3 Jaꞌ yet jix wabꞌen wan kꞌane tuꞌ jix jin tzilontoj jin pichil, catuꞌ jix jin jatzon el niꞌoj xil jin jolom cꞌal xil jin tiꞌ, yu jin txꞌoxon el jin cuscꞌulal, catuꞌ jix jin ey chotanoj, cꞌamxa chi naꞌcha wu tzet chi wunne. 4 Ey wanxa ebꞌ jix syambꞌa oc sbꞌa wetoj, catuꞌ jix jin ey chotan yetoj ebꞌ, jaꞌton ebꞌ chi xiw yu skꞌane Dios, bꞌey yalnaj can Dios yin spenail ebꞌ wet Israelal. Jal jin jain tiꞌ xin, chotan jin eyoj yin tol cꞌamxa chi naꞌcha wu tzet chi wute jin bꞌa, masantaꞌcꞌal chi oc yorail yakꞌle xaambꞌal yet yeycꞌualil. 5 Jaꞌ yet jun txolan tuꞌ, jix jin a waan bꞌey chotan jin ey tuꞌ, caw chi cus jin cꞌul, catuꞌ jix jin ey caan txaloj tet Jehová, cꞌal wiꞌon a jin kꞌabꞌ sattaj Jehová jin Diosal, yetoj cꞌal jin pichil tzilquiltaj yoqui. 6 Jix walon yin jin txa jaxca tiꞌ: Jaach jin Diosal, caw wal chin qꞌuixwi ey jaach, pena xacꞌal chi wabꞌe, cꞌamxa chi naꞌcha wu tzet chi wute walon jin bꞌa ey jaach, yutol yel xacꞌal jix ecꞌbꞌantoj cu penail jon. Jaꞌ cu penail jix oc ey jaach jix a taꞌcꞌal apnoj bꞌey satcan. 7 Yet tax cꞌal stiempoal ebꞌ kichmam jon, masantaꞌcꞌal tinaniꞌ, caw wal ey jon cꞌal oc yin spenail jon. Jix cu ale oc yul skꞌabꞌ sreyal wanxa nación yetoj ebꞌ cu reyal cꞌal ebꞌ yakꞌomal cu xaambꞌal jon, yu cꞌal wal cu penail yetoj ebꞌ jon. Yuxan jix cu akꞌle cam jon, jix cu iꞌletoj yin yakꞌomaloj servil, jix elkꞌanele eltoj cu tzetyetal jon, caw qꞌuixwiltaj jix cu utele jon, jaxca wal keoc tinaniꞌ jon. 8 Jaxa tinaniꞌ xin, jaach Jehová cu Diosal, jaꞌ yu ja camcꞌulal yuxan iquis jon to ecꞌ jaywan jon xa jon, yuxan chi skeꞌ cu kaey ecꞌ junelxa sat txꞌotxꞌ txꞌotxꞌ tol ja wet yeocoj. Jaach jix ja wakꞌ cu tzalacꞌulal junelxa, yet jix cu eltej yin yakꞌomaloj servil. 9 Caxcꞌal mi jix cu oc yin yakꞌomaloj servil jon, ma cꞌaltaꞌ jon ja bꞌejcan bꞌey ey jon oc yin yakꞌomaloj servil tuꞌ, yutol caw ey ja camcꞌulal kin jon. Jix jaach kꞌanabꞌ oc yin snaꞌbꞌal ebꞌ sreyal Persia, tol watxꞌ jix yute snaꞌbꞌal ebꞌ kin jon. Jix ja wakꞌ cu cawil yet jix cu caꞌ waꞌnen a ja templo tol uchchanajtoj, jix jon ja teyne bꞌey Judá cꞌal bꞌey Jerusalén tiꞌ.

10 Jaxa tinaniꞌ jaach cu Diosal, ¿tzet to wal chi yun kalon ey jaach yu jun cu penail jix oc ey jaach? Caw ma cu jije ja chejbꞌanil. 11 Jaꞌ ebꞌ ja chejabꞌ jix alon ey jon, tol jaꞌ jun txꞌotxꞌ tol jix ja wakꞌ ey jon, caw ey spenail chi yun ebꞌ ánima eyecꞌ titiꞌ, jaxca tol caw tzꞌiltaj jun txꞌotxꞌ tiꞌ yu ebꞌ. Caw nonaj yu spenail ebꞌ nación tiꞌ. 12 Yetoj cꞌal pax oj jix ja wal ey jon tol cꞌam chi kakꞌ nupoj ebꞌ ix cu cutzꞌin yetoj scꞌaal ebꞌ, tam wal ebꞌ cu cꞌaal chi kakꞌ nupoj yetoj scutzꞌin ebꞌ. Jix ja walon cꞌal pax oj tol cꞌam chi cu colwa yetoj ebꞌ ánima tuꞌ yin yal cꞌal tzetyetal, yet watxꞌ tecꞌan cꞌal chi kute cu bꞌa bꞌey jun conobꞌ tiꞌ, yet chi cu oc bꞌeomal jon, catuꞌ chi kakꞌon tzalabꞌoj cu cꞌul yetoj ja watxꞌcꞌulal, yet watxꞌ chi cancan txꞌotxꞌ tet ebꞌ kicꞌaal yin junelne.

13 Caw miman cu penail jix oc ja sattaj, yuxan jix ecꞌtoj wan syaꞌtajilal tiꞌ kibꞌan jon, jaach cu Diosal, caw txenne jix yun ja waon oc syaꞌilal kibꞌan jon, man wal jaxca oj smooal chi cu chaꞌ yu cu penail jix oc ey jaach. Jix el to wal yin ja cꞌul tol chi cu iquisbꞌi ecꞌ jaywanojxa jon. 14 Jix oc cu penail ey jaach junelxa, caw ma cu jije ja chejbꞌanil, yutol jix cu nupi yetoj wan ánima caw pena sbꞌeybꞌal tuꞌ. ¿Tumi man oj tit ja jowal kin jon, catuꞌ chon ja wakꞌon qꞌueyeloj? Smoo xacꞌal mi tol cꞌamxa junoj jon chi skeꞌ kiquisbꞌi can ecꞌ jon.

15 Jaach Jehová cu Diosal, jaon Israel jon tiꞌ, caw wal watxꞌ ja naꞌbꞌal kin, yutol jix el yin ja cꞌul tol chi cu iquisbꞌi can ecꞌ jaywanojxa jon. Yu jun tuꞌ xin, chi kalatej cu penail ja sattaj, catuꞌ caw man smoo oj chi cu jul ja sattaj, ẍi naj Esdras tet Dios yin xa.