—Tol oj wal chi ẍaꞌ je cꞌul, chi cu colwa je yetoj yin cu waꞌnen a jun templo tiꞌ, yutol jaon tiꞌ chi cu oc cꞌal pax yin eyilal tet je Diosal jaxca jex jaex tiꞌ. Jaꞌ yet jix cu iꞌletej titiꞌ yu naj Esarhadón, jaꞌton sreyal Asiria, jaꞌ yet tuꞌ jix cꞌoli kakꞌon cu xaambꞌal tet je Diosal tuꞌ, ẍi ebꞌ.

3 Catuꞌ jix takꞌwi naj Zorobabel yetoj Josué, cꞌal yetoj ebꞌ yaaw yeoc xol ebꞌ yican, jix yalon ebꞌ jaxca tiꞌ:

—Cꞌam je yalon je yet ketoj yet chi cu caꞌ waꞌne a stemplo cu Diosal tiꞌ jon. Asanne jon jaon tiꞌ oj cu caꞌ waꞌne jun smulnail Dios tiꞌ cu txꞌojli jon, yutol queytuꞌ jix yun yalon naj Ciro, sreyal Persia, ẍi ebꞌ.

4 Yu jun tuꞌ xin, caw jix oc cꞌal ian ebꞌ pena snaꞌbꞌal tuꞌ yakꞌon scꞌul ebꞌ caan bꞌey Judá, yet watxꞌ chi oc tucan ebꞌ yin jun mulnail tuꞌ. 5 Yetoj cꞌal pax oj jix akꞌle tumin tet ebꞌ yu ebꞌ mimej yaaw tol ey yopiso yintaj naj rey, yet watxꞌ chi tenle oc tucan ebꞌ swaꞌnen a templo tuꞌ. Queytuꞌ jix yute ebꞌ yet eyoc naj Ciro yin reyal bꞌey Persia, masantaꞌcꞌal yul stiempoal naj rey Darío. 6 Jaꞌ yet jix ẍaꞌon el yich yakꞌon yaawilal naj Asuero yin reyal, jix snaꞌa ebꞌ jun xijbꞌal kꞌane yin ebꞌ caan bꞌey Judá cꞌal bꞌey Jerusalén. 7 Jaꞌ yul stiempoal naj Artajerjes sreyal Persia, jaꞌ naj Bislam, Mitrídates, Tabeel yetoj cꞌal ebꞌ jaꞌjun yetoj, jix stzꞌibꞌetoj jun juun ebꞌ tet naj rey Artajerjes. Jaꞌ an juun tuꞌ jix tzꞌibꞌele yin Arameo. 8 Jaꞌ naj comandante chi yij Rehúm, yetoj cꞌal naj tzꞌibꞌlom chi yij Simsai, jaꞌton ebꞌ tuꞌ jix waꞌnen jun carta yu yal-le xijbꞌal kꞌane yin ebꞌ caan bꞌey Jerusalén tet naj rey Artajerjes. 9 Jaꞌton an carta tiꞌ jix yatoj naj Rehúm, naj comandante, cꞌal naj tzꞌibꞌlom chi yij Simsai, yetoj cꞌal ebꞌ yaaw yeocoj, cꞌal ebꞌ ey yopiso titnaj bꞌey Persia, bꞌey Érec, bꞌey Babilonia, cꞌal bꞌey Susa, yul yet Elam, 10 yetoj cꞌal bꞌey wanxa nación. Jaꞌton ebꞌ jix iꞌle eltej bꞌey sconobꞌal yu naj rey Asnapar, naj caw miman yeloc apnoj yul sat ebꞌ ánima, jix iꞌletoj ebꞌ yu bꞌey conobꞌ Samaria, cꞌal bꞌey wanxa conobꞌ bꞌey skꞌaxepal ecꞌtoj stiꞌ jaꞌ Éufrates.^a 11 Jix yalon yul an juun jaxca tiꞌ:

Jaon ja chejabꞌ jon tiꞌ, caan jon bꞌey skꞌaxepal ecꞌtej jaꞌ Éufrates, chi cu tzꞌibꞌetoj jun juun tiꞌ ey jaach mamin rey Artajerjes, catuꞌ chi kaontoj scawil ja cꞌul:

12 Chi kaltoj ey jaach, jaach rey, tol jaꞌ ebꞌ a Judá paxnajtej bꞌey Babilonia jix jul taꞌcꞌal ebꞌ bꞌey Jerusalén. Tol lalan scaꞌ waꞌnen a jun conobꞌ ebꞌ tol cꞌam niꞌoj swatxꞌil, jun conobꞌ yel xacꞌal pena chi yute sbꞌa. Jix ẍaꞌel yich swaꞌne a smuroal ebꞌ, tuxa wal chi lawi yu ebꞌ. 13 Chi kalon cꞌal pax toj ey jaach mamin rey, ta tol jaꞌ jun conobꞌ tuꞌ oj caꞌ waꞌnele aoj, yetoj cꞌal smuroal, jaꞌ ebꞌ ánima tuꞌ manxa oj yakꞌ stoolabꞌal tumin ebꞌ ey jaach. Ta jaxca tuꞌ, manxa oj yamcha oc tumin yul skꞌabꞌ naj chi cꞌubꞌan tumin. 14 Yutol jaon tiꞌ, ey jon oc jaach kakꞌon servil jaach rey, cꞌam chi yoche cu cꞌul tol jaxca tuꞌ oj jaach uteleoj, yuxan chi kaltoj wan tiꞌ ey jaach, mamin rey. 15 Yuxan, watxꞌ chi seyle il bꞌey yul-laj cꞌuanbꞌal bꞌey tzꞌibꞌebꞌilcan yu ebꞌ ja mam icham. Jaꞌ tituꞌ chi yalcanoj, catuꞌ oj naꞌcha el ja wu, tol jaꞌ jun conobꞌ tiꞌ caw cꞌam niꞌoj swatxꞌil. Yutol ey smey yin ebꞌ rey, cꞌal yin wanxa conobꞌ, yutol yu spenail ebꞌ yuxan jix uchle lawoj ey jun conobꞌ tuꞌ. 16 Yu tuꞌ xin, chi kaltoj ey jaach, jaach mamin rey, ta tol chi caꞌ waꞌnele a jun conobꞌ tiꞌ, jaꞌ yet oj waꞌxoj oc smuroal tuꞌ, cꞌamxa mi ja walon ja wet bꞌey skꞌaxepal ecꞌtoj jaꞌ Éufrates tiꞌ, ẍi toj ebꞌ tet naj rey.

17 Jix lawi tuꞌ xin, jix yaontej naj rey Artajerjes spajtzebꞌal jun skꞌane ebꞌ tuꞌ jaxca tiꞌ:

Jaach comandante Rehúm, yetoj cꞌal naj ja tzꞌibꞌlom chi yij Simsai, yetoj cꞌal ebꞌ jaꞌjun ja wetoj bꞌey Samaria cꞌal bꞌey wanxa conobꞌ bꞌey skꞌaxepal ecꞌtoj jaꞌ Éufrates, chi wakꞌ scawil je cꞌul.

18 Jaꞌ an juun jix je yatej ey jin tiꞌ, caw watxꞌ jix yun yawtele a an yet jix al-le el yin Arameo jin sattaj. 19 Jix wakꞌ seyle il-leoj, jix ton ilcha oc tzet chi yal an, tol jaꞌ conobꞌ Jerusalén tuꞌ, caw wal pena jix yute sbꞌa tet ebꞌ rey yet yalantoj, jix syambꞌa oc sbꞌa ebꞌ sattaj ebꞌ rey yet cꞌam chi ẍaꞌ yabꞌ ebꞌ tzet chi al-lei. 20 Jaꞌ yet tuꞌ ey ebꞌ sreyal Jerusalén caw wal jelan, jix oc yopiso ebꞌ yibꞌan txꞌotxꞌ txꞌotxꞌ bꞌey yetcꞌulal ecꞌtoj jaꞌ Éufrates, jix yakꞌ stoolabꞌal tumin ebꞌ ánima tet ebꞌ, yetoj cꞌal tumin chi waale ey xol ebꞌ. 21 Yuxan alwej tet ebꞌ winaj tuꞌ tol chi oc tucan ebꞌ yin jun mulnail tuꞌ, masantaꞌcꞌal jain oj walaꞌ. Cꞌam ojabꞌ to chi scaꞌ waꞌne a jun conobꞌ tuꞌ ebꞌ. 22 Man tucꞌal oj che yiloc jun tuꞌ, yet watxꞌ cꞌam chi etex el cu conobꞌ tiꞌ, ẍi naj rey tuꞌ.

23 Jaꞌ yet jix awtele a an scarta naj rey Artajerjes sattaj naj comandante Rehúm, cꞌal sattaj naj tzꞌibꞌlom chi yij Simsai, cꞌal sattaj ebꞌ jaꞌjun yetoj ebꞌ, jix too ebꞌ masanil yin eymanil bꞌey Jerusalén, jix bꞌet yalon ebꞌ tet ebꞌ a Judá tol chi oc tucan ebꞌ yin jun mulnail tuꞌ. 24 Queytuꞌ jix yun yoc can tucan mulnail yu scaꞌ waꞌnele a stemplo Dios bꞌey Jerusalén, masantaꞌcꞌal yet scaabꞌ abꞌil yoc naj Darío yin reyal bꞌey Persia.