DANIEL YUUS TIMAUN AARMAU
Nabucodonosor Judánmaya ainajai maniak nepetkamu
1
Joacim Judá nugkanmaya apu jas tres uwí inamuk pujai, Babilonianmaya apu Nabucodonosor nina suntaari ainajai Jerusalénnumia shuar ainajai maaniawartasa yaaktan tentakaru ainawai. 2 Yuus Judánmaya apun Joaciman Nabucodonosor maniak nepetkati tusa tsagkamkauwaiti. Tura asamtai apu Nabucodonosor maniak nitan nepetak apun achik, tura nuiya shuar ainancha achik yaruakuiti. Tura nuiyasha Yuus ememattasa iruuntai jeanam warí Yuusnau atii timau aina irununcha yaruakuiti. Tura nita yuusri aina nu warí pegker ainan anajmatamu ikutainam ikusaru ainawai.Apu Nabucodonosor Danielan achik juki Babilonianam ejému
3 Apu Nabucodonosor nijai takau ainan apurin Aspenaz naartin ajakua nuna chicharuk: Israelita natsa achika ikankamu aina nuiya apu weantu ainanmaya, tura shuar eme anentsa iitai ainanmaya 4 natsa pegkeri aina, kakaram aina, jamamtinchau aina, wári unuimarminu aina, ashi nekau tura wina pujutairuin pujus takamain aina iisam etegkawarta. Turam Babilonianmaya chicham tura ashi ii unuimatairi aina nu pachisam jintintawarta. 5 Nuiyasha Nabucodonosor chichaak: “Wii yutataj nunak nitasha ashi tsawantin yuarti, tura umutnasha nunak umiarti. Tura tres uwí jintintaawarta. Turam apu takatainam takasarti tusam wini itawarta”, tusa tinaiti.
6 Chikich natsa ajakarua nuiyagka: Daniel, Ananías, Misael tura Azarías. Nuka Judá weantu ajakaruiti. 7 Nu ainan naarin apu Nabucodonosorjai takau ainan apuri Aspenaz yapajtak: Danielnaka Beltsasar anaikauwaiti. Ananíasnaka Sadrac anaikauwaiti. Misaelnaka Mesac anaikauwaiti. Tura Azaríasnaka Abed-nego anaikauwaiti. 8 Turasha Daniel apu yutairin tura umutaincha umaknaka pegkerchau jasaij tau asa, apu Nabucodonosorjai takau ainan apurin chicharuk: “Tagku namagke tura umutai vinosha umartarma tusam tukartipa”, tusa tinaiti. 9 Nuna tusa takaisha, Yuus Danielnaka yayá asamtai, apu Nabucodonosorjai takau ainan apuri kajerkachuiti. 10 Turasha apu Nabucodonosorjai takau ainan apuri Danielan chicharuk: “Apu timau yutsuk tura umutsuk pujakrumka watsartatrume. Tuma arumin apu atumin waitmak, wina mantuawai tusan ashamajai”, tusa tinaiti.
11 Daniel, Ananías, Misael, Azarías nu aina ame kuitamkata tusa apu Nabucodonosor nijai takau ainan apurin apujsamu pujaun, Daniel nuna chicharuk:
12 “Tagku namagkegka yutsuk tura umutai vinosha umutsuk, árak aina nuke yuakur, tura aya entsak umusa pujusar, diez tsawan ejéttsar wakeraji. 13 Tura nu diez tsawan jeamtai, apu yutairi ainan yuawaru aina nujai apatka iikrattsata. Turam ame iturkattsamek wakeram turusmek umikta”, tusa tinaiti.
14 Tusa takai suntar ainan apuri Daniel timaunka ayu tusa diez tsawan nakasuiti. 15 Tinu asar natsa aina apu yutairin yutsuk tura vinoncha umutsuk, aya entsanak umasar pujusar diez tsawan ejéniaruiti. Tumainaksha apu yutairi yuinan inagkas jamamtinchau, tura kakaram ainan wainkauwaiti. 16 Tura asa yutain yuati tura umutai vinosha susatarma tusa apu timaunka sutsuk ima legumbre tutai aina nunak, tura aya entsanak sujakuiti.
17 Nu natsa cuatro ajakarua nunaka yachamatan, tura aarmau ainancha aujas nekatnun, Yuus yaigkuiti. Tura Danielka karanam wainkamuri ainan shintar etserujakuiti. 18 Apu timau tsawan jeamtai, natsa ainan apu Nabucodonosorjai takau ainan apuri juki apu Nabucodonosor pujamunam ejénaiti. 19 Turamtai apu Nabucodonosor natsa ainan ashi irumar, chiki chikichik chichasuiti. Tura Danielan, Ananíasan, Misaelan, tura Azaríasan nu ainan chikich ainan nagkasau asarmatai, nitan ima pegker iisuiti. Tura asa wijai takau arti tusa nina jeen matsasuiti. 20 Apu ni nekattsa wakeramuri akaigka nu natsa ainan inias tuke nekajakuiti. Nu natsa ainaka chikich shuar nekamin aina, iwishin aina, tura atak atinan nekau aina apu jeen matsamin ainan nagkasau shir yacha ajakaruiti. 21 Tura Danielka Babilonianmag pujus ashi apu ainajai takak pujai, Ciro apu jasuiti.