Jix Iꞌle El Ebꞌ Ix Ix Txꞌoj Conobꞌal Xol Ebꞌ
10
Jaꞌ yet jix txali naj Esdras tet Dios yu yalon atej spenail naj cꞌal yu spenail ebꞌ conobꞌ, caw chi okꞌ naj, caan ey naj sattaj stemplo Dios, jix oc joyan jun miman bꞌulan ebꞌ yet Israelal yin, ebꞌ winaj, ebꞌ ix ix, cꞌal ebꞌ unin. Caw wal chi okꞌ ebꞌ masanil yetoj naj. 2 Jix lawi tuꞌ, jaꞌ naj Secanías scꞌaal Jehiel yicꞌaal Elam, jix kꞌanabꞌ tet naj Esdras jaxca tiꞌ, jix yaloni: Jaon tiꞌ caw wal man jijemoj jon tet cu Diosal, yutol jix cu nupi yetoj ebꞌ ix ix txꞌoj conobꞌal, ebꞌ txꞌoj sdiosal, asan xin, eyto wal tzet watxꞌ chi skeꞌ kuneni yet chi cu waꞌne oc cu bꞌeybꞌal sattaj Dios, yet watxꞌ chi yakꞌ mimancꞌulal cu Diosal kin. 3 Jaꞌ tinaniꞌ, oj kꞌakꞌ cu tiꞌ tet Dios tol oj cu chej paxtoj ebꞌ ix kistil txꞌoj conobꞌal yetoj cꞌal yuneꞌ ebꞌ ix, oj cu jije tzet cha walaꞌ, jaxca wanxa ebꞌ chi jijen ẍejbꞌanil Dios ja wetoj. Caw oj cu jije jaxca tzet chi yal ẍejbꞌanil Dios. 4 Yu jun tuꞌ xin, aan waanoj. Yutol ey ja walon ja wet yet cha waꞌnen yeoc jun tiꞌ. Oj cu colwa ja wetoj. Akꞌ ja wip, oc ojabꞌ ip yin jun kꞌane tiꞌ, ẍi ebꞌ.5 Jix lawi tuꞌ, jix a waan naj Esdras, jix yakꞌon stiꞌ ebꞌ sattaj Dios tet naj, tol chi yun jaxca jix yal naj Secanías. Yuxan jix yakꞌ stiꞌ ebꞌ yakꞌomal xaambꞌal, ebꞌ Levita, cꞌal ebꞌ yet Israelal, tol oj sjije ebꞌ tzet chi yal ẍejbꞌanil Dios. 6 Jal naj Esdras xin, jix el naj bꞌey sattaj stemplo Dios, jix too naj bꞌey scuarto naj Johanán, jaꞌton scꞌaal Eliasib. Jaꞌ tituꞌ jix ecꞌ jun akꞌbꞌal yu naj, cꞌam tzet jix sloꞌ cꞌam pax tzet jix yuqꞌueꞌ, yutol caw wal chi cus scꞌul yu spenail ebꞌ meltzonajtej yin yakꞌomaloj servil bꞌey Babilonia.
7 Jix lawi tuꞌ, jix awtele masanil ebꞌ ánima ey bꞌey Judá cꞌal bꞌey Jerusalén, yet chi syambꞌa oc sbꞌa ebꞌ bꞌey Jerusalén tiꞌ, masanil ebꞌ bꞌetnaj ecꞌ yin yakꞌomaloj servil bꞌey Babilonia. 8 Ta ey mactxequel cꞌam chi apni oc yin yet yox cꞌual, jatacꞌalaꞌ jix yun yalon ebꞌ yaaw cꞌal ebꞌ akꞌom naꞌbꞌale, tol chi iꞌle ecꞌ xꞌotxꞌ ebꞌ, catuꞌ chi iꞌle el ebꞌ xol ebꞌ meltzonajtej yin yakꞌomaloj servil tuꞌ. 9 Yu jun tuꞌ xin, jaꞌ yet yox cꞌual tuꞌ jix syambꞌa oc sbꞌa masanil ebꞌ bꞌey Jerusalén, ebꞌ winaj yet Judá cꞌal ebꞌ yet Benjamín, jaꞌton yet 20 yoc yet sbꞌalonebꞌ xꞌaaw. Jix apni oc ebꞌ xin, catuꞌ jix ey chotan ebꞌ sattaj stemplo Dios; caw wal chi bꞌilwi ebꞌ yu xiwcꞌulal yu jun kꞌane tuꞌ, cꞌal yu jun nabꞌ chi eyi. 10 Jix lawi tuꞌ xin, jix a waan Esdras, naj yakꞌomal xaambꞌal jix yalon tet ebꞌ jaxca tiꞌ:
—Jaex tiꞌ jix oc je mul yutol jix je yiꞌle je bꞌa yetoj ebꞌ ix ix txꞌoj conobꞌal. Queytuꞌ jix yun stit spenail kibꞌan jaon Israel jon tiꞌ. 11 Yu jun tuꞌ xin, alwej atej je mul sattaj sDiosal ebꞌ cu mam icham, catuꞌ che jijen jaxca tzet chi yoche Dios. Poꞌowej el je bꞌa xol ebꞌ ánima txꞌoj conobꞌal caan cu cawilal tiꞌ, catuꞌ che bꞌejon can ebꞌ ix ix txꞌoj conobꞌal tuꞌ, ebꞌ ix eyoc je yistiloj tinaniꞌ, ẍi naj Esdras tet ebꞌ.
12 Caw ip jix yun yel yaw masanil ebꞌ ánima yaman ecꞌ tituꞌ, jix yalon ebꞌ jaxca tiꞌ:
—Oj cu jije kunen jaxca cha wal tuꞌ, ẍi ebꞌ. 13 Lalantocꞌal pax yakꞌon nabꞌ. Cꞌam chi skeꞌ cu can bꞌey yul calle tiꞌ, yutol jaꞌ jun kꞌane tiꞌ, man asanne jun caabꞌoj cꞌu oj yiꞌtoj, yutol ecꞌal jon jix oc cu mul. 14 Watxꞌ mi ta tol asan ebꞌ cu yaawil chi cancan titiꞌ yin swaꞌnen yeoc jun kꞌane tiꞌ; jal masanil mactxequel caan bꞌey yul-laj cu conobꞌal tiꞌ, ebꞌ tol jix yiꞌle sbꞌa yetoj ebꞌ ix ix txꞌoj conobꞌal tuꞌ, chi skeꞌ sjul ebꞌ yet junoj cꞌual tol txequel chi yun canoj, iꞌbꞌil ojabꞌ oc ebꞌ yu ebꞌ juez, cꞌal yu ebꞌ icham winaj yeoc yul conobꞌ tiꞌ. Queytuꞌ oj kun cu masanil, masantaꞌcꞌal oj lawoj ecꞌ sjowal scꞌul Dios kibꞌan syaꞌiloj jun kꞌane tiꞌ, ẍi ebꞌ.
15-16 Jaꞌ masanil ebꞌ meltzonajtej yin yakꞌomal servil tuꞌ, jix ẍaꞌ scꞌul ebꞌ jun kꞌane tuꞌ, asan naj Jonatán scꞌaal Asael, yetoj Jahasías scꞌaal Ticvá, ma ẍaꞌ scꞌul jun naꞌbꞌale tuꞌ ebꞌ. Jix oc cꞌal pax Mesulam, cꞌal naj Sabtai jun Levita yetoj ebꞌ. Yu jun tuꞌ, yuxan jix ale oc wan ebꞌ yaaw yeoc xol ebꞌ yicꞌaal Esdras, naj yakꞌomal xaambꞌal. Jaꞌton yet sbꞌabꞌel cꞌual yet laonebꞌ xꞌaaw, jaꞌ masanil ebꞌ jix yaoc yin yopiso tuꞌ, jix syambꞌa oc sbꞌa ebꞌ yul despacho yu snaꞌon ebꞌ yibꞌan jun kꞌane tuꞌ. 17 Jaꞌ yet sbꞌabꞌel cꞌual yet bꞌabꞌel xꞌaaw, jaꞌ yet tuꞌ jix lawi snaꞌle oc yin masanil ebꞌ jix yiꞌle sbꞌa yetoj ebꞌ ix ix txꞌoj conobꞌal tuꞌ.
