Habacuc seammaun Yuus umirkamu
2
Ii waitamun pachisan amina ujaku asan,shuar wayawai tusa suntar
waitin kuitamin yaki waka iima
ekemna numamtuk, Yuus yainkatpash tusan
amina nakakun pujurtatjame, tusan timiajai.
2 Tusa tama Yuus wina chichartak:
Wii amina titatjam nu,
kaya tablaya numamtin najanam
shir wainka aujmain aarta.
Nu turamu asamtai chikich ainasha
yupichu aujsarti.
3 Wii tajam nu wári uminkashtin akaisha aarta.
Turasha nuka tuke uminkattawai.
Wii tajam nu wári uminchakaisha umamkesam nakasta.*
4 Wii amina aarta tusan tajam nuka juwaiti:
“Shuar pegkerchau aina nuka nitak eme anenmamin ainawai.
Turasha shuar wina nekaspapita tusa turutaina nuka wina tuke umirtuinawai”.
Tumaina asar nitaka jinachartatui.*
5 “Shuar pegkerchau aina nu chikich shuar ainan
vinon anamkar mainawai,
tura nitancha chikich aina mainawai.
Shuarka ememau ainawai,
tumau asar ayamchau ainawai.
Nitaka chikich shuar ainajai maanikar
nepetmakar nukap nugkan atainiartasa
wárimasar wu ainawai.
Turasha jakau matsamtai shuar nukap jinakaisha
pimichua numamtuk,
shuar maatnaka inaimain nekapenatsui”, tusa Yuus tinaiti.
Yuus tumatnaiti tusa timaun Habacuc aarmau
6 Turasha nita nepetkamu aina nu,
nitanka wishikrartatui.
Nuna turuinak nitan pachisar kantamainak:
“Chikich shuar ainan waríri,
atumnauchu aig atum yarurkarum
wiakach jasrum pujarum nunaka wait anentajrume
Yuus waittan atumnaka suramsattarme”.
7 Atum yuwimkamu aina pachiachmau, kaunkartinaiti.
Tumawar akirkata tusa turamiartin ainawai.
8 Atumka shuar nukap
nugkanmaya aina ijinawaittrume,
turasha ashi ijinachmau pujuina nu,
atumnasha yamai ijitmattarme.
Nuna atumin turutmattarme nuka,
atum nukap shuar wait anentsuk ijinkurum,
nita yaaktari ainasha tsairamu asar turutmattarme.
9 ¡Atum, chikich shuar aina ijinkurum
waríri aina yarurkarum,
atum shuar aina wiakchamtikarum,
jutikan shir pujuschainjash tu enentaimsarum
jea yumpuunmainchau pegker jeamkarum pujarme,
tumakrumincha chikich aina waitkasu asaakrumin
atumnasha Yuus waittan suramsattarme!
10 Atumka nukap shuar aina ijina asarum,
atum shuar ainaka inatsakurme.
Tura chikich shuar ainan ashi ijinatjai
tusa tu enentaimrume,
turasha Yuus atumin waittan suramuk ijitmattarme.
11 Yaakat pegmarmau aina,
tura jea wiyagke ainajai
atum pegkerchau takasmau
ainan pachisar shuara numamtuk chichartatui.
12 Atum, shuar ijinkurum
tura nita waríri kasamkamu ainajai
yaakat iwarkarum pujakrumnasha
atumnaka Yuus waittan suramsattarme.
13 Atum takasurum nuka
atumka antrarum takasurme.
Atum takasmau aina nunaka
Yuus ashi ekeemartatui.
14 Entsa nayantsanam
aimnauwa numamtuk,
ashi nugkanmaya shuar aina
Yuus senchirtina nuna nekawartin ainawai.
15 Atumka shuar atumi nugken tiju
matsamin aina vino drogajai pachimra
a akuarum anamkarum misu jasmatai
wainkamu asar natsamainawai,
nu tumau asaakrumin Yuus atumnaka
waittan suramsattarme.
16 Atumka eme anentamka achattarme,
chikich shuar aina anamkarum misu jasarmatai
kati mushuke tsupirkachmau waitkamu asar
natsamainawai. Nu tura asaakrumin
Yuus atumnasha imanchauch amajtamas inatsatmaktatrume.
17 Nain Líbano tutainmaya
kuntin aina, tura shuar ainasha
ijinawaitrume.
Nu tura asarum atumsha
tumasrumek waitat juakrum jinattarme.
18 ¡Ina yuusri atii tusa shuar
najanamua nuka pegkesha yainmatsrume!
Ina yuusri atii tusa najanamun
juwaiti Yuuska tusa tauka waitrawai.
19 Yuus atii tusa numijai,
turachkursha kayajai najanamu,
tura orojai turachkursha jiru plata tutaijai
ukatkamu akusha, chichachu tura iwákchau
wainiayatrum chicharkurum:
“¡Shintarta! ¡Nantakta! tusarum tau asarum
waitat jukittarme”.
20 Turasha Yuuska nina pujutairi pegkera
nui pujawai:
¡Ashi nugkanmaya shuar ainaka nina emtin
chichatsuk pujusarti!