2
Yuus atumin chichartamuk:“Moabnumia shuar ainaka pegkerchaun nukap takasarai.
Edomita apu ikusmaun tainiar ukunch ainan jukiar
ekeemakar yuku amajsaru ainawai.
Turawaru asarmatai waittan sutsukka inaisashtatjai”.
2 Tuma asamtai Moab nugkanam jiin akuptukartatjai,
turan yaakat aina nui irunun aeseakun
apu pujusa inamtairi aina
yaakat Queriotnum iruna nuna aestuktatjai.
Moabnumia shuar ainaka
maaniaku untsummau,
tura kachu aina umpuinamunam jinawartatui.
3 Nita apurinka, chikich apu ainajai
nita wainmaunam ijitawartatjai.
Wika nekas uminkatnun tajai, tusa Yuus tawai tinaiti.
4 Yuus atumin chichartamuk:
“Judá nugkanmaya shuar ainaka pegkerchau
ainan nukap takasarai.
Wina chichamur umiktarma tusan tinaitaj nuna umitsuk,
nita uuntri aina nekas yuuschaunak eme anentas iiyainak emematujakarua nuna,
ememataina asarmatai waittan sutsukka inaisashtatjai”.
5 Turakun Judá weantu
yaaktari ainan jiin akuptuktatjai.
Nu apu pujusa inamtairi aina
yaakat Jerusalénnum jea aina
iruna nunaka ashi aestuktatui.
Israel shuar ainan waittan susartatjai tusa Yuus timau
6 Yuus atumin chichartamuk:
Israel shuar ainaka, nita weantu pegkerchau
takaschaunak senchi waitkainawai.
Kuitri pegke atsurmau asar yuwimkartukmaurin,
tura sandalia jukimunkesha akikmamainchau asarmatai,
inatai arti tusar suruinawai.
Nuna turuina asarmatai waittan sutsukka inaisachartatjai.
7 Tura israelita aina nuiya
nita weantu wiakchachu ainan,
yaimaintri atsurmau aina nuna
waitkainasha ainawai.
Tura pegker aina nuna takatnaka nakitainawai.
Uchi nina aparijai chikichik nuwanak
jimartukar takainawai.
Tumainak wii pegkeraitaj nunaka umirtuinatsui.
8 Shuar kuitrinchau asa
yuwimkartamurin akikmamainchau ainan
yuwimkartam nu akikmakum jukimnum, tusa
jaanchri juruki ikursamu ainan
nita yuusrin eme anentas iiyainak,
tagku aina maa patasa epetainam,
tura nita yuusri iruuntra ememattai jeanam ainkar
tepesar yutain yuinawai.
Nitaka vinon sumakar,
nita yuusrimtai iruntura ememattai jeanam
iruuntrar umarartasa, shuar yuwimkartachunak akikmakta
tusar kuitan juruinawai.
9 Amorreo shir nayau,
tura shir kakaram ainakaisha
atumsha wainmaunam ashi ijinawaitjai.
10 Wii atumnaka Egipto nugkanam pujarmin
jiiran yaruakan amorreo ainan nugken amastasan
aya nugkanmag cuarenta uwí uwekasuitjarme.
11 Atumi uchiri aina nuiyan
wina chichamrun etserin artinnasha etegkauwaitjai.
Tura nazareo artinnasha akantrauwaitjai.a
Nuna wii atumin tajarum nuka nekasaiti, tusa Yuus turamrume, tusa tinaiti.
12 Turasha atum, israelita ainatiram,
nazareo aina vino umartarma tusarum imatrujakuittrume.
Tura wina chichamrun etserin ainasha
Yuus pachisrumka etserkairpa tusarum tujakuitrume.
13 Nu tura asaakrumin carrete trigo aimkamu weak
nugkan umuchna numamtuk,
atum wajamunam nugkan wii umuchkattajai.
14 Senchi tseken ainasha, tsekegkiarka uwemrachartatui.
Kakaram ainasha kakarmachu jasartatui.
Tura maanitan yacha ainasha ayamrumakchartatui.
15 Tura flechan ekentan yacha akusha,
senchi tseken akusha,
caballonam tsekenaksha uwemrachartatui.
16 Nu tsawantinka
maanitan yacha akusha,
tsekegkin uwemratjai tusar
maanitai aina takakmauri ainanka
utsagkar ikuinak tsekegkiartin ainawai.
Wii taja nuka metek uminkattawai, tusa Yuus tawai tinaiti.