HABACUC
Yama nagkamchak Habacuc Yuusa urukamtai aminu ainatincha yaigkrattsum tusa timau
1
Yuus chicham akattram etserin chikichik shuar Habacuc naartin puju jakua nu Yuusjai chichaak:2 “Yuusa, shuar magkartin aina nu,
aminu ainatin mantamainak waitkarmainakai
yaigkratkata tusan tuke untsu pujurjame,
turasha ameka ii ainatinka yaigkrattsume.
3 Shuar aina pegkerchau amajainak waitkasarti tusam
tsagkamram nuna nekamain nekapeatsjai.
Magkartamu, yaakat aina tsayamu,
jianiamu tura maaniamu aina nuka
pegkesha agkatsui
ashi nugkanam awai.
4 Chicham umiktina nunaka pegkesha uminatsui,
tumaina asar shuar ainaka arantuniasarkesha inainatsui.
Shuar tunaun takau aina nu, shuar tunaun takachu ainan waitkainawai,
apu chichaman iwarin aina nusha
chichamnaka metek iwarainatsui”, tusa Habacuc Yuusan tinaiti.
Habacuc timaun Yuus umiak shuar pegkerchau ainan waittan susamu
5 Tama Yuus chichaak:
Chikich shuar aina urukainawak
enentaimtusrum iistarma.
Nitanka waittan wii suajai,
nuna pachisar chikich aina ujatmainakaisha
atumka nekaspapita tumain ainatsrume.
6 Babilonianmaya suntar pegkerchau asar,
chikicha nugke ainan atankiar
nitanu amajsartasa
Nitaka ememau asar pegkerchau ainan takainaksha,
pegkerchauna takája tu enentaimchau ainawai.
8 Nita caballori ainaka uun yawa nagkasau
senchi tseken ainawai.
Uun yawa shuar atsamunam puju
senchi kajen aina nuna nagkasau ainawai.
Tura chuag jakau tepaun wainak yaki jeashat
shuari ainanka ashi ijinki wenawai.
Tumaina asar pegkesha ashamkartuinatsui.
Tura nita shuar achika yarumtai ainaka yaikim
tura chikich shuar eme anentsa iitai
ainancha wishikainawai.
Yaakat pegmarmau aina nunaka
pegke imanchau iiyainawai.
Yaikmin irumrar nui umak pujusar
númi ainan ijinna iman ainawai.
Iman ainaksha nitak Yuusa iman anenmamaina
asar pegkerchau wenawai.
Habacuc urukamtai yaintsum tusa Yuusan ataksha timau
12 Apu, ameka Yuus pegkermaitme,
ameka tuke pujuwaitme,
ameka israelita ainati ememattaiyaitme.
Ametme ii ainatin ayamkartinmeka,
turasha yamaika ii pegkerchau takasu asaakrin waittan susarti tusam
Babilonianmaya suntar aina senchirtin amajsaume.
13 Ameka shir pegkermaitme, iman asam
pegkerchaun taká pujuarti tusamka wakerichuitme.
Tura tunausha nakitnaitme.
Tumau asam pachiskeka inaisaipa,
nuiyasha shuar shir pegkerchau aina nu
maawarti tusamka ii imanisa pegkerchau takachu ainatinka tsagkamkartukaipa.
14 Namak aina tura kuntin aina apuri atsurmau asa
pachimnaik yujauwa numamtuk,
ii israelita ainatinka amajkartusume.
15 Turukrata asaakmin namak neylonjai, turachkursha
redjai achitia numamtuk, Babilonianmaya shuar ainaka
ii ainatinka yupichu achirmainaji.
Ina turutmaina asar nitaka shir anenawai.
16 Shuar namakramin aina,
namakan nukap juuk irumraru asar
nita redtri ainan, tura nita neylonri ainancha
eme anentas iiyainawai.
Turuinak tagku ainan maa epenak ajamnaiyainawai,
nuiyasha inciensoncha epenawai.
17 Redjai namak achitia numamtuk,
¿Babilonianmaya shuar aina ina
wait anentramtsuk mantamainaj nunaka
tuke mantamak pujuartata? tusa Habacuc Yuusan tinaiti.