2 Jaꞌ ebꞌ scꞌaal Tolá: Jaꞌton Uzí, Refaías, Jeriel, Jahmai, Ibsam yetoj cꞌal naj Samuel; jaꞌ ebꞌ tuꞌ yaaw yeoc xol ebꞌ yicꞌaal Tolá. Caw jelan yakꞌon jowal ebꞌ. Jaꞌ yul stiempoal naj rey David, jaꞌ sbꞌisil ebꞌ tuꞌ, ey 22,600 ebꞌ yin masanil.

3 Jaꞌ ebꞌ scꞌaal naj Uzí, jaꞌton Israhías. Jaꞌ ebꞌ scꞌaal Israhías, jaꞌton: Micael, Abdías, Joel yetoj naj Isías, jowan ebꞌ eyoc yin yaawil. 4 Caw ecꞌal yistil ebꞌ jix yiꞌ, yuxan caw ecꞌal yuninal ebꞌ jix ali, yu jun tuꞌ yuxan caw ecꞌal tujan ebꞌ ánima tuꞌ yin junjun icꞌaale, yuxan jix yamcha a jun miman bꞌulan ebꞌ soldado; ey 36,000 ebꞌ tol caw jelan yakꞌon jowal.

5 Jaꞌ sbꞌisil ebꞌ winaj yin junjun tujan yin yicꞌaal naj Isacar, ey 87,000 ebꞌ winaj; masanil ebꞌ tuꞌ, caw jelan ebꞌ yakꞌon jowal.

6 Jaꞌ naj Benjamín ey oxwan ebꞌ scꞌaal: Jaꞌton Bela, Béquer cꞌal Jediael.

7 Jaꞌ naj Bela tuꞌ ey jowan scꞌaal: Jaꞌton Esbón, Uzí, Uziel, Jerimot yetoj cꞌal naj Irí. Masanil wan tuꞌ, yaaw cꞌal yeoc ebꞌ xol junjun tujan yicꞌaal, caw jelan yakꞌon jowal ebꞌ. Jatacꞌalaꞌ jix yun sbꞌisle ebꞌ, tol jix aapnoj sbꞌisil ebꞌ yin 22,034 soldado yin masanil.

8 Ebꞌ scꞌaal naj Béquer, ey bꞌalonwan ebꞌ: Jaꞌton Zemirá, Joás, Eliézer, Elioenai, Omrí, Jerimot, Abías, Anatot, cꞌal Alémet. 9 Jaꞌ sbꞌisil ebꞌ soldado jix yamcha a xol ebꞌ tuꞌ, ey 20,200 soldado jelan yakꞌon jowal.

10 Jaꞌ scꞌaal naj Jediael, jaꞌton: Bilhán, jaꞌ ebꞌ scꞌaal naj Bilhán: Jaꞌton Jeús, Benjamín, Ehud, Quenaaná, Zetán, Tarsis cꞌal Ahisáhar. 11 Masanil wan tuꞌ, yicꞌaal Jediael ebꞌ naj, yaaw yeoc ebꞌ xol junjun tujan yicꞌaal, caw jelan yakꞌon jowal ebꞌ tuꞌ. Ey 17,200 soldado tol caw cuywinaj yin akꞌon jowal.

12 Jaꞌ ebꞌ scꞌaal naj Ir, jaꞌton: Sufam cꞌal Hufam. Jaꞌ ebꞌ scꞌaal naj Aher, jaꞌton Husim.

13 Ebꞌ scꞌaal Neftalí: Jaꞌton Jahseel, Guní, Jezer cꞌal Salum. Jaꞌton wan tuꞌ yicꞌaal Jacob ebꞌ yetoj ix Bilhá.

14 Jaꞌ wanxa ebꞌ scꞌaal Manasés, yetoj ix a Siria, ix scaabꞌ yistil naj: Jaꞌton Asriel, cꞌal Maquir, smam naj Galaad. 15 Jaꞌ naj Maquir tuꞌ jix nupi yetoj ix Maacá: Jaꞌton ix tuꞌ jix tit xol ebꞌ yicꞌaal Hufam cꞌal Sufam. Jal junxa scꞌaal naj Maquir tuꞌ, jaꞌton Selofhad. Jaꞌ naj tuꞌ, asan scutzꞌin naj ey. 16 Jaꞌ ix Maacá yistil naj Maquir tuꞌ, ey cawan swinaj unin, jun jix yakꞌ yij sbꞌi Peres, jal junxa jix yij sbꞌi Seres; jaꞌ ebꞌ scꞌaal Peres, jix yij Ulam cꞌal Réquem. 17 Jaꞌ scꞌaal Ulam, jaꞌton Bedán. Jaꞌton ebꞌ tiꞌ yicꞌaal Galaad ebꞌ, scꞌaal Maquir, yitxiquin naj Manasés.

18 Jaꞌ ix yanabꞌ naj Maquir: Jaꞌton ix Hamoléquet, jaꞌton xutx naj Is-hod, Abiézer cꞌal Mahlá.

19 Ebꞌ scꞌaal naj Semidá: Jaꞌton Ahián, Siquem, Liquehí cꞌal Aniam.

20-21 Ebꞌ yicꞌaal Efraín yin xolilal yet jix bꞌeycꞌaltej, jaꞌton Sutélah, Béred, Táhat, Eladá, Táhat, Zabad cꞌal Sutélah. Ey cawanxa ebꞌ scꞌaal Efraín, jaꞌton: Éser cꞌal Elad. Jaꞌ ebꞌ tuꞌ jix ey apnoj ebꞌ elkꞌan yin sjobꞌbꞌeal noꞌ ebꞌ caan bꞌey conobꞌ Gat, yuxan jix makꞌle cam ebꞌ tuꞌ yu ebꞌ tuꞌ. 22 Jaꞌ naj Efraín, smam ebꞌ, caw wal jix oc naj yin mimej cuscꞌulal yu scamichal ebꞌ naj. Jix apni oc ebꞌ yican naj yu jul yakꞌle smimanil scꞌul naj yu ebꞌ. 23 Jix lawi tuꞌ, jix ali pax junxa yuninal naj Efraín tuꞌ yetoj yistil, jix yakꞌon yij Beriá, yutol jix ecꞌtoj jun miman cuscꞌulal yibꞌan ebꞌ scawanil.

24 Jaꞌ ix Seerá, scutzꞌin naj Beriá tuꞌ, jaꞌ jix waꞌnen a jun conobꞌ chi yij Bet-horón bꞌey yalan eytej tuꞌ, cꞌal Bet-horón bꞌey yibꞌan atoj tuꞌ, yetoj cꞌal pax conobꞌ Uzén-seerá.

25-27 Jaꞌ xolilal ebꞌ yicꞌaal Beriá, yet jix bꞌeycꞌaltej, jaꞌton: Réfah, Résef, Télah, Tahán, Ladán, Amihud, Elisamá, Nun yetoj cꞌal naj Josué. 28 Jaꞌ sconobꞌ ebꞌ bꞌey jix caey ecꞌoj: Jaꞌton Betel, Naarán yetcꞌulal bꞌey chi aol cꞌu, jaꞌ Guézer jix can yetcꞌulal bꞌey chi too cꞌu, cꞌal Siquem masantaꞌcꞌal chi apni bꞌey Ayah. Jaꞌton wan conobꞌlaj tuꞌ yetoj cꞌal yaldeail jix yiꞌcan oc ebꞌ. 29 Jaꞌ yul yet Manasés, jaꞌ tituꞌ ey conobꞌ Bet-seán, Taanac, Meguido cꞌal Dor, yetoj cꞌal yaldeail junjun. Jaꞌ naj Efraín yetoj cꞌal naj Manasés, scꞌaal José ebꞌ naj. Jaꞌton wan conobꞌ tuꞌ bꞌey jix caey ecꞌ ebꞌ yicꞌaal José, scꞌaal naj Israel ebꞌ.

30 Ebꞌ yuninal naj Aser: Jaꞌton Imná, Isvá, Isví, Beriá, cꞌal jun yanabꞌ ebꞌ chi yij Sérah.

31 Ebꞌ scꞌaal Beriá, jaꞌton: Héber cꞌal Malquiel smam naj Birzávit. 32 Jaꞌ naj Héber tuꞌ, jaꞌton smam naj Jaflet, Sémer, Hotam cꞌal jun yanabꞌ ebꞌ chi yij Suhá.

33 Ebꞌ scꞌaal naj Jaflet, jaꞌton: Pasac, Bimhal, cꞌal Asvat.

34 Ebꞌ scꞌaal Sémer, yuẍtaj Jaflet, jaꞌton: Rohgá, Jehubá cꞌal Aram.

35 Ebꞌ scꞌaal Hotam, yuẍtaj Sémer, jaꞌton: Sofah, Imná, Seles cꞌal Amal. 36 Ebꞌ scꞌaal Sofah, jaꞌton: Súah, Harnéfer, Súal, Berí, Imrá, 37 Béser, Hod, Samá, Silsá, Itrán cꞌal Beerá.

38 Ebꞌ scꞌaal Jéter, jaꞌton: Jefuné, Pispá cꞌal Ará. 39 Ebꞌ scꞌaal Ulá, jaꞌton: Árah, Haniel cꞌal Risiá. 40 Jaꞌ masanil wan tiꞌ, yicꞌaal naj Aser ebꞌ, yaaw yeoc xol ebꞌ yican, caw jelan yakꞌon jowal ebꞌ, jaꞌton winaj tol miman yeloc apnoj. Jatacꞌalaꞌ jix yun stzꞌibꞌelecanoj, tol ey 26,000 soldado tol cuywinaj yin akꞌo jowal.