Moisés Josuén israelita ainan apuri atii tusa anaikamu
31
Moisés ni shuar ainan ataksha chicharuk: 2 “Wika yamaika ciento veinte uwí ejéjai, tuma asan jeashtaka wekamain nekapeatsjai. Nuiyasha Yuus winaka chichartak entsa Jordán amainka katigchatnaitme”, tusa turutnaiti. 3 Turasha Yuus atumnaka uyuntamsattarme. Tuma asa atumi shuari ainanka ni nepetak ijinattawai. Turamtai atum nita nugke aina atumnau amajsarum pujustatrume. Yuus tumata tusa tina tumasag Josuéka apu asa, ni weak atumnaka juramkittarme. 4 Atumi shuari aina nunaka, amorreo ainan apuri Sihónkan tura Ogkan nu ainan ashi nui shuar pujuinanka nepetak ijinawa turusag nitancha ijinattawai. 5 Atumi shuari ainan nepetkarti tusa Yuus timatai nepetkurmeka, atumin wii tinaitjarum turusrumek nu metek umiktin ataarma. 6 Ichichmamratarma, tura ashamkartukairpa, nuiyasha pimpikirpa, atumi shuari ainajai maaniakrumsha nitaka ashamkairpa, Yuus inaitamtsuk atumjaigka tuke pujutnaiti, tusa Moisés ni shuar ainan tinaiti.*7 Nuna tusa inaiyak Moisés Josuén untsuk, ni shuar aina ashi wainmaunam juki awajas chicharuk: “Ichichmamrata, tura sapijmakaipa, Yuus ina uuntri Abrahaman, Isaacan, Jacobon nugkan nekas susatnaitjarme tusa anajmatawa nu, ame ii shuar aina nugka susartinaitme”. 8 Yuus amijai pujuttawai, tura nigki aminka yainmaktinaiti. Ni aminka inaitamtsuk amijaig tuke pujutnaiti, tuma asamtai ashamkartakum pimpikipa, tusa Moisés Josuén tinaiti.
Chicham umiktin aina ashi antamunam aujsatin ainarme timau
9 Chicham umiktin ainan Moisés aar umik, chicham umikmau aina egketain sacerdote Leví weantu aina arcan yanaki ju ainan, tura apu ainan atum kuitamatarma tusa nitan susauwaiti. 10 Nuiyasha nitan chicharuk: “Siete uwí jeakai yuwimkartukmau aina chikichik uwítin asakatai tutai awai: Nu uwítin iruuntramunam aak aakmarmau ajakua nuna jiistamainak antukarti tusarum chicham umiktin aina nu ashi antamunam aujsatin ainarme”. 11 Ashi atum ainatiram Yuus, ni atumjai igkuniaktinan nugkan etegkatna nui ememattasa iruuntai jeanam iruuntramtai, ashi nita antamunam chicham umiktin aina aarmauwa ju aujsatin ainarme. 12 Aishmag aina, nuwa aina, uchi aina, tura chikich nugkanmaya shuar aina atumjai pujuinajaimak ashi iruuntratnaitrume. Tumarum chicham umiktin aina nuna antukar unuimarar Yuusan eme anentas iiyainak nitasha metek umikarti tusarum chicham umiktin aarmauwa nu nita antuinamunam aujsatnaitrume. 13 Nu turakrumin chicham umiktin aina nuna atumi uchiri nekachu ainasha antuk nekawar, entsa Jordán amain nugkan juki pujuinaksha ina Yuusrin, eme anentas iiyainak tuke umirin arti tusa Moisés ni shuar ainan tinaiti.
Yuus Moisésan inagnamun chicharkamu
14 Nuna tusa timatai, Yuus Moisésan chicharuk: “Ame jakatnuka tsawan ashi jeawai. Tuma asamtai Josué jukim wina emematrittsa iruuntai jaanchjai jeamkamua nui nijai taata. Tumawakrumin atum takastinan pachisan titajrume”, tusa tinaiti.
Tusa tama Moisés Josuéjai, Yuus ememattasa iruuntai jaanchjai jeamkamu amaunam wearuiti. Tuma nui jeawar nakasaruiti. 15 Tumainai Yuus yuragminam pachitkau ni emematku iruuntai jaanchjai jeamkamu waitirin taawaiti. 16 Tuma Yuus Moisésan chicharuk:
“Ameka wári jakattame, tumam amina untrum ajakarua nujai iruuntrattame. Ame tumawakminka, israelita ainaka nita nugkan jukiartata nui jeawar nuiya shuar yuusrimtairi ainan emematiartatui. Tumainak winaka inaitusartatui, tura wii nitajai chichaman umikuitaj nunasha umikchartatui”. 17 Nuna tumainakai nitanka kajerkan kuitamtsuk inaisartinaitjai. Waittan akuptuktinaitjai, senchi waitainak: “Ii senchi waitainaj juka Yuus ima inak inaitamsau asamtai imajnikrika waitainaji”, tusar tiartinaiti. 18 Tura nita tumainakaisha tunau shir pegkerchaun takainak chikich shuar yuusrimtairi ainan eme anentas iiyainak emematiaru asarmatai, waittsarti tusan wika nitanka pegkesha pachitsuk inaisartinaitjai, tusa tinaiti.
19 Nuna tusa Moisésan chicharuk: “Kantamtain wii takai yamai aarta. Turam amina pataim aina jintintawarta, nitasha nuna unuimarar kantamawarti. Tumainak ju kantamtainam wii chicharkun: Atum ju kantamiatkurum umiachkurminka, shir pegkerchau takasu asarum waittsatnaitrume tusan tinaitaj nuna, kantamtaiya ju nekamtikawartinaiti”. 20 Wii nita uuntri ajakarua nuna, nugka pegkeran, árak aramsha shir tsapainiar neren ainan, tura tagku ainasha nukap pampain aina susatnaitjarme, tusan tinaitaj nui yaruakan ejeawartatjai. Turawaram nui pujusar shir yuina asar nuwekartinaiti, tumainak atsumtsuk pujuinak chikich shuar yuusrimtairi ainan eme anentas iiyaina asar emematainak, wii nitajai chichaman umikuitaj nunaka umitsuk inaisartin ainawai. 21 Tumawar pujusar senchi waitainakai, ju kantamtainum chichaak: Atum shir pegkerchau takasmaunam waittsatnaitrume tusa timauwa nuna nekawartinaiti. Nita weantu ainasha ju kantamtaiya juna kajinmattsuk kantamtin ainawai. Wii nugkan susartasan anajmatawaruitaj nui, eke jeatsuk imanai jeawar pujusar nita tunau takastintri ainan emtika enentaimtuina nuna wika shir nekarainajai, tusa tinaiti.
22 Tusa timatai kantamtain nu tsawanta nuik, Moisés aaruiti. Tura nina patai ainan kantamtan unuimararti, tusa Moisés jintintawaiti.
23 Nun ajakua nuna uchirin Josuén Yuus chicharuk:
“Ichichmamrata, tura sapijmakaipa wii atumin nugkan susattsan anajmatawaitjarme nui amina pataim aina ejétnumka ametme. Tura wika amijai tuke pujuttajai”, tusa tinaiti.
24 Chicham umiktin aina aatainam Moisés ashi aar umikuiti. 25 Tura Yuus israelita ainajai chicham umikmau egketain sacerdote Leví weantu ainan arcan yanaki ju ainan Moisés chicharuk: 26 Chicham umiktin aarmauwa ju atum chicham umitsuk shir pegkerchau takámun nekamtikramatin jukirum Yuus atumjai chichaman umikmau egketai arca puja nui ayantsarum apujsatarma. 27 Atum chicham umichu, tura enentaimkachu ainarum nuna wika shir nekajrume. Wii eke iwáku atumjai pujakaisha Yuuska umirtsurme, tuma asarum wii jakamtaiyawa pegkesha Yuuska umirkashtatrume. 28 Chiki chikichik tribun uuntri aina tura apuri aina nu jui ikankatarma. Turakrumin wii tajarme nu metek uminkatta nunaka nayaimpin nugkajai shuara numamtuk antuinai, nuik tija nuna pachisan nitajai chichastajai. 29 Atumka wii jakamtaigka, chicham umiktin ataarma tusan tajarme nuka, umikchatin ainarme. Tumakrum shir pegkerchau taká asarum, senchi waittsatnaitrum nuna wika shir nekajai. Tura nuiyasha pegkerchau takákrum, Yuus akajkatnaitrum nunasha nekajai, tusa Moisés tinaiti.
Kantamatnun pachis Moisés timau
30 Ni shuar aina ashi iruuntramtai, unuimararti tusa kantamtain pachis Moisés jintintuk: