Tunaurun tsagkurtur Yuus pegkernum yainkati tusarsha urukmainkit nu pachisa timau
30
Moisés ni shuar ainan chicharuk: Yuus chicham umiktarma tusa tina nu metek umirmaka, pegkernum yainmaktinaitrume tusan tinaitjarme. Antsu chicham umiktina nu metek umiachkurminka pegkernumka yainmatsuk shir senchi waittan suramsatnaitrume tusan tinaitjarme, tusan wii jimaran pachisan tinaitjarum nuka metek uminturmaktinaitrume. Atum, atumi patai ainajai chicham umiktin nekayatkurmek umikchatjai tusa takurmeka chikich nugkanam yaruakmau atinaitrume, tusa Yuus turamnaitrume. Turutmamtai nui pujakrumsha wii tajarum nu aneartin ataarma. 2 Tumarum atum ainatiram, tura atumi uchiri ainajaimak tunau takat aina inaiyakrum wii yamai tajarum nu senchi wakerusrum, tura ima Yuusak enentaimtusrum umirkattsarum wakerakrumka umirkatarma. 3 Nu tumakrumin Yuus atumin wait anentramar atum waitamun inaimamtikramsatnaitrume. Tura atum yaunchuk pujarmin jiirmarua nu nugkanmag ataksha awagtamki apujtamsatnaitrume. 4 Atum chikich nugka ainanam jeashat pujautirmincha, Yuus ataksha atum pujujakmaunmag awagtamki irutmartinaitrume. 5 Tura yarurmak atumi uuntri aina pujujakmaunmag ataksha awagtamki ikatmakmatai, atumi nugkenig pujustinaitrume. Tumarum Yuus yainmasmatai atumin uuntri uchirtin ajakarua nu inagkasrum shir nukap uchi aina akigtinaitrume.6 Ina Yuusri, atumin tura atumi uchiri artina nujaimak tunau takatan inaimamtikramsatnaitrume. Nuna turutmamtaigka atum tura atumi uchiri ainajaimak ina Yuusri, ima nigki enentaimtusrum umirkatarma. Nu tumakrumka nukap uwí pujustin ainarme. 7 Atumi shuari aina atumin kajertamaina asar, pataturmakaru aina nunaka, Yuus waittan susartinaiti. 8 Yuus turamtai, chicham umiktarma tusa ni turammaun wii yamai ujajrum nu, atak nagkamarum metek umiktinaitrume. 9 Nu tumakrumin atum takamunam pegkernum yainmaktinaitrume. Tura nukap uchirmakarti, vacari ainasha nukap uchirmakarti, arake ainasha tumasag pegker nerekarti, tusa Yuus pegkernum yainmaktinaitrume. Yaunchuk atumi uuntri ainan shir enentaimtu jakua turusag, atumnasha Yuus shir enentaimturmastinaitrume. 10 Atum tunau takat aina inaiyakrumka Yuusa chichame umiktin aina ju aarmaun wii yamai tajarum nu, senchi wakerusrum, tura Yuusa nuke enentaimtusrum umirkatin ataarma.
11 Chicham umiktinan wii yamai atumin amajrum nunaka shir iturchatnaka, tura atum nekachminunka amatsjarme. 12 Chicham umiktin aarmauwa nuka nayaimpinmagka atsui, antsu nayaimpinam akai chichakrum: Nayaimpinam waka chicham umiktinan juki itaa ju umiktarma, tusa ina ujatmamainka atsawai tusarum tumain ainarme. 13 Nuiyasha nayants amain katigka atsui, antsu nayants amain akai chichakrum: Nayants amain katig chicham umiktinan juki itaa ju umiktarma tusa ujatmamainka atsawai tusarum tumain ainarme. 14 Turasha chicham umiktin aina juka yupichu ainawai. Tura atumka chicham umiktin aina nuka shir nekarme. Tura nu pachisrumsha atumka tuke chicharme. Tura atumka nuka kajinmattsuk tuke aneakuk chicham umiktinka nekau asarum ashi umimainaitrume.*
15 Junasha tajarme: “Iwáku pujustasrumek wakerarum, atsa jinattsarmek wakerarum tura waittsuk pujustasrumek wakerarum, atsa waittsatsarmek wakerarum nu yamai etegkatarma. 16 Wii yamai Yuus anetarma tusan tajarme. Tumakrum chicham umiktarma tusa ni turamna nu metek umirkatarma. Nu tumakrumnaka Yuus pegkernum yainmaktinaitrume. Turutma asamtai atum nugka jukittarme nui pujakrumsha, nukap uwí pujutnaitrume, tura shir nukap pampagtinaitrume.
17 Turasha nu metek umitsuk chikich yuus aina eme anentsa iiyakrum tikishmatra emematkurmeka, 18 jinatin ainarme tusan ujajrume. Atum entsa Jordán amain katigkrum nugka jukittarme nuigka nukap uwíka pujuschatin ainarme. 19 Wii atum ainatirmin iwáku pujustasrumek wakerarum, atsa jinattsarmek wakerarum, tura waittsuk pujustasrumek wakerarum, atsa waittsatsarmek wakerarum nu etegkatarma, tusan tajarme nu metek uminkatta nunaka nayaimpin nugkajai shuara numamtuk anaisan antuinai tajai. Antsu atumsha, tura atumi uchiri ainajaisha iwáku pujustasan wakerajai tusarum titarma. 20 Yuus anetarma. Nigki umirkatarma. Eme anentsa iiyakrum ima nijaig irutkau pujustarma. Niyaiti pujuta sukartinka tumau asa ina uuntri Abrahaman, Isaacan tura Jacobon nu ainan nugkan nekas susatnaitjarme tusa anajmatawa nui pujakrumsha nukap uwí pujustin ainarme”, tusa Moisés ni shuar ainan tinaiti.