yetoj stzalacꞌulal ebꞌ jix yiptzelen sbꞌa ebꞌ yin jun mulnail tiꞌ. 19 Jaꞌ yet jix yabꞌen naj Sambalat a Horón cꞌal naj Tobías, yaaw yeoc bꞌey Amón, cꞌal yetoj Guésem naj a Árabe, caw jix bꞌuchwa ebꞌ naj kin, jix yalon ebꞌ jaxca tiꞌ ey jon:

—¿Tzet chi yun je yaloni? ¿Ma tol che yoche che yiꞌtej junoj pena naꞌbꞌale yin naj rey? ẍi ebꞌ.

20 Catuꞌ jix jin takꞌwi tet ebꞌ, jix walon jaxca tiꞌ:

—Yetoj wal scolwal Dios ey bꞌey satcan, yuxan oj skeꞌ ku jon. Jaon ẍejabꞌ tiꞌ jon, oj cu chaꞌel yich cu caꞌ waꞌnen a jon, jal jex jaex tiꞌ xin, cꞌam je yalon je yet yin, cꞌam bꞌey oj jex cu kꞌanbꞌalne, yutol man ket conobꞌoj cu bꞌa je yetoj, jin chi tet ebꞌ.