jeanam umputai umpuartarma.

Shuar nui matsamin aina nuna antuinak sapijmainak

kurainiarti.

Yuus tatnuka tsawan ashi jeawai.

2 Nu tsawanta nuka shir kashi atinaiti,

tura nu tsawanta nuigka yuragkim shir kashi jastinaiti.

Suntar aina shir nukap asa, nepetmainchau jas,

nain ainanam shiaktatui.

Tumawar etsa káshikmas etsantuk kuamkan enetna

numamtuk nain ainan ashi enetkattawai.

Nuka yaunchuksha imanika waittsashmaun

tura atakea nuisha imanika waitamuka achatnaiti.

3 Nu imana nu jui tattsa winakka ji keajai metek ashi

aesak nagkamawai.

Tura nu tatsaigka nugkaka shir pegker ayayi,

nu tamtai nugkaka aya nugkak jasai.

Tura nuna uwemtumainka pegkesha atsawai.

4 Nu manchi aina nuka caballowa numamtin ainawai,

tura shuar maanitan yacha caballonam entsamkar wári

shimumaina numamtuk utsaneawai.

5 Kuamag utsanak tsekeamuria nuka,

carro wenak nugkan kuwermamtikna numamtuk jawai.

Tura nuka kaaku keak tsachir jawa numamtuk jawai.

Suntar aina nita shuarijai maaniattsa shir nukap uminas awa

numamtuk ainawai.

6-9 Nu manchi aina nuka kasa numamtuk iimtai

chigkamu amaunam nunii wakar jeanam utsanainawai.

Suntar ainajai metek yaakat pegmarmaunam tujitsuk

utsanainawai,

tumaina asar yajaka wetsuk, nuiyasha

ukunmagka wakettsuk,

nita wenamunmag nuke wenawai.

Tura nagki aina shir nukap eketmasha pampaatsuk imanuk

shimuinawai.

Shuar aina manchi ainan wininan wainkar senchi

ashamainak yapigka puju jasar kurainawai.

10 Nugkasha tura nayaimpisha senchi urtinaiti,

tumakai etsasha tura nantusha etsantsuk káshi jastinaiti.

Tura ya ainasha etsantrachartinaiti.

11 Nu ainaka Yuus chichakmatai wininawai,

nu aina nuka nina suntaari senchirtin ainawai,

Ni tatnuka tsawan ashi jeawai.

Yuus winamuka shir ashammain atatui,

imanun katsuntar pujumainka pegke atsawai.

Tumarum yaunchuk umirtin ayarum tumasrumek,

ima winak enentaimtursarum emematritarma.

Tumakrum yurumak yutsuk pujusrum,

senchi wake mesemar enentaimsarum úttarma”.

13 Tunau takat inaiyakrum

ina Yuusri, umirkatarma.

Wake mesemar pujakrum janchrum jatsuk,

pegkerchau takastasa enentaimak aina yapajiatarma.

Yuuska kakakchauwaiti, wait anenkartinaiti.

Tumau asa shuar ainan waittan susartajai tusa tiisha

waittanka sutsuk wait anentar tsagkurnaiti.

14 Tumau asa waittanka akuptsuk,

atumin pegkernum yainmak ni anenkan susatnun trigo ainan,

vino ainancha shir nukap suramsachaintrumeash, tusa tinaiti.

15 ¡Jerusalénnum trompeta umpuartarma!

Yurumak yutsuk pujusmi tusarum chichamruktarma.

jaanchrin shir nijaawarti.

Shir mainiar iruuntrarti.

Uchi ainasha,

tagku aina maa patasa epetainam kaunkar wajasar,

útainak Yuusan aujainak:

“Yuusa, ii aminu ainati,

tunau takasmau tsagkurkarturta.

Tura chikich shuarkesha wishikrarti tusamka

tsagkamkartukaipa,

chikich shuar aina nepetkarti tusamka

tsagkamkartukaipa,

shuar pegkerchau aina tukeneas wishikramainak nita Yuusrigka atsurainawai.

Tumau asa nitanka yayainatsui tusar tumain ainawai”.

18 Tusa imatkurin Yuus ju nugka juna anea asa,

tura ni etegkamu ainatin wait anentramar tsagkurtamrattaji.

19 Tura Yuus chichartamuk:

“Trigon, vinon, aceite ainan shir nukap akupturtatjai.

Turamtai nuna yuinak shir aneasar pujusartatui,

tura nita shuari aina wishikrarti tusanka yamaika tsagkamkashtatjai”.

20 Entsa nujinmani shuar matsamin aina,

jinawar iyashi kaukar nu nugkanmagka

Mar Muerto tutainmasha,

nayants Mediterráneonmasha mejettawai.

21 Nugka, ameka wii etegkamuitme,

ashamkartukaipa.

Nuka tumatsuk shir aneasta.

Yuus atumin ayamturmak yaunchuksha wainu jakchamun

wainchatai ainan iwainaktatui.

22 ¡Kuntin ainatiram ashamkartukairpa!

¡Chirichiri ataksha nupakartatui!

¡Númi ainasha nukap nerekartatui!

¡Tura uva aina, higo ainasha nukap nerekartatui!

23 Jerusalénnumia ainatiram

shir aneakrum ina Yuusri, ememattarma.

Yaunchuk yumin yutumtiku jakua turusag

yamaisha yumin yutumtikattawai,

nina anegkrattairin iwainak

yagkur aina yagkurutai tsawan jeamu nukapek yumin yutumtiktatui.

24 Tumakai trigo, vino, aceite ainasha

shir nukap artatui.

25 Atumi arakrin manchi aina amukarai.

Arakrinchau juakurme,

yaunchuk arakrintin ayarum imanuk

ataksha imatiksag suramsatnaitrume.

26 Atumka shir yua pujakrum

wii atumi Yuusri asamtai

emematritnaittrume.

Atumin wainchatai ashammain ainan

nukap iwaintukuitjarme.

Turamu asarum wii etegkamu ainatirmeka

inatsamka achatin ainarme.

27 Wii atumin Yuusri asan, atumjai pujamu nekarattarme.

Tura chikich wijai metekka atsa nu nekattarme.

Tura inatsamka achatin ainarme.

28 Nugka mesertin tsawan jeattak jai,

wina wakantrun ashi nugkanmaya ainan akuptukartinaitjai.

Turamu asar atumin uchiri,

tura atumin nawantri ainasha wina pachittsar etseriartinaiti.

Natsa ainanka paantak iwaintakun,

antsu uuntach ainanka karanam iwaintuktinaitjai.

29 Nuiyasha inatai aishmag ainan,

inatai nuwa ainan wina pachitas etserkarti tusan

wina wakantrun akuptukartinaitjai.

30 Nayaimpinmayan ashammain ainan iwainaktinaitjai.

Tura nugkanmasha maaniaku numpa ukamu,

yaakat aestuniamu ji senchi mukuintamujai atinaiti.

31 Etsagka etsantrashtinaiti, nantusha numpa kapantua iman jastinaiti. Nuka Yuus tumati tusa takai tsawan ashammain atina nu eke jeatsaig tumatnaiti.^*

32 Turasha Yuus,

nina emematujaku ainanka ni uwemtikatnaiti.

Yuus, ni etegkamuri aina

tura chikich shuar tsekeararu ainajaimak nain Siónnum,

yaakat Jerusalén a nui, tuke pujusartin ainawai.

Nitaka waittanka jukichartin ainawai.