Habacuc kantamamu
3
Habacuc Yuusan chicharuk jutikas tinaiti.2 Apuru, amina pachitmas chichainamun,
tura ame turamuram ainan antuku asan,
amina eme anentsan emematjame.
Ina uuntri aina yaunchuk yai jakuitam
turusmek yamai ii ainatin kajerkartuku akumsha
wait anenkarturam yaigkratkata.
3 Ina Yuusri pegkermeka ametme,
Temánnumia winame,
nain Paránnumia winame.
Amina imantrumka ashi nayaimpinam awai,
ashi nugkanam aminka emematramainawai.
4 Pem etsanna numamtuk
etsantram tsaaptin jasam winitnaitme.
Pem etsanna numamtuk amina uwejminia
winchamtin etsantar jintinaiti.
5 Ame taatin tsawam jeakaigka
shuar aina jatan achimakar
nukap jartinaiti.
Tumainak nukap shuar aina jinawartinaiti.
6 Ame taam nuig pujakminka nugka urkatnaiti,
ame iiyamka shuar ainaka
ashamramainak kurainiartinaiti.
Nain yaki wajaku aina,
tura nain yaki wajakchau ainasha
yumpuntrartinaiti.
Turasha amina chichamrumka tuke atinaiti.
7 Cusánnumia aina waitu pujuinan wainkamjai.
Tura Madiánnumia ainancha
senchi sapijmainak kura pujuinan wainkamjai.
8 ¿Apuru, entsa aina kajerkatnukaitam?
¿Apuru, nayants ainasha senchi kajerkatnukaitam?
¿Tuma asamek caballo ainanam entsamkam
nuiya maaniaku wekatai carreta ainanam egkemrattam?
9 Shuar maaniattsa flechari ainan umina
numamtuk, amina shuarum aina nepetkittsam umintsaume.
Nugka ainanmaya entsa jiniarti tusam tinaitme,
tusa timau asa entsa aina nugkanmaya jintrauwaiti.
10 Nain aina amina waitmakar urkartinaiti,
yumi shir senchi yutuktinaiti.
Tura nayantsasha senchi tsukateak uuttinaiti.
11 Ame winakum pem etsanna numamtuk,
etsantram winau asaakmin,
etsa tura nantusha etsantrachartinaiti.
12 Ame kajeakmeka ashi nugkanam wekasatnaitme,
tura shir senchi kajekmeka nugka uunnumia shuar
ainasha nepetkatnaitme.
13 Aminu aina,
tura apu atii tusam ame etegkawaitam
nusha yaigtasam taatnaitme.
Shuar pegkerchau aina nuna apuri
ame nepetkam nina takatairijai
emegkaktinaitme.
14 Ii ainatin ayamrumamaintri atsuru iturmainait
numamtuk, ashi ijinami tusar flecha ainan jukiar
nase senchi nasenna numamtuk, caballo ainanam
entsamkar jatetmakartinaitji.
Turasha nita apurigka ame nita flecharijaig maatnaitme.
15 Caballonam entsamka wekamaina numamtuk,
ashi entsa aina nuna nagkasau nayants
kuna nui pachinkam wekasatnaitme.
16 Nu ainan ashi antukmiajai,
tuman ashamakun wenersha
tura ashi iyashrujai kuragmiajai,
tumakun ashi iyashruin kakamainchau jasmiajai.
Turasha ina waitkarmainaj nu
tsawan jeamtai ame waitat susartin asaakmin
wika nuna umamkesan nakajai.
17 Higo aina nerenachkaisha,
uva aina nerenachkaisha,
olivo aina nerenachkaisha,
ina ajari ainanam árak aina nerenachkaisha,
nuiyasha vaca aina tura oveja ainasha atsurtamkurincha,
18 ame wina uwemtikrin asaakmin
shir aneasan tuke ememattatjame.
19 Wina Yuusru,
ame winaka senchimtikrame,
jápa senchi wekaina iman amajtame,
tura nain ainanmasha uwekateame, tusa Habacuc Yuusan tinaiti.