YUUS JOSUÉN ISRAELITA AINAN CHICHARKATI TUSA ETEGKAMU
Yuus Josuén israelita ainan apuri atá tusa etegkamu
1
Yuus nina inatairi Moisés ajakua nu jakau asamtai, shuar Nun ajakua nuna uchirin Josuén Moisésan yayájakua nuna Yuus chicharuk: 2 “Wina umirtin Moisés jakauwaiti. Tuma asamtai, yamaika ame Israel shuar ainan nugkan susartajai tusