“Atum tunau takákrum

waitakrumsha,

tunau takat inaiyakrum atumi Yuusri umirkurum ememattarma”.

2 Tumakrum tunau takasmaun Yuus tsagkurturti tusarum jutiksarum titarma:

“Ii pegkerchau takasmau aina ashi tsagkurkarturta.

Turukratawakmin ame emematku ii kantammauwa nuka,

amina pegker enentaimtikramsati”.

3 “Asirianmaya shuar ainaka inka uwemtikramain ainatsji,

nuiyasha caballo ainanam entsamkar tsekeakrisha uwemmain ainatsji.

Ii najanamu aina nuka yamaika ina yuusriyaiti tusarka tichattajai.

Mitaik ainasha ame wait anennaitme tusarum titarma”, tusa Oseas israelita ainan tinaiti.

Wii atumin kajerkamunka yamaika tsagkurjai. Tuma asan

wii atumin senchi aneajrum nuna iwaintuktatjarme.

Nu turamu asarum atak awenarmeka chicham umichuka achattarme.

5 Israel shuar ainaka sana numamtuk artinaiti.

Arak lirio tutai yagkurina numamtuk artinaiti.

Númi líbano tutai kagkape nugkanam

init shir achimrauwa numamtuk artinaiti.

6 Tura kanawesha olivo kanawejai

metek pegker atinaiti.

Cedro kugkuntijai metek artinaiti.

7 Israel shuar ainanka wii ataksha kuitamkartatjai.

Turamu asar iturchatri atsurmau pujusartatui.

Tumaina asa trigowa numamtuk tsakartatui.

Vid yagkurina numamtuk artinaiti.

Umutai númi líbano tutai pegker kugkuina numamtuk artinaiti.

8 Israelita ainata,

atum yuusrimtai aina nuka inaisatarma.

Winau ainan kuitamnunka wiyaitjai,

nita seatainakaisha wii suwaitjai.

Númi pino tutai wakenmarin pujusar ayamaina

numamtuk wiyaitjai nitan ayamtikmainnaka.

Warí pegker ainanka winiyan jumain ainawai.

9 Shuar yacha tura wári unuimauka,

wina chichamrun etsermaun antukti.

Ashi wii takámu aina nuka shir pegker ainawai.

Nita pegkeran takainakai nuna iisar chikich ainasha

pegker aina nuna takamain ainawai.

Shuar pegkerchau aina

nuka pegkerchau aina nunak takainawai.