JOEL YUUS TIMAUN AARMAU
Manchi aina kaunak ashi árak ainan amuktatui tusa Yuus timau
1
Amina pataim israelita aina chicham ujakarta tusa Yuus timau asa, Petuelan uchiri Joel ajakua nu nina patai israelita ainan chicharuk:2-4 Apu ainatiram,
tura ashi shuar ainatirmesha antuktarma,
cuatrowa imania manchi aina nisha iimtin
shir nukap kakekar árak ainan amukarai.
Nekas yaunchuk atumin uuntri matsamajakarua nuisha jumamtin
wantinunka pegkesha wainujakcharu ainawai.
Ju pachisrum atumin uchiri aina ujaktarma,
tura atumin uchiri nina uchiri artata nuna,
tura nina tiragke atak artata nunasha ujakartin arti.
5 Umutai vino atsuttawai.
Tumatin asamtai vino umarum nampen ainatiram
shintaarum útkurum matsamsatarma.
6 Suntar aina maaniattsa shimumaina numamtuk
manchi aina shir nukap
ina nugken kaunkarai.
Nuna nai ainaka
shir atsakamu tura naisha
leónka naiya numamtuk ainawai.
7 Imanu asar ajanam vid aina irunun
higo aina irununcha ashi tsupirarai,
tura kanawe ainancha ashi pakarar
seaptinchau amajsarai.
8 Turawaru asarmatai, nuwa natsa
ni aishrinatin chichasmau jakamtai,
wake mesemar nekapeaku nugkutain jaanchin nugkur útuk
pujuwa numamtuk enentai ichichtumainchau útainawai.
9 Numamtuk sacerdote ainasha,
Yuusnau atii tusa akankamu aina,
vino, trigo, cebada, nu aina atsakai
shuar aina Yuus ememattasa iruuntai jeanam
ejeainachu asamtai útu matsatainawai.
10 Ajanam árak irunuka kakaru,
tuma asamtai trigo, vino, aceitesha
pegkesha atsusuiti.
Tuma asa aja ainaka aya nugkak jasaruiti.
11 Atum ajanam takau ainatiram,
atumi arakri trigo aina tura cebada aina
jina ashi kakaru asarmatai
wake mesemar nekapeakrum úttarma.
12 Vid aina, higo aina, munchi aina,
kampanak aina, manzana aina,
tura chikich numi ainasha
ashi kakarai. Tumawaru asamtai shuar ainaka útainawai.
Tumainak shuar ainaka shir aneasa pujamunka inaiyainak
wake mesemar nekapenawai.
13 Vino aina, trigo aina tura cebada aina nuka atsuinawai.
Tuma asamtai Yuusnau atii tusa ejétuinatsui.
Tuma asamtai Yuus ememattasa iruuntai jeanmagka
iruuntra Yuus emematmauka pegkesha atsawai.
Nu enentaimsarum, atum sacerdote tagku aina maa patasa epetainam Yuus takarin ainatiram
wake mesemar pujakur nugkutai jaanch nugkurum
káshi uu úteakrum tsawagtarma.
14 Apu aina, tura ashi shuar aina untsukrum,
ina Yuusri ememattasa iruuntai jeanam
iruuntrarum yurumak yutsuk pujusrum
Yuus aujsatarma, tusa tinaiti.
15 ¡Yuus tatnuka tsawanka ashi jeaktak jasai!
tunau takat inaitsuk pujakrinka
árak ainan nuken amutak ashi ijinayi.
Tuma asamtai Yuus ememattasa iruuntai jeanam
iruuntrar shir aneasar takatai aya nuka atsawai.
17 Yumi yutatsui, tuma asamtai trigo arakmau ainaka ashi kakaar jinawaiti.
Tuma asamtai trigo juka egketai ainasha mamukaruiti.
18 Yumaintri atsurmau asa vaca aina,
oveja ainasha tsukai waitainak útainawai,
tagku ainaka chirichiri atsurmau asar
tsukai jinuinawai.
19 Nupa ainan tura númi ainancha ji keak
aesa ijinayi.
Yuusa wait aneasam yainkratkata.
20 Entsa aina kuyukar muku jasarai,
tura ji keak nupa ainan ashi ijinayi,
Tuma asamtai kuntin ainasha amina yainkati
tusa seatmainawai, tusa tinaiti.