15 Jain Esdras jin tiꞌ, jix jin yambꞌa oc ebꞌ tiꞌ bꞌey stiꞌ jaꞌ jaꞌ chi yij Ahavá. Oxebꞌ cꞌual jix cu ecꞌ tituꞌ. Jaꞌ yet jix jin kꞌanlen ecꞌ xol ebꞌ ánima tuꞌ, cꞌal ebꞌ yakꞌomal xaambꞌal, cꞌam junoj ebꞌ Levita jix ilcha wu an. 16 Yuxan jix jin yambꞌa oc ebꞌ miman yeloc apnoj yin yopiso, jaꞌton ebꞌ tiꞌ: Eliézer, Ariel, Semaías, Elnatán, Jarib, Elnatán, Natán, Zacarías cꞌal Mesulam, yetoj cꞌal pax ebꞌ cuywam jaꞌton: Joiarib yetoj Elnatán. 17 Jix jin chejontoj ebꞌ yet chi too il-le ecꞌ naj Idó yu ebꞌ, jaꞌton naj yaaw yeoc bꞌey jun conobꞌ chi yij Casifiá. Jix walon masanil tzetyetal tol sowalil chi al-le tet naj Idó tuꞌ, cꞌal tet masanil ebꞌ eyecꞌ yetoj tituꞌ, yetoj masanil ebꞌ yicꞌaal, jaꞌton ebꞌ chi akꞌwi servil bꞌey stemplo Dios, ebꞌ Levita caan bꞌey Casifiá tuꞌ, yet watxꞌ chi yiꞌtej jaywanojxa ánima chi colwa ebꞌ ketoj bꞌey stemplo cu Diosal tiꞌ. 18 Caw chi wal yu diosalil tet Dios, yuxan jix chejletej naj Serebías yu ebꞌ, yutol jaꞌ jun winaj tuꞌ caw wal jelan, yicꞌaal jun Levita chi yij Mahli. Jaꞌ jun tuꞌ titnaj cꞌal yetoj yuninal yetoj cꞌal yuẍtaj. Ey 18 ebꞌ yin masanil. 19 Catuꞌ jix yiꞌon cꞌal pax tej naj Hasabías ebꞌ cꞌal naj Isaías. Jaꞌ ebꞌ tuꞌ yicꞌaal Merarí ebꞌ; ey 20 ebꞌ yin masanil yetoj yuninal, yetoj cꞌal yuẍtaj ebꞌ.

20 Jix jul cꞌal pax 220 ebꞌ chi akꞌwi servil bꞌey templo. Jaꞌ ebꞌ tuꞌ yicꞌaal ebꞌ akꞌbꞌil can oc yu naj rey David, yetoj ebꞌ eyoc yin yaawilal yet chi colwa ebꞌ Levita yin smulnail. Masanil ebꞌ tiꞌ, tzꞌibꞌebꞌil sbꞌi ebꞌ yin jun lista tuꞌ.

21 Jix lawi tuꞌ, jix walon tet ebꞌ wet conobꞌ jaxca tiꞌ: Jaꞌ tinaniꞌ tol chi kijlewej nocha cu bꞌa, catuꞌ chi cu txali tet Dios bꞌey stiꞌ jaꞌ jaꞌ chi yij Ahavá, yet watxꞌ chi kiꞌey cu bꞌa sattaj cu Diosal, cꞌal yu cu kꞌanon tet tol chi cu yiꞌtoj Naj yin tzalacꞌulal bꞌey Jerusalén, yetoj ebꞌ kuninal cꞌal yetoj masanil tzetyetal ey, ey jon. 22 Jain tiꞌ jix jin qꞌuixwi jin kꞌanon ebꞌ soldado tet naj rey, ebꞌ soldado chi bꞌeyi, yetoj cꞌal ebꞌ soldado chi oc yibꞌan che, yet chi cu steynen ebꞌ yul-laj bꞌe tet ebꞌ pena snaꞌbꞌal. Ilaꞌ tol xax wal tet naj rey, tol jaꞌ cu Diosal chi teynen mactxequel ebꞌ chi yal sbꞌa tet Dios, jal pax ebꞌ chi bꞌejon can Dios xin, chi yatej sjowal scꞌul yibꞌan ebꞌ. 23 Yu tuꞌ xin, yuxan jix kijlewej nocha cu bꞌa yu cu txali tet Dios. Caw wal jix yabꞌ cu txa Naj.

24 Jix lawi tuꞌ, jix jin sicꞌon el lacawan ebꞌ yaaw yeoc xol ebꞌ yakꞌomal xaambꞌal, jaꞌton: Serebías, Hasabías yetoj laonwanxa jaꞌjun yetoj ebꞌ. 25 Jix lawi tuꞌ, catuꞌ jix wechen chꞌen plata cꞌal chꞌen oro yetoj chꞌen mitxꞌkꞌabꞌe, jaꞌton chꞌen jix yakꞌ naj rey tet ebꞌ, yetoj ebꞌ chi akꞌon snaꞌbꞌal naj, yetoj cꞌal ebꞌ eyoc yin yopiso, yetoj pax ebꞌ ket Israelal eyecꞌ tituꞌ. Jix wakꞌ wan saꞌbꞌeal ebꞌ tuꞌ yu chi oc bꞌey stemplo cu Diosal yul skꞌabꞌ ebꞌ lacawan yakꞌomal xaambꞌal tuꞌ. 26 Jix weche chꞌen plata jix wakꞌon tet ebꞌ: Ey 500 quintal chꞌen plata yetoj wan mitxꞌkꞌabꞌe tol plata cꞌal eloj, 75 quintal yalil, yetoj 75 quintal chꞌen oro; 27 yetoj 20 chꞌen secꞌ oro cꞌal eloj, ey 17 libra yalil junjun chꞌen, yetoj caabꞌ mitxꞌkꞌabꞌe bronce cꞌal eloj caw wal watxꞌ yili, laan stool jaxca chꞌen oro.

28 Jix lawi tuꞌ, jix walon tet ebꞌ jaxca tiꞌ: Jaex tiꞌ sicꞌbꞌil jex xa el yu je yakꞌon servil Dios, yetoj cꞌal pax chꞌen oro, cꞌal chꞌen plata, yetoj cꞌal masanil mitxꞌkꞌabꞌe tol jix akꞌle yin saꞌbꞌeal tet Jehová, jaꞌton cu Diosal yetoj ebꞌ kichmam. 29 Teynewej cꞌal chꞌen masantaꞌcꞌal chi echele chꞌen sattaj ebꞌ syaawilal ebꞌ yakꞌomal xaambꞌal, cꞌal sattaj ebꞌ Levita, yetoj cꞌal sattaj ebꞌ yaaw yeoc xol ebꞌ ket Israelal, jaꞌton bꞌey yul-laj wan cuarto bꞌey stemplo Jehová bꞌey Jerusalén, jin chi tet ebꞌ. 30 Queytuꞌ jix yun ẍaꞌon chꞌen plata cꞌal chꞌen oro ebꞌ yakꞌomal xaambꞌal cꞌal ebꞌ Levita, yetoj cꞌal mitxꞌkꞌabꞌe tol xax echele tuꞌ, yu yiꞌontoj ebꞌ bꞌey Jerusalén bꞌey stemplo Jehová cu Diosal.

31 Jaꞌ yet 12 yoc bꞌabꞌel xꞌaaw, jix cu el bꞌey stiꞌ jaꞌ jaꞌ chi yij Ahavá yet jix cu too xacꞌal bꞌey Jerusalén tuꞌ. Jaꞌ cu Diosal jix cu colon el tet ebꞌ pena snaꞌbꞌal, cꞌal tet ebꞌ elkꞌom bꞌey yul-laj bꞌe. 32 Jaꞌ yet jix cu jul bꞌey Jerusalén tiꞌ, oxebꞌ cꞌu jix cu xewi. 33 Jaxa yet scan cꞌual, jix cu too bꞌey stemplo cu Diosal yet chi echele chꞌen plata cꞌal chꞌen oro, yetoj cꞌal jantaj wan mitxꞌkꞌabꞌe yet stemplo cu Diosal. Jix lawi tuꞌ, jix akꞌle tet ebꞌ naj yakꞌomal xaambꞌal chi yij Meremot, scꞌaal Urías. Ey cꞌal pax ecꞌ naj Eleazar yetoj, jaꞌton scꞌaal Finees, yetoj ebꞌ Levita, jaꞌton Jozabad scꞌaal Josué, yetoj Noadías scꞌaal Binuy. 34 Jaꞌ yet jun cꞌual tuꞌ, jix echelei catuꞌ jix bꞌisle masanil, tzꞌajan sbꞌisil masanil; catuꞌ jix stzꞌibꞌelecan yul an juun.

35 Jix lawi tuꞌ xin, cu masanil jaon jix cu meltzotej yin yakꞌomal servil bꞌey Babilonia, jix kakꞌon tzꞌaꞌ cu xaambꞌal tet cu Diosal jaon Israel jon tiꞌ. Jix akꞌle lacawcꞌon noꞌ achꞌe wacax, 96 noꞌ icham meꞌ, 77 noꞌ achꞌe meꞌ, yetoj cꞌal pax lacawcꞌon noꞌ icham chiw, yu xaambꞌal yu yakꞌle tan spenail. Masanil wan tuꞌ jix akꞌle tzꞌaꞌ sattaj Jehová. 36 Jix lawi tuꞌ, jix aletoj an juun yet naj rey tet ebꞌ eyoc yin yaawil bꞌey skꞌaxepal ecꞌtej jaꞌ Éufrates, yuxan jaꞌ ebꞌ jix colwa ketoj yin mulnail yin stemplo cu Diosal.