JONÁS YUUS TIMAUN AARMAU
Yuusa chichamen Jonás umirkachmau
1
Amitai uchiri Jonás naartin puju jakua nuna, Yuus chicharuk: 2 “Yaakat Nínive uunta nui wetá. Tumam jeaam nuiya shuar aina chicharkum Yuus chichaak: Tunaun shir pegkerchau takainamurin wii nekajai, tuma asan nu yaaktan emesrattajai, tusa Yuus tawai tusam ujakarta”, tusa tinaiti.3 Turasha Yuus timaunka umitsuk nugkani yaakat Jope tutainam wuwaiti. Tuma lancha yaakat Tarsis tutainam wetasa tepaun wainkauwaiti. Tuma nisha imanai Yuusan ikuki nitajai wetasa akikmak egkemawaiti. 4 Tuma Jonás wea asamtai, pachiachmaunam nasen Yuus akupkauwaiti. Turamu asa senchi nasenteak nayantsan senchi tsukatmamtikak lanchanka tsaiktatuk amaju. 5 Imatra asamtai, lanchanam shuar aina chumpirainaka shir senchi ashamainak nita yuusrimtairi ainan nase emegkakta tusar aujaina. Nuiyasha warí kijin ainan lancha takunti tusar utsagkaruiti. Turasha Jonáska lancha tesamu warí chumpitai init amaunam nui wayaa senchi kanar tepau. 6 Tuma tepettamaun lanchanam takau ainan apuri chicharuk:
“¡Kanú tepetsuk shintaarta! Tumam amina Yuusrum aujsata. Turam ina wait anentramar nasen emegkakti”, tusa tinaiti. 7 Tusa nitak pempentunaikar chichainak:
“Yana iturchatrig a tusar chikichik nakurutai nakuruami, tusar tuina.
Tusa nuna nekattsa nakurajkama Jonásain ejéniaruiti. 8 Turawar Jonásan chicharainak: ¿Urukamtai imajusha waitkakartam? ¿Warinma takauwaitam? ¿Amesha tuiya shuaraitam?” tusar tuina. 9 Tuinakai Jonás nitan ayak:
“Wika hebreo shuaraitjai. Yuus nayaimpinam pujuwa nu, nugkan tura nayantsancha najanawa nuna umirnaitjai.
10-11 Turasha Yuus turata tusa turutmaun umirtsuk tsekegkij nui wini iturchatka awai”, tusa tinaiti.
Nuna takai antukar senchi ashamkaruiti.
Tumawar Jonásan chicharainak:
“Yuus turamin akaigka ¡ju jutikamka waitkakartumaitsume!
¿Nayants senchi tsukatki wea ju mijaakti tusarsha isha amesha iturmainaitji?” tusar tuina.
12 Tuinakai Jonás chichaak: “Ni turata tusa turutmaun wii umirkachmau asa, Yuus nasen akupkayi. Tura asamtai nayantsanam wina ajapruatarma. Turutawakrumin juka mijaaktatui”, tusa tinaiti.
13 Takaisha lanchanam yujau aina kukar pemkami tusar senchi wiantaina. Tumainakaisha nayants nu senchi tsukatu asamtai, peemkacharu ainawai. 14 Jonás nayantsanam ajapawakrin, Yuus waittan nu senchi suramsaij tuina asar, Yuusan aujenak: “Ju shuara juna iturchattri atsurkaigka jinawarti tusamka tsagkamkartukaipa. Turasha ame uruk wakeram nu turusmek umikta”, tusa tiaruiti. 15 Tusar Jonásan nayantsanam ajapawaruiti. Turawarmatai nayants senchi tsukateamun mijaakuiti. 16 Tumamtai lanchanam takau aina chichainak: Yuuska nekas senchirtinaiti, tusa tiaru ainawai. Tuina asar nina eme anentas iiyainak nitanu ainan epeawaru ainawai. Nuiyasha yamai nagkamsarka ni eme anentsa iiyakur tuke epen ami tusar tiaru ainawai.
Jonás namakan ampujen egkemas Yuusan aujsamu
17 Jonásan nayantsanam ajapawarmatai, Jonásan iyashin kujarti tusa, namakan untan Yuus akupkauwaiti. Turamu asa Jonásan iyashin kujaruiti. Turam namakan ampujen tres tsawan, tura tres káshi egkemsauwaiti.*