Ebꞌ Yicꞌaal Rubén
5
1-3 Jaꞌ naj Rubén, jaꞌton naj sbꞌabꞌel scꞌaal naj Israel; asan tol ma oc naj bꞌabꞌel yin lista, yuxan ma yiꞌ cꞌal pax smajul yet sbꞌabꞌel uninal; yu cꞌal tol jix wey naj yetoj ix scaabꞌ yistil smam, yuxan jaꞌ smajul naj yet sbꞌabꞌel uninal tuꞌ jaꞌ jix ecꞌ cantoj tet ebꞌ scꞌaal naj José. Cꞌaale cꞌal pax yeoc José tuꞌ yu naj Israel. Jaꞌ yet jix bꞌey cꞌaltoj tiempo xin, jaꞌ naj Judá tuꞌ jix yiꞌ yip yopiso yibꞌan ebꞌ yuẍtaj tuꞌ. Jaꞌ xol ebꞌ scꞌaal tuꞌ jix eltej jun yaaw, jal cꞌaltaꞌ smajul yet sbꞌabꞌel uninal tuꞌ jacꞌal tet naj José jix cancanoj. Jaꞌ ebꞌ scꞌaal Rubén, jaꞌton: Hanoc, Falú, Hesrón, cꞌal Carmí.4-6 Jaꞌ xolilal ebꞌ yicꞌaal Joel, jaꞌton ebꞌ tiꞌ: Semaías, Gog, Simí, Micaías, Reaías, Baal, Beerá. Jaꞌ Beerá tuꞌ, yaaw yeoc xol ebꞌ yicꞌaal Rubén, jaꞌton jun tuꞌ jix iꞌletoj yin yakꞌomaloj servil yu naj Tiglat-piléser, sreyal Asiria.
7 Jaꞌ ebꞌ yican naj Beerá tuꞌ, jatacꞌalaꞌ jix yun stzꞌibꞌcha can sbꞌi yichmam ebꞌ, jaꞌton Jeiel, yaaw yeoc naj, Zacarías, 8 cꞌal Bela, scꞌaal Asaz, yitxiquin naj Sema. Jaꞌ naj Semá tuꞌ, jaꞌton scꞌaal Joel. Jaꞌ naj Bela tuꞌ jix caey ecꞌ bꞌey conobꞌ Aroer, jaꞌ smajul txꞌotxꞌ tuꞌ jix apni taꞌcꞌal oc bꞌey conobꞌ Nebo, cꞌal bꞌey Baal-meón. 9 Jacꞌalaꞌ jix caey cꞌal pax ecꞌ yetcꞌulal bꞌey chi aol cꞌu, yutol jix chꞌibꞌ cꞌaltoj sbꞌisil sjobꞌbꞌeal noꞌ yul yet Galaad. Catuꞌ jix caey cꞌal ecꞌ bꞌey txꞌotxꞌ cusiltaj txꞌotxꞌ, chi apni taꞌcꞌal oc bꞌey jaꞌ Éufrates.
10 Jaꞌ yet eyoc naj Saúl yin reyal, jaꞌ ebꞌ yicꞌaal Rubén tuꞌ, jix yakꞌ jowal ebꞌ yetoj ebꞌ Agarenos, jix eyqꞌuey ebꞌ tuꞌ yu ebꞌ, queytuꞌ jix yun scaey ecꞌ ebꞌ bꞌey wan sconobꞌ ebꞌ caan bꞌey yetcꞌulal bꞌey chi aol cꞌu yul yet Galaad.
Ebꞌ Yicꞌaal Gad
11 Jaꞌ xol ebꞌ yicꞌaal Gad, jix caey ecꞌ ebꞌ bꞌey sattaj ecꞌtoj ebꞌ yicꞌaal Rubén, bꞌey yul yet Basán, masantaꞌcꞌal chi apni oc bꞌey conobꞌ Salcá. 12 Bꞌabꞌel yaaw yeoc naj Joel bꞌey conobꞌ Basán tuꞌ. Jaꞌ yintaj naj Joel tuꞌ, jix apni oc naj Safán. Jix lawi tuꞌ jix apni oc naj Jaanai, yetoj cꞌal naj Safat. 13 Jaꞌ wanxa ebꞌ yican ebꞌ naj, jatacꞌalaꞌ yeoc xolilal smam icham ebꞌ naj: Jaꞌton Micael Mesulam, Sebá, Jorai, Jacán, Zía cꞌal Éber, jujwan ebꞌ yin masanil. 14 Jaꞌton ebꞌ scꞌaal Abihail. Jaꞌ slistail ebꞌ yichmam naj Abihail yin xolilal, jaꞌton: Hurí, Jaróah, Galaad, Micael, Jesisai, Jahdó cꞌal Buz. 15 Jaꞌ naj Ahí, scꞌaal Adiel yitxiquin Guní, jaꞌton yaaw yeoc xol yicꞌaal ebꞌ tuꞌ. 16 Masanil ebꞌ tuꞌ, jix caey ecꞌ bꞌey Galaad, cꞌal bꞌey Basán, cꞌal bꞌey yaldeail, yetoj cꞌal masanil bꞌey watxꞌ slow noꞌ noꞌ bꞌey Sarón, masantaꞌcꞌal bꞌey smoonal xꞌotxꞌ junjun ebꞌ. 17 Masanil ebꞌ tuꞌ jix tzꞌibꞌcha sbꞌi yetoj ebꞌ yicꞌaal yet eyoc naj Jotam yin reyal bꞌey Judá, jaꞌ naj Jeroboam rey yeoc bꞌey Israel.
Skꞌaneal Ebꞌ Nan Yox Icꞌaale
18 Jaꞌ xol ebꞌ yicꞌaal Rubén, yetoj ebꞌ yet Gad, yetoj cꞌal nanxa tujan ebꞌ yet Manasés, ey 44,760 ebꞌ soldado iꞌbꞌil oc smajbꞌal sat julbꞌal, chꞌen espada, yetoj cꞌal julbꞌal yu ebꞌ. Caw wal cuywinaj ebꞌ yin akꞌo jowal. 19 Catuꞌ jix yakꞌon jowal ebꞌ yetoj ebꞌ Agarenos, jaꞌton ebꞌ yicꞌaal Jetur, Nafís cꞌal Nodab. 20 Jix oc Dios yetoj ebꞌ, yuxan jix eyqꞌuey ebꞌ Agarenos yetoj ebꞌ eyoc yetoj ebꞌ tuꞌ, yutol jaꞌ yet lalan yoc jowal tuꞌ, jix skꞌanon scolwal Dios ebꞌ. Jix colwa Dios yetoj ebꞌ, yutol jix yaoc scꞌul ebꞌ yin Dios. 21 Jix lawi tuꞌ xin, jix iꞌle cantoj jantaj sjobꞌbꞌeal noꞌ ebꞌ a Agarenos tuꞌ yu ebꞌ, ey 50,000 noꞌ camello, 250,000 noꞌ meꞌ, cꞌal 2,000 noꞌ bꞌuru; ey cꞌal pax 100,000 ebꞌ ánima jix iꞌletoj yin yakꞌomaloj servil. 22 Caw wal miman wan scajat ebꞌ tuꞌ jix cami, yutol jaꞌ jun jowal tuꞌ jaꞌ Dios ey yet. Queytuꞌ jix yun scancan caan ebꞌ bꞌey wan conobꞌ tuꞌ, masantaꞌcꞌal yet jix iꞌletoj ebꞌ bꞌey Asiria.
23 Jaꞌ ebꞌ yicꞌaal Manasés tuꞌ, caw miman sbꞌisil ebꞌ yuxan ey nanxa tujan ebꞌ jix caey ecꞌ ebꞌ bꞌey txꞌotxꞌ txꞌotxꞌ chi too tacꞌal bꞌey Basán masantaꞌcꞌal chi apni oc bꞌey Baal-hermón, jacꞌal oc chi yij cꞌal pax Senir cꞌal wonan Hermón. 24 Jaꞌ ebꞌ yaaw yeoc xol ebꞌ, jaꞌton: Éfer, Isí, Eliel, Azriel, Jeremías, Hodavías, cꞌal Jahdiel; masanil ebꞌ tuꞌ, eyoc ebꞌ yin soldadoal, caw bꞌinabꞌil ebꞌ, yutol caw jelan yakꞌon jowal ebꞌ, yaaw yeoc ebꞌ xol ebꞌ yican. 25 Asan xin, caw jix oc spenail ebꞌ tet Jehová sDiosal; jaꞌton sDiosal yichmam ebꞌ, caw man watxꞌoj jix yute sbꞌa ebꞌ, jix oc ebꞌ yin eyilal tet wan sdiosal ebꞌ conobꞌ, ebꞌ jix akꞌle lawoj el yu Dios sattaj ebꞌ. 26 Yu jun tuꞌ, yuxan jix chejle naj Pul, jaꞌton Tiglat-piléser, sreyal Asiria yu Dios yin yiꞌontoj ebꞌ Rubenita, ebꞌ Gadita, yetoj cꞌal nanxa tujan ebꞌ yicꞌaal Manasés. Jix iꞌletoj ebꞌ jaxca presowomal bꞌey conobꞌ Halah, Habor, Hará, cꞌal bꞌey stiꞌlaj jaꞌ jaꞌ chi yij Gozán. Jaꞌ tituꞌ eyecꞌ ebꞌ tinaniꞌ.