18 Jaꞌton slistail ebꞌ jix yiꞌle sbꞌa yetoj ebꞌ ix ix txꞌoj conobꞌal tuꞌ: Jaꞌ xol ebꞌ yakꞌomal xaambꞌal cꞌal xol ebꞌ yicꞌaal Josué, scꞌaal Josadac: Jaꞌton naj Maaseías, Eliézer, Jarib cꞌal Guedalías. 19 Jaꞌ ebꞌ tuꞌ jix yakꞌ stiꞌ ebꞌ, yet chi yakꞌ paxtoj yistil ebꞌ tuꞌ, jix yakꞌon junjun noꞌ icham meꞌ ebꞌ yin ofrendail yu spenail ebꞌ tuꞌ.
20 Jaꞌ xol ebꞌ yicꞌaal Imer: Jaꞌton naj Hananí cꞌal Zebadías.
21 Jaꞌ xol ebꞌ yicꞌaal Harim: Jaꞌton naj Maaseías, Elías, Semaías, Jehiel yetoj naj Uzías.
22 Jaꞌ xol ebꞌ yicꞌaal Pashur: Jaꞌton naj Elioenai, Maaseías, Ismael, Natanael, Jozabad cꞌal naj Elasá.
23 Jaꞌ xol ebꞌ yicꞌaal ebꞌ Levita: Jaꞌton naj Jozabad, Simí, Kelaía, (jacꞌal oc chi yij Quelitá) Petahías, Judá cꞌal Eliézer.
24 Jaꞌ xol ebꞌ chi bꞌitni: Jaꞌton Eliasib. Jal xol ebꞌ chi teynen puerta: Jaꞌton naj Salum, Télem, cꞌal Urí.
25 Jaꞌ xol wanxa ebꞌ yet Israelal, jaꞌton ebꞌ tiꞌ jix nupi yetoj ebꞌ ix txꞌoj conobꞌal tuꞌ. Jaꞌ xol ebꞌ yicꞌaal Parós: Jaꞌton naj Ramías, Jezías, Malquías, Mijamín, Eleazar, Malquías, cꞌal Benaías.
26 Jaꞌ xol ebꞌ yicꞌaal Elam: Jaꞌton naj Matanías, Zacarías, Jehiel, Abdí, Jeremot cꞌal Elías.
27 Jaꞌ xol ebꞌ yicꞌaal Zatú: Jaꞌton naj Elioenai, Eliasib, Matanías, Jeremot, Zabad cꞌal Azizá.
28 Jaꞌ xol ebꞌ yicꞌaal Bebai: Jaꞌton Johanán, Hananías, Zabai cꞌal Atlai.
29 Jaxa xol ebꞌ yicꞌaal Baní: Jaꞌton Mesulam, Maluc, Adaías, Jasub, Seal cꞌal Ramot.
30 Jaꞌ xol ebꞌ yicꞌaal Pahat-moab: Jaꞌton naj Adná, Quelal, Benaías, Maaseías, Matanías, Besalel, Binuy cꞌal Manasés.
31 Jaꞌ xol ebꞌ yicꞌaal Harim: Jaꞌton Eliézer, Isías, Malquías, Semaías, Simeón. 32 Benjamín, Maluc cꞌal Semarías.
33 Jaꞌ xol ebꞌ yicꞌaal Hasum: Jaꞌton naj Matenai, Matatá, Zabad, Elifélet, Jeremai, Manasés cꞌal Simí.
34 Jaꞌ xol ebꞌ yicꞌaal Baní: Jaꞌton Madai, Amram, Uel, 35 Benaías, Bedías, Queluhu, 36 Banías, Meremot, Eliasib, 37 Matanías, Matenai cꞌal Jaasai.
38 Jaꞌ xol ebꞌ yicꞌaal Binuy: Jaꞌton Simí, 39 Selemías, Natán, Adaías, 40 Macnadbai, Sasai, Sarai, 41 Azarel, Selemías, Semarías, 42 Salum, Amarías cꞌal José.
43 Jaꞌ xol ebꞌ yicꞌaal Nebo: Jaꞌton Jeiel, Matatías, Zabad, Zebiná, Jadau, Joel cꞌal Benaías.
44 Jaꞌton ebꞌ tiꞌ jix yiꞌle sbꞌa yetoj ebꞌ ix txꞌoj conobꞌal tuꞌ, ey ebꞌ naj eyxa yuninal yetoj ebꞌ ix ix tuꞌ.