Jix Caꞌ Waꞌnele A Bꞌey Chi Akꞌle Xaambꞌal Yet Chi Oc Eyilal
3
Jix swaꞌne pax ey sbꞌa ebꞌ Israel bꞌey yul sconobꞌ junelxa, jaxa yet jix tzꞌajna jujebꞌ xꞌaaw, masanil ebꞌ conobꞌ Israel jix syambꞌa oc sbꞌa bꞌey Jerusalén yin junxane naꞌbꞌaleal. 2 Jix lawi tuꞌ xin, jaꞌ naj Josué scꞌaal Josadac, yetoj ebꞌ yet yakꞌomal xaambꞌal, yetoj naj Zorobabel scꞌaal Salatiel, yetoj cꞌal ebꞌ yican. Jix swaꞌne jun yet xaambꞌal yet Jehová ebꞌ, yu yakꞌon xaambꞌal ebꞌ yibꞌan, jaxca yalon sley Moisés, naj ẍejabꞌ Dios. 3 Caxcꞌal jix xiw ebꞌ tet ebꞌ txꞌoj conobꞌal caan scawilal ebꞌ tituꞌ, jix swaꞌne cꞌal a jun yet xaambꞌal ebꞌ tuꞌ. Junjun skꞌinibꞌalil junjun cꞌal yeycꞌualil jix yakꞌ tzꞌaꞌ xaambꞌal ebꞌ, yu yiꞌon a can sbꞌi Jehová ebꞌ. 4 Catuꞌ jix yaon oc skꞌinal ebꞌ wan pat yet skꞌabꞌ teꞌ, jix yakꞌon xaambꞌal ebꞌ yin junjun cꞌu, jatacꞌalaꞌ yalon can sley Moisés. 5 Jix yakꞌon cꞌal pax xaambꞌal ebꞌ chi tzꞌaꞌ yin junjun cꞌu, yet chi oc kꞌin yet chi ali xꞌaaw, yetoj cꞌal wanxa kꞌin chi yaoc ebꞌ yin junjun abꞌil sattaj Jehová. Yal cꞌal mactxequel chi el yin scꞌul catuꞌ chi yakꞌon xaambꞌal tet Dios yal cꞌal tzet tiempoal. 6 Jaꞌ yet bꞌabꞌel cꞌual yet sjujebꞌ xꞌaaw, jix ẍaꞌon el yich yakꞌon xaambꞌal ebꞌ chi tzꞌaꞌi yet cꞌam tocꞌal chi ey yich swaꞌnen stemplo Jehová ebꞌ. 7 Catuꞌ jix yakꞌon tumin ebꞌ tet ebꞌ albañil, cꞌal tet ebꞌ josom teꞌ. Jix yakꞌon cꞌal pax loꞌbꞌe ebꞌ, cꞌal tzet chi ucꞌlei, cꞌal aceite olivo tet ebꞌ a Sidonio, cꞌal tet ebꞌ a Tiro yu yiꞌontej teꞌ kꞌuteꞌ ebꞌ bꞌey Líbano, catuꞌ chi oc teꞌ yibꞌan jaꞌ mar masantaꞌcꞌal chi apni oc bꞌey conobꞌ Jope, jatacꞌalaꞌ jix yun yalon naj Ciro, sreyal Persia.Jix Ẍaꞌel Yich Swaꞌxi A Templo
8 Jix ẍaꞌel yich scaꞌ waꞌnele a templo yu naj Zorobabel scꞌaal Salatiel, cꞌal Josué scꞌaal Josadac, yetoj cꞌal ebꞌ yakꞌomal xaambꞌal, ebꞌ Levita, yetoj cꞌal masanil ebꞌ jix paxtej bꞌey Babilonia. Jaꞌ yet scaabꞌ xꞌaaw yet scaabꞌ abꞌil xa yapni oc ebꞌ bꞌey Jerusalén, jix ẍaꞌel yich smulna oc ebꞌ yin stemplo Jehová, catuꞌ jix ale oc jun mulnail tuꞌ yul skꞌabꞌ ebꞌ Levita yu ebꞌ, jaꞌton ebꞌ ecꞌbꞌanxa 20 abꞌil skꞌinal. 9 Jaꞌ jun Levita chi yij Josué, yetoj cꞌal scꞌaal, cꞌal ebꞌ yican yetoj naj Cadmiel cꞌal ebꞌ scꞌaal, jaꞌton ebꞌ yicꞌaal Judá, jaꞌ ebꞌ jix ijbꞌan jun mulnail tuꞌ, junne xacꞌal jix yute sbꞌa ebꞌ. Jix oc ebꞌ yin ijbꞌawomal yin mulnail tuꞌ, yet chi caꞌ waꞌnele a templo, catuꞌ jix colwa cꞌal pax ebꞌ Levita yicꞌaal Henadad, yetoj cꞌal ebꞌ yican.
10 Jaꞌ yet jix yaon ey xeꞌ stemplo Jehová ebꞌ albañil tuꞌ, jix a linan ebꞌ yakꞌomal xaambꞌal, eyoc spichil ebꞌ chi skꞌan yin yopiso, catuꞌ iꞌbꞌil oc strompeta ebꞌ. Jaꞌ ebꞌ Levita yicꞌaal Asaf, iꞌbꞌil oc wan patxan ye chꞌen yu ebꞌ, jaꞌton wan chi skꞌanbꞌalne ebꞌ yet chi bꞌitni ebꞌ tet Jehová, jatacꞌalaꞌ jix yun yalon can naj David, sreyal Israel. 11 Ey ebꞌ chi bꞌitni, ey pax ebꞌ chi alon watxꞌ kꞌane tet Dios, chi yalon ebꞌ jaxca tiꞌ: Kalwej yu diosal tet Jehová, yutol yel xacꞌal watxꞌ Naj, yutol caw ochebꞌil jon jaon Israel jon tiꞌ yu Naj, ẍi masanil ebꞌ ánima tuꞌ. Caw chi el yaw ebꞌ conobꞌ yu tzalacꞌulal, catuꞌ chi cꞌoli sbꞌitni ebꞌ tet Jehová yutol jix ẍaꞌel yich swaꞌxi a templo. 12 Ecꞌal ebꞌ yakꞌomal xaambꞌal cꞌal ebꞌ Levita cꞌal ebꞌ syaawil conobꞌ, tol icham winajxa cꞌal el ebꞌ, tol ilbꞌil jun bꞌabꞌel templo yu ebꞌ, caw wal ip jix yun yel yaw ebꞌ yokꞌi, yet jix yilon ebꞌ yel yich swaꞌxi junxa acꞌ templo. Ecꞌal pax ebꞌ chi el yaw yu tzalacꞌulal. 13 Cꞌamxa junoj mactxequel chi naꞌcha el yu tzet chi yun ebꞌ tuꞌ. Ey mactxequel chi okꞌi, ey mac chi el yaw yu tzalacꞌulal, caw wal ip yel yaw ebꞌ sicꞌlebꞌil, caw naat jix abꞌle xacꞌal yel yaw ebꞌ.