11 Jaꞌton jun scopiail an juun jix yakꞌ naj rey Artajerjes tet naj yakꞌomal xaambꞌal chi yij Esdras, tol caw cuywinaj yin sley Jehová, cꞌal chejbꞌanile akꞌbꞌil can tet ebꞌ Israel:

12 Jain Artajerjes jin, syaawil ebꞌ rey weocoj, chi wakꞌ scawil ja cꞌul jaach Esdras, yakꞌomal jaach xaambꞌal catuꞌ cuywam jaach pax oj, caw wal cuywinaj jaach yin sley naj sDiosal satcan.

13 Jix wal tet masanil ebꞌ Israel eyecꞌ bꞌey yul jin nación tiꞌ, ta chi yal scꞌul ebꞌ chi too ebꞌ bꞌey Jerusalén ja wetoj, jaxca ebꞌ yakꞌomal xaambꞌal yetoj cꞌal ebꞌ Levita, chi skeꞌ stoo ebꞌ. 14 Yutol jain rey jin tiꞌ, yetoj ebꞌ jujwan yaomal oc jin naꞌbꞌal, jix swa al-lne ebꞌ wetoj, tol chach cu chejtoj yu to ja wiloni tzet yeoc conobꞌ Judá cꞌal bꞌey Jerusalén, lalan mi wal sjijen ebꞌ ẍejbꞌanil Dios tol eyoc yul ja kꞌabꞌ. 15 Iꞌtoj chꞌen plata tiꞌ yetoj cꞌal chꞌen oro chi el wal yin cu cꞌul tol chi katoj tet je Diosal jaex Israel jex tiꞌ, Naj ey stemplo bꞌey Jerusalén tuꞌ. 16 Iꞌ cꞌal pax toj masanil chꞌen plata, cꞌal masanil chꞌen oro jix ja chaꞌ tet ebꞌ ánima bꞌey yul yet Babilonia tiꞌ, cꞌal jantaj tzet jix el yin scꞌul ebꞌ ja wet Israelal, cꞌal ebꞌ yakꞌomal xaambꞌal, yakꞌon ebꞌ bꞌey stemplo je Diosal bꞌey Jerusalén tuꞌ. 17 Jaꞌ yetoj chꞌen tumin tuꞌ, cha wakꞌ manon noꞌ wacax, noꞌ icham meꞌ, cꞌal noꞌ achꞌe meꞌ, yetoj masanil wanxa tzetyetal chi akꞌle yin xaambꞌal tuꞌ, jaxca tiriw, ma cebada, cꞌal yal uva chi oc yin xaambꞌalil bꞌey yet xaambꞌal yul stemplo je Diosal bꞌey Jerusalén tuꞌ. 18 Jaxa chꞌen oro cꞌal chꞌen plata chi cancan xin, oj xa je yilaꞌ tzet chi oc chꞌen je yu, jatacꞌalaꞌ tzet chi ẍaꞌ scꞌul je Diosal. 19 Jal pax masanil wan mitxꞌkꞌabꞌe jix akꞌle ey jaach, wan chi kꞌanle bꞌey stemplo Dios yet chi oc eyilal, jaach caw cha wakꞌ tet ja Diosal bꞌey Jerusalén tuꞌ.

20 Yal cꞌal tzetyetal chi oc yopiso ja wu bꞌey stemplo je Diosal tuꞌ, chi skeꞌ ja wiꞌon eltej stool bꞌey naj jin tesorero an. 21 Jain rey Artajerjes jin tiꞌ chi wal tet masanil ebꞌ naj jin tesorero bꞌey skꞌaxepal ecꞌtej jaꞌ Éufrates: Akꞌwej masanil yin eymanil jantaj tzet chi skꞌan Esdras naj yakꞌomal xaambꞌal, naj tol cuywam yin sley Dios ey bꞌey satcan. 22 Chi skeꞌ je yakꞌon 75 quintal chꞌen plata, 300 quintal ixim tiriw, 550 galón vino, 550 galón aceite olivo, yetoj masanil atzꞌam chi kꞌanlei.

23 Masanil tzetyetal chi kꞌanle bꞌey stemplo Dios, jaꞌton Naj ey bꞌey satcan, yin ojabꞌ eymanil chi akꞌle masanil, yet watxꞌ cꞌam junoj syaꞌilal chi jul wibꞌan jain rey jin tiꞌ, cꞌal yibꞌan ebꞌ wuninal, yetoj cꞌal pax yibꞌan masanil ebꞌ ánima ey yul jin nación tiꞌ. 24 Catuꞌ che yabꞌen can ocoj tol cꞌam chi skeꞌ je kꞌanonwej el chꞌen toolabꞌal cꞌal junojxa tumin tet ebꞌ yakꞌomal xaambꞌal, tet ebꞌ Levita, tet ebꞌ chi bꞌitni, tet ebꞌ teynem puerta yetoj cꞌal tet masanil ebꞌ eyoc yin yakꞌomaloj servil bꞌey stemplo Dios.

25 Jal jaach pax Esdras jaach tiꞌ xin, jatacꞌalaꞌ ja jelanil akꞌbꞌil yu Dios, aoc ebꞌ juez cꞌal ebꞌ gobernador chi waꞌnen yeoc skꞌane masanil ebꞌ ánima ey bꞌey skꞌaxepal ecꞌtoj jaꞌ Éufrates. Jaꞌ ebꞌ tuꞌ sowalil chi yotajne el ẍejbꞌanil ja Diosal tuꞌ; yetoj cꞌal ebꞌ man to otajnenoj wan ley tuꞌ, cha cuy ebꞌ. 26 Jaꞌ mac cꞌam chi jijen ẍejbꞌanil ja Diosal tuꞌ yetoj jin ley jain rey jin tiꞌ, yin eymanil chi naꞌle oc yin ebꞌ, tumi chi akꞌle camoj, ma chi iꞌle el yul sconobꞌ, ma chi iꞌle ecꞌ tzetyetal ey tet, ma chi oc preso, ẍi naj rey yin an scarta tuꞌ.

27 Yu jun tuꞌ xin, jix yalon naj Esdras jaxca tiꞌ: Al-le ojabꞌ watxꞌ kꞌane tet Jehová cu Diosal yetoj ebꞌ cu mam icham, yutol jaꞌ Naj jix aon oc yin snaꞌbꞌal naj rey tol miman yeloc apnoj stemplo Jehová bꞌey Jerusalén. 28 Yu wal swatxꞌcꞌulal Jehová, yuxan watxꞌ jin yul sat naj rey, yetoj cꞌal yul sat ebꞌ chi wa al-lnen junoj kꞌane, yetoj cꞌal yul sat masanil ebꞌ yaaw miman yeloc apnoj yin yopiso yetoj naj rey. Yetoj wal scolwal Jehová cu Diosal, jix wakꞌon wip, yet jix jin yambꞌan oc ebꞌ yaaw yeoc xol ebꞌ yicꞌaal Israel, yu smeltzotej ebꞌ wetoj, ẍi naj Esdras.