3 Jaꞌ yet sbꞌabꞌel abꞌil yoc naj Ciro yin reyal, jix yaloni: Jaꞌ yu stemplo Dios bꞌey Jerusalén: Waꞌnele ojabꞌ ey xeꞌ, catuꞌ chi waꞌxi a templo yu yakꞌle xaambꞌal yul; 27 metro chi yun steel, jacꞌalaꞌ 27 metro chi yun cꞌal pax yul xiquin. 4 Chi ale oc oxebꞌ txol chꞌen mimej chꞌen josbꞌil yin, catuꞌ chi oc jun txol teꞌ patzabꞌ chi oc yibꞌan. Jaꞌ bꞌey naj stesorero naj rey chi eltej stuminal. 5 Jal wanxa mitxꞌkꞌabꞌe tol oro cꞌal plata cꞌal eloj wan iꞌbꞌiltej bꞌey yul templo bꞌey Jerusalén yu Nabucodonosor, wan jix yiꞌtej bꞌey Babilonia tiꞌ, chi iꞌletoj bꞌey templo bꞌey Jerusalén, catuꞌ chi ale octoj bꞌey yul stemplo Dios, bꞌey ey cꞌaltaꞌ ecꞌoj, ẍi jun chejbꞌanile tuꞌ.

6 Jix lawi tuꞌ, jix yaontoj spajtzebꞌal naj rey Darío tet naj Tatenai, naj gobernador bꞌey skꞌaxepal ecꞌtoj jaꞌ Éufrates, cꞌal tet naj Setar-boznai cꞌal yetoj tet wanxa ebꞌ ey yopiso yetoj, jix yalon ebꞌ jaxca tiꞌ:

Elanwej bꞌey Jerusalén tuꞌ, 7 catuꞌ cꞌam ojabꞌ che tenoc tucan naj sgobernadoral ebꞌ Israel, cꞌal ebꞌ chi ijbꞌan mulnail yu swaꞌxubꞌal a stemplo Dios bꞌey ey cꞌaltaꞌa yet peyxa. 8 Jain rey Darío jin chi walaꞌ, tol chex colwa yetoj ebꞌ Israel yin jun mulnail tuꞌ, yu swaꞌxi a stemplo Dios. Jaꞌ chꞌen tumin chi yakꞌ ebꞌ ánima ey bꞌey skꞌaxepal ecꞌtoj jaꞌ Éufrates tet naj rey, jaꞌ chꞌen che yakꞌ stooloj ebꞌ mulnawom tuꞌ, cꞌam ojabꞌ chi ecꞌ tiempo je yakꞌon stool scꞌu ebꞌ, yet watxꞌ cꞌam chi oc tucan yoc mulnail. 9 Masanil tzet chi oc yopiso junjun cꞌu, cꞌam ojabꞌ chi oc tucan yakꞌle tet ebꞌ yakꞌomal xaambꞌal eyecꞌ bꞌey Jerusalén, jatacꞌalaꞌ tzet chi skꞌan ebꞌ, ta noꞌ achꞌe wacax, noꞌ icham meꞌ, cꞌal noꞌ achꞌe meꞌ, yet chi oc noꞌ yin xaambꞌalil tet Naj sDiosal satcan, yetoj cꞌal pax ixim tiriw, atzꞌam, vino, cꞌal aceite olivo, 10 yet chi akꞌle yin xaambꞌal jaxca chi yoche Dios ey bꞌey satcan, catuꞌ chi woche tol chi txali ebꞌ wu jain rey jin tiꞌ yetoj cꞌal yu ebꞌ wuninal.

11 Jain chi wal cꞌal pax oj, ta ey mactxequel cꞌam chi jijen jun chejbꞌanile chi waleltoj tiꞌ, chi iꞌle eytej junoj spatzabꞌil sna, catuꞌ chi locbꞌale a yin ẍumuc teꞌ, jaꞌ sna chi cancan bꞌulan jaxca kꞌalem. 12 Jaꞌ Dios jix sicꞌon el conobꞌ Jerusalén yet chi oc yin eyilal tet; yu jun tuꞌ, jaꞌ ojabꞌ chi qꞌueyon el ebꞌ rey, yetoj cꞌal snación ebꞌ chi tenon oc tucan jun kꞌane chi wal tiꞌ, ma chi yetnetoj jun stemplo Dios bꞌey Jerusalén tuꞌ. Jain rey Darío jin tiꞌ, chi wakꞌ jun chejbꞌanile tiꞌ, tol sowalil chi jijele yin eymanil masanil tzet chi tzꞌibꞌelecan tinaniꞌ, ẍi yul an juun tuꞌ.

13 Yu jun tuꞌ xin, jaꞌ naj Tatenai, gobernador yeoc naj bꞌey skꞌaxepal ecꞌtej jaꞌ Éufrates, cꞌal naj Setar-boznai, yetoj ebꞌ yet yaawil sbꞌa yetoj, jix sjije ebꞌ jaxca jix yun yalontej naj rey Darío tuꞌ. 14 Jaꞌ ebꞌ jix ijbꞌan jun mulnail tuꞌ, jaꞌton ebꞌ ẍejabꞌ Dios chi yij Hageo cꞌal Zacarías, scꞌaal Idó. Queytuꞌ jix yun slawi swaꞌxi a templo jaxca jix yun yalon Jehová sDiosal Israel, yetoj cꞌal chejbꞌanile jix yal ebꞌ sreyal Persia, jaꞌton naj Ciro, naj Darío, yetoj cꞌal naj Artajerjes. 15 Oxebꞌxa cꞌual yoc xꞌaaw Adar yet swaj abꞌil yoc naj Darío yin reyal bꞌey Persia, jaꞌ yet tuꞌ jix lawi swaꞌxi a stemplo Dios tuꞌ.

16 Jaꞌ ebꞌ Israel, yetoj cꞌal ebꞌ yakꞌomal xaambꞌal, cꞌal ebꞌ Levita yetoj masanil ebꞌ paxnajtej bꞌey Babilonia, jix yaoc skꞌinal stemplo Dios ebꞌ yin tzalacꞌulal. 17 Jaꞌ yet jun tiempoal tuꞌ jix yakꞌ xaambꞌal ebꞌ; 100 noꞌ achꞌe wacax, 200 noꞌ icham meꞌ, 400 noꞌ achꞌe meꞌ, yetoj lacawcꞌon noꞌ icham chiw, junjun noꞌ chiw tuꞌ jix yakꞌ junjun icꞌaaleal ebꞌ Israel, yet chi tancan el spenail masanil conobꞌ. 18 Jix lawi tuꞌ xin, catuꞌ jix ale can oc ebꞌ yakꞌomal xaambꞌal yin xolilal yetoj ebꞌ Levita, yin junjun tujan jix oc yopiso ebꞌ bꞌey stemplo Dios bꞌey Jerusalén, jaxca ye stzꞌibꞌelecan yul an juun yu naj Moisés.

19 Jaꞌ ebꞌ jix meltzotej bꞌey Babilonia, yet 14 yoc bꞌabꞌel xꞌaaw, jix yaoc jun kꞌin ebꞌ yet jix jajle eltej smam icham ebꞌ bꞌey Egipto, jaꞌton jun kꞌin chi yij Pascua. 20 Jix swaꞌne sbꞌa ebꞌ yakꞌomal xaambꞌal cꞌal ebꞌ Levita, jatacꞌalaꞌ yalon chejbꞌanile. Catuꞌ jix smakꞌon cam noꞌ xaambꞌal ebꞌ Levita yet kꞌin Pascua yu masanil ebꞌ meltzonajtej bꞌey Babilonia, jaꞌton ebꞌ yet conobꞌ ebꞌ, cꞌal ebꞌ yakꞌomal xaambꞌal, yetoj cꞌal ebꞌ Levita. 21 Masanil ebꞌ Israel meltzonajtej bꞌey Babilonia, jix ẍiꞌ noꞌ xaambꞌal ebꞌ yet Pascua tuꞌ. Jacꞌalaꞌ masanil ebꞌ jix yaoc sbꞌa yetoj ebꞌ, jaꞌton ebꞌ jix spoꞌoel sbꞌa yin spena bꞌeybꞌal ebꞌ ánima caan bꞌey yinlaj ebꞌ, jix syambꞌan oc sbꞌa ebꞌ yetoj ebꞌ Israel, yu yoc ebꞌ yin eyilal tet Jehová, sDiosal Israel. 22 Yin jujebꞌ cꞌual eyoc ebꞌ yin tzalacꞌulal yu yaon oc kꞌin ebꞌ yet ixim pan cꞌam yich eyocoj, yutol jaꞌ Jehová jix yaoc tzalacꞌulal yin snaꞌbꞌal ebꞌ, yutol jix kꞌanabꞌ Dios yin snaꞌbꞌal naj reyal bꞌey Asiria, yu scolwa naj yin swaꞌnen a stemplo Jehová, sDiosal Israel.