Eyxa 20 abꞌil yoc naj Artajerjes yin reyal, yet xꞌaaw Quisleu, jain Nehemías jin tiꞌ, jaꞌ bꞌey conobꞌ Susa, jaꞌton miman conobꞌ yeoc yibꞌan conobꞌ Persia, jaꞌ tituꞌ ey jin ecꞌoj. 2 Jaꞌ yet jix apni oc jun wuẍtaj chi yij Hananí yetoj wanxa ebꞌ jix tit bꞌey Judá. Catuꞌ jix jin kꞌanlen tet ebꞌ tzet utbꞌil yeoc conobꞌ Jerusalén, yetoj cꞌal ebꞌ bꞌetnaj ecꞌ yin yakꞌomal servil bꞌey Babilonia. 3 Jix yalon ebꞌ ey jin jaxca tiꞌ: Jaꞌ ebꞌ ja wet conobꞌ eyecꞌ bꞌey Judá, caw yaꞌtaj yeoc ebꞌ, caw qꞌuixwiltaj yeoc ebꞌ tet wanxa conobꞌ. Jal conobꞌ Jerusalén xin, makꞌbꞌil ey wejlabꞌoj smuroal, catuꞌ tzꞌaꞌnajtoj smajil bꞌey chi cu octoj, ẍi ebꞌ.

4 Jaꞌ yet jix wabꞌen jaxca tuꞌ an, jix jin ey chotanoj catuꞌ jix jin okꞌ sicꞌlebꞌil. Ecꞌal cꞌual jix jin cusi, jix wijle nocha jin bꞌa, catuꞌ jix jin txali tet Naj sDiosal satcan. 5 Jix walon yin jin txa jaxca tiꞌ: Jaach Jehová, sDiosal jaach satcan, tol miman yeoc ja wipal, smoo chi xiw ebꞌ ánima ey jaach, yutol cha wakꞌ eloc bꞌey cha wakꞌcan ja tiꞌ, caw chi okꞌ ja cꞌul yin ebꞌ chach camcꞌulneni, cꞌal ebꞌ chi jijen ja chejbꞌanil. 6 Tinaniꞌ, chin kꞌan ey jaach, tol cha chaꞌ ja wabꞌ jin txa jain ja chejabꞌ jin tiꞌ. Junjun cꞌal cꞌu junjun cꞌal akꞌbꞌal chin oc tean ja win, yet chi walon ey jaach yu ja conobꞌ Israel tiꞌ, yutol caw ja chejabꞌ keoc jon. Chi wal jin penail ey jaach yetoj ebꞌ wet conobꞌ tiꞌ. Yel toni, jaon tiꞌ yetoj ebꞌ cu mam icham jon, caw jix oc cu penail ey jaach. 7 Caw yel xacꞌal pena jix kute cu bꞌa ja sattaj, ma cu jije ja chejbꞌanil, cꞌal wan ja ley yetoj wan cuybꞌanile jix yal can naj ja chejabꞌ Moisés ey jon. 8 Yuxan jaꞌ tinaniꞌ xin, naꞌtej ja kꞌane jix ja wal can tet ja chejabꞌ Moisés: Ta man oj je jije tzet jix walaꞌ, oj jex wujte sajlemtoj bꞌey masanil yul yibꞌankꞌinal tiꞌ; 9 ta tol chex meltzo pax tej ey jin junelxa xin, catuꞌ che jijen jin chejbꞌanil tiꞌ, catuꞌ che bꞌeybꞌalne, caxcꞌal mi sajleminaj je ye cantoj bꞌey masanil yul yibꞌankꞌinal tiꞌ, oj jex jin yambꞌa pax tej junelxa bꞌey jun je txꞌotxꞌ tol sicꞌbꞌil el wu, bꞌey chi oc eyilal ey jin, ja chi tet naj ja chejabꞌ Moisés.

10 Jaon tiꞌ ja chejabꞌ keoc jon, ja conobꞌ jon pax oj, jaach colnen jon el yetoj ja wipal. 11 Jaach jin Diosal, chin kꞌan ey jaach tol cha chaꞌ ja wabꞌ jin txa jain ja chejabꞌ jin tiꞌ, cꞌal yetoj wanxa ebꞌ ja chejabꞌ, tol chi yoche cu cꞌul chi kiꞌa can ja bꞌi. Catuꞌ chin kꞌanon ey jaach tol cha wakꞌ ja watxꞌcꞌulal wibꞌan an, yet watxꞌ oj ẍaꞌ yabꞌ naj rey tzet oj walaꞌ, jin chi yin jin txa.

Jaxca tuꞌ jix wute waloni, yutol ey jin oc sbꞌatxomaloj svaso naj rey Artajerjes.