Jix El Yich Scaꞌ Waꞌnele A Templo
5
Jaꞌ ebꞌ ẍejabꞌ Dios yet jun tiempoal tuꞌ, jaꞌton naj Hageo, cꞌal naj Zacarías, scꞌaal Idó, jix oc ian ebꞌ yalon tet ebꞌ a Judá, yetoj cꞌal tet ebꞌ a Jerusalén, jaxca tzet chi yal Jehová tet ebꞌ. 2 Jix lawi tuꞌ xin, jix oc naj Zorobabel, scꞌaal Salatiel, cꞌal Josué, scꞌaal Josadac yin smulnail junelxa yin scaꞌ waꞌnen a stemplo Dios ebꞌ bꞌey Jerusalén, catuꞌ jix colwa ebꞌ ẍejabꞌ Dios yetoj ebꞌ. 3 Jaꞌ yet jun tiempoal tuꞌ, jix jul naj Tatenai, gobernador yeoc naj bꞌey skꞌaxepal ecꞌtej jaꞌ Éufrates, cꞌal Setar-boznai yetoj wanxa ebꞌ jaꞌjun yetoj. Jix yalon ebꞌ jaxca tiꞌ: ¿Mac jix alon ey jex ta tol che caꞌ waꞌne a jun templo tiꞌ, catuꞌ che yaon cꞌal pax oc steꞌal? 4 ¿Tzet sbꞌi ebꞌ chi waꞌnen jun miman na tiꞌ? ẍi ebꞌ. 5 Jaꞌ Dios jix oc cꞌal yetoj ebꞌ Israel eyoc yin ijbꞌawomal yin jun mulnail tuꞌ, yuxan ma tenle oc tucan ebꞌ mulnawom tuꞌ yu naj gobernador yetoj ebꞌ jaꞌjun yetoj. Asan tol jix stzꞌibꞌetoj jun an juun ebꞌ tet naj rey Darío, catuꞌ jix yechbꞌanen spaj ebꞌ, tzet ẍi naj.6 Jaꞌton jun scopiail an carta jix yatoj naj gobernador chi yij Tatenai tet naj rey Darío, cꞌal pax Setar-boznai, cꞌal ebꞌ yet gobernadoral, jaꞌton ebꞌ yaaw yeoc bꞌey skꞌaxepal ecꞌtej jaꞌ Éufrates tuꞌ. 7 Chi yalon an jaxca tiꞌ:
Chi yoche cu cꞌul jaach mamin rey, tol tzalacꞌulal ojabꞌ cꞌal ey jaach. 8 Chi kakꞌ ja wotajne eloj, tol jix cu bꞌetecꞌ bꞌey Judá. Jix kiloni tol jaꞌ stemplo Dios, Naj miman yeloc apnoj, lalan scaꞌ waꞌnele aoj. Eyoc chꞌen mimej chꞌen josbꞌil yetoj cꞌal teꞌ mimej patzabꞌ yu ebꞌ yin. Caw wal yelcꞌulal chi mulna ebꞌ, yuxan tuxa wal chi waꞌxi yu ebꞌ. 9 Jix lawi tuꞌ, jix cu kꞌanle tet ebꞌ Israel tuꞌ jaxca tiꞌ: ¿Mactxequel jix chejon je waꞌne yuxan chex mulna oc yin? cu chi tet ebꞌ. 10 ¿Tzet sbꞌi wan winaj chi ijbꞌan jun mulnail tiꞌ? cu chi tet ebꞌ jon, yet watxꞌ chi cu tzꞌibꞌetoj sbꞌi ebꞌ ey jaach, yet cha wotajne el sbꞌi ebꞌ kalon jon. 11 Catuꞌ jix yalon ebꞌ ey jon jaxca tiꞌ: Jaon tiꞌ jon chi kal cu bꞌa tet Naj sDiosal satcan cꞌal txꞌotxꞌ txꞌotxꞌ tiꞌ, yuxan lalan cu caꞌ waꞌnen a jun stemplo cu Diosal tiꞌ jon, jaꞌton jun tiꞌ waꞌnebꞌil a yu Salomón, naj sreyal conobꞌ Israel tiꞌ yet peyxa. 12 Catuꞌ jix yalon pax ebꞌ ey jon, tol abꞌ jaꞌ smam icham ebꞌ jix txꞌemontej sjowal scꞌul Dios yibꞌan ebꞌ. Yu jun tuꞌ xin, jaꞌ Dios jix aon oc ebꞌ yul skꞌabꞌ naj Nabucodonosor, sreyal Babilonia, naj yicꞌaal ebꞌ Caldeo. Yuxan jaꞌ naj jix makꞌon ey jun templo tuꞌ, jix lawi tuꞌ, catuꞌ jix iꞌletoj ebꞌ ánima yin yakꞌomaloj servil bꞌey Babilonia. 13 Junxa abꞌil yoc naj Ciro yin reyal bꞌey Babilonia, catuꞌ jix yalon naj tol chi caꞌ waꞌnele a jun templo tuꞌ.
14 Catuꞌ jix yalon naj rey Ciro tol chi iꞌle meltzo junelxa wan mitxꞌkꞌabꞌe oro cꞌal chꞌen plata cꞌal eloj, jaꞌton wan jix yiꞌtoj naj Nabucodonosor bꞌey stemplo Dios bꞌey Jerusalén, catuꞌ jix yaon octoj naj yul stemplo sdiosal. Jix lawi tuꞌ xin, catuꞌ jix yakꞌon wan mitxꞌkꞌabꞌe naj rey Ciro tet naj Sesbasar, jaꞌton naj jix ale oc yin gobernadoral bꞌey Jerusalén. 15 Jix yalon naj rey Ciro tet naj Sesbasar, tol chi yiꞌtoj wan mitxꞌkꞌabꞌe oro cꞌal eloj, yet chi yaon octoj yul stemplo Dios bꞌey Jerusalén, catuꞌ chi swaꞌne octoj bꞌey ey cꞌaltaꞌ octoj yet sbꞌabꞌelal. 16 Catuꞌ jix apni oc naj Sesbasar bꞌey Jerusalén, jix yaon ey xeꞌ stemplo Dios. Jaꞌ yet tuꞌ jix ẍaꞌel yich scaꞌ waꞌnele aoj, catuꞌ cꞌam tocꞌal chi lawi tinaniꞌ.
17 Jaꞌ tinaniꞌ xin, jaach rey, chi cu kꞌan ey jaach tol chi seyle yul-laj cꞌuanbꞌal yul palacio bꞌey Babilonia tuꞌ, ta yel jaꞌ naj rey Ciro jix aloni tol chi caꞌ waꞌnele a stemplo Dios bꞌey Jerusalén tuꞌ. Chi lawi tuꞌ, cha walon ey jon tzet ẍi ja naꞌbꞌal yin jun tiꞌ, ẍi ebꞌ yin an juun tuꞌ.