2
Jonás namakan ampujen egkemas Yuusan aujeak: 2 “Yuusa, senchi waitakun yainkata tusan amina aujsamiajme. Turamu asam nu antukam ame yainkamiame.Pegke jakun aujsamiajme.
3 Ame tsagkamruku asaakmin,
lanchanam takau aina nu nayantsa kunarin ajapruawaruiti.
Entsanam nanasan wekaimiajai,
tumai ame akupkamu entsa senchi tuku tukuri nagkaitimayi. 4 Nayantsanam ajapruawarmatai, nigka winaka nakitrawapi tu enentaimmiajai. Tumakun wina Yuusrun ememattasa iruuntai jeanmagka atak wayaanka, emematchatnapitja tu enentaimramjai.
5 Nayantsanam shir init tepeamjai,
tura initia nupa alga tutai aina mukaruin pempentrarmiayi.
6 Tura init tepea asan nugkanam jeamiajai,
tuma asan achikmauwa numamtuk nekapeakun pegkesha jinkishtinapitja tusan timiajai. Turasha Yuusru, wii jamainnum ame yainkauwaitme.
7 Pegke jakun apuru amini enentaimramiajai,
Yuusru, yainkata tusan amina aujsamiajme.
Tura yainkata tusan wii seammau nayaimpinmag pujusmek anturtukuitme.
8 Shuar nita yuusri ainan eme anentas iin aina nuka,
ameka yaitsuk inaiyame.
9 Turasha wika amina emematatjame.
Tumakun shir aneasan kantamruattajme.
Tura amina eme anentsa iiyakun tagkun maan ajamnaisatnaitjai,
tusan tinaitjam nuna imatiksanak umiktatjai.
Yuusru, ameketme jakai tusam yaigkratnumka”, tusa tinaiti.
10 Takai Yuus namakan nayantsan yaikmirin Jonás imakta, tusa tinaiti. Timau asa Jonásan namak yaikminam imakuiti.