3-4 Jaꞌ ebꞌ scꞌaal naj Etam, ey oxwan: Jaꞌton Jezreel, Ismá, Idbás. Ey cꞌal pax jun yanabꞌ ebꞌ chi yij Haslelponi. Jaꞌ naj Penuel tuꞌ jaꞌton smam icham ebꞌ a conobꞌ Guedor, cꞌal Éser, jaꞌton smam icham ebꞌ a Husá. Jaꞌton ebꞌ tiꞌ yicꞌaal Hur, naj bꞌabꞌel yuneꞌ ix Efrata, smam icham ebꞌ a Belén.

5 Jaꞌ naj Asur, smam icham ebꞌ a Tecoa, cawan yistil naj tuꞌ: Jaꞌton ix Helá, cꞌal ix Naará. 6 Jaꞌ ix Naará tuꞌ, jaꞌ ey yuneꞌ Ahuzam, Héfer, Temení cꞌal Ahastarí. Jaꞌton ebꞌ tiꞌ yicꞌaal ix Naará ebꞌ. 7 Jaꞌ ebꞌ yuneꞌ ix Helá, jaꞌton: Séret, Jesoar cꞌal Etnán.

8 Jaꞌ naj Cos, jaꞌton smam naj Anub cꞌal Sobebá, yichmam cꞌal pax ebꞌ yicꞌaal Aharhel, scꞌaal Harum.

9 Jaꞌ naj Jabés, yel xacꞌal bꞌinabꞌil naj yintaj ebꞌ yuẍtaj. Jaꞌ xutx jix akꞌon yij sbꞌi Jabés, yutol jix yal jaxca tiꞌ: Yin wal syaꞌilal jix yun yali jun wuneꞌ tiꞌ, ẍi ix. 10 Jaꞌ naj Jabés tuꞌ jix oc yin eyilal tet Jehová sDiosal Israel, jix yalon jaxca tiꞌ: Jaach jin Diosal, chi wal ey jaach, tol cha wakꞌ ja yaxilal wibꞌan an, chi woche tol miman jin txꞌotxꞌ cha wakꞌa, chi woche cꞌal pax tol ey jaach oc wetoj yin jin ja colon el tet syaꞌtajilal, yet watxꞌ cꞌam chi wetne jin cꞌul, ẍi naj yin xa. Jix yakꞌon Dios masanil tzetyetal jix skꞌanaꞌ.

11 Jaꞌ naj Quelub yuẍtaj Suhá, ey jun scꞌaal chi yij Mehír; jaꞌ naj Mehír tuꞌ jaꞌton smam naj Estón. 12 Jaꞌ naj Estón, ey jun scꞌaal chi yij Bet-rafá, Paséah, cꞌal Tehiná. Jaꞌ naj Tehiná tiꞌ jix iꞌon el yich jun conobꞌ chi yij Nahas. Jaꞌton ebꞌ tiꞌ caan bꞌey conobꞌ Recá.

13 Jaꞌ ebꞌ scꞌaal naj Quenaz, ey cawan ebꞌ, jaꞌton: Otoniel, cꞌal Seraías. Jaꞌ ebꞌ naj scꞌaal Otoniel: Jaꞌton Hatat, 14 cꞌal Meonotai. Jaꞌ naj Meonotai, jaꞌton smam naj Ofrá. Jaꞌ Seraías tuꞌ, jaꞌton smam naj Joab, jaꞌton yichmam ebꞌ caan bꞌey spananil sjobꞌeal Harasim. Queytuꞌ yoc sbꞌi jun conobꞌ tuꞌ, yutol jaꞌ ebꞌ ánima caan tituꞌ, chi swaꞌne wan tzettaj yetal watxꞌ yili ebꞌ.

15 Jaꞌ naj Caleb tuꞌ, jaꞌ smam naj Jefuné, ey oxwan scꞌaal naj, jaꞌton: Ir, Elá cꞌal Náam. Jaꞌ naj Elá, jaꞌ smam naj Quenaz.

16 Jaꞌ ebꞌ scꞌaal Jahaleel, jaꞌton: Zif, Zifá, Tirías cꞌal Asarel. 17-18 Jaꞌ ebꞌ scꞌaal naj Esdras, jaꞌton: Jéter, Méred, Éfer, yetoj cꞌal Jalón. Jaꞌ Méred tuꞌ jix nupi yetoj ix Bitiá, scutzꞌin naj sreyal Egipto. Jaꞌ ebꞌ yuninal, jaꞌton: María, naj Samai yetoj naj Isbah, jaꞌton yichmam ebꞌ a Estemoa. Jacꞌalaꞌ Méred tuꞌ, ey junxa yistil, a Judá ix. Jaꞌ ebꞌ scꞌaal naj yetoj ix, Jéred yichmam ebꞌ a Guedor, cꞌal Héber yichmam ebꞌ a Socó, yetoj cꞌal pax Jecutiel yichmam ebꞌ a Zanóah.

19 Jaꞌ ix yistil naj Hodías, yanabꞌ naj Náham ix, jaꞌ yuninal ebꞌ, jaꞌton: Queilá smam ebꞌ conobꞌ Garmita, jaꞌ naj Estemoa smam ebꞌ Maacáteo.

20 Jaꞌ ebꞌ scꞌaal naj Simón, jaꞌton: Amnón, Riná, Ben-hanán cꞌal Tilón. Jaꞌ ebꞌ yicꞌaal naj Isí, jaꞌton: Zohet cꞌal Ben-zohet.

21 Jaꞌ ebꞌ yicꞌaal Selá, scꞌaal naj Judá; jaꞌton: Er smam naj Lecá, cꞌal Ladá, jaꞌton smam naj Maresá, yichmam ebꞌ chi mulna bꞌey chi waꞌxi an kꞌap chi yij lino bꞌey conobꞌ Bet-asbea, 22 cꞌal naj Joaquim, yetoj ebꞌ caan bꞌey Cozebá, Joás cꞌal Saraf. Jaꞌ ebꞌ tiꞌ jix ecꞌle yin yaawilal bꞌey Moab. Jix lawi tuꞌ jix meltzo ebꞌ bꞌey conobꞌ Belén, jatacꞌalaꞌ jix yalon can ebꞌ tzꞌibꞌlom yet peyxa tuꞌ. 23 Jaꞌ ebꞌ tuꞌ tzꞌajlom ebꞌ. Jaꞌ tituꞌ jix caey ecꞌ ebꞌ bꞌey conobꞌ Netaim, cꞌal bꞌey Guederá, jix oc ebꞌ yakꞌomaloj servil tet naj rey.

24 Jaꞌ ebꞌ scꞌaal naj Simeón, jaꞌton: Nemuel, Jamín, Jarib, Zérah cꞌal naj Saúl. 25-26 Jaꞌ xolilal ebꞌ yicꞌaal naj Saúl, jaꞌton ebꞌ tiꞌ: Salum, Mibsam, Mismá, Hamuel, Zacur cꞌal Simí. 27 Jaꞌ naj Simí, ey wajlajonwan ebꞌ scꞌaal yetoj wajwan scutzꞌin. Jal pax ebꞌ yuẍtaj naj xin, cꞌam txꞌial yuninal ebꞌ, yuxan ma wal chꞌibꞌ sbꞌisil ebꞌ jaxca ebꞌ yicꞌaal Judá. 28 Jaꞌ wan conobꞌ bꞌey jix caey ecꞌ ebꞌ tuꞌ, jaꞌton: Beerseba, Moladá, Hasar-sual, 29 Bilhá, Ésem, Tolad, 30 Betuel, Hormá, Siclag, 31 Bet-marcabot, Hasar-susim, Bet-birai, cꞌal Saaraim. Jaꞌton wan tiꞌ sconobꞌ ebꞌ masantaꞌcꞌal yet jix oc naj David yin reyal. 32 Eyto cꞌal pax joebꞌxa sconobꞌ ebꞌ, jaꞌton: Etam, Ain, Rimón, Toquen cꞌal Asán, 33 yetoj cꞌal masanil yaldeail wan conobꞌlaj tuꞌ masantaꞌcꞌal chi apni oc bꞌey Baalat. Jaꞌton bꞌey wan conobꞌ tuꞌ jix caey ecꞌ ebꞌ, jaꞌton slistail yicꞌaal ebꞌ tiꞌ.

34-38 Jaꞌ wan oj bꞌina tiꞌ, jaꞌton ebꞌ ichmame yeoc yin junjun tujan ebꞌ: Mesobab, Jamlec, Josías, scꞌaal Amasías, Joel, Jehú scꞌaal Josibías, yitxiquin Seraías; jaꞌ Seraías tiꞌ scꞌaal Asiel, yetoj cꞌal pax Elioenai, Jaacoba, Jesohaías, Asaías, Adiel, Jesimiel, Benaías, cꞌal Zizá. Jaꞌ naj Zizá tiꞌ, scꞌaal Sifi, yitxiquin naj Alón. Jaꞌton ebꞌ scꞌaal naj Jedaías tiꞌ, yitxiquin Simrí; jaꞌ naj Simrí tiꞌ scꞌaal Semaías. Jaꞌ ebꞌ tiꞌ, caw wal jix chꞌibꞌ sbꞌisil yicꞌaal ebꞌ, 39 yuxan jix too ebꞌ seyon ecꞌ bꞌey chi skeꞌ slow smeꞌ ebꞌ yetcꞌulal bꞌey chi aol cꞌu, catuꞌ jix apni oc bꞌey conobꞌ Guedor, bꞌey spananil stiꞌ jun jobꞌe. 40 Jaꞌ tituꞌ jix ilcha an yaax cꞌultaj yu ebꞌ, caw miman bꞌey chi skeꞌ slow noꞌ sjobꞌbꞌeal noꞌ ebꞌ. Caw miman jun txꞌotxꞌ tuꞌ, tzalacꞌulal xacꞌal jix yun scaey ecꞌ ebꞌ tituꞌ, cꞌam tzet jix iꞌon ebꞌ. Jaꞌton tituꞌ jix caey ecꞌ ebꞌ yicꞌaal naj Cam yet yalantoj. 41 Jal pax yul stiempoal naj rey Ezequías bꞌey Judá xin, jix apni oc jun tujan ebꞌ jix bꞌina tiꞌ, jix makꞌle cam ebꞌ ánima caan tituꞌ yu ebꞌ, yetoj cꞌal bꞌey bꞌulan ey ebꞌ, cꞌal sna ebꞌ, jix lawi ey masanil yu ebꞌ. Jaꞌ tituꞌ jix caey ecꞌ ebꞌ, yutol caw ey bꞌey chi low noꞌ sjobꞌbꞌeal noꞌ ebꞌ. 42 Yetoj cꞌal pax oj, ey junxa 500 ebꞌ winaj yicꞌaal Simeón jix too caey ecꞌ bꞌey txꞌotxꞌ tzalquiltaj txꞌotxꞌ yul yet Seír. Jaꞌ ebꞌ scꞌaal naj Isí, jaꞌton Pelatías, Nearías, Refaías, cꞌal Uziel jaꞌ naj tuꞌ eyoc syaawiloj ebꞌ. 43 Jaꞌ ebꞌ tuꞌ jix akꞌon lawoj el ebꞌ Amalecita eyto can ecꞌ tituꞌ. Jatax cꞌal yet tuꞌ jix caey ecꞌ ebꞌ tituꞌ masantaꞌcꞌal tinaniꞌ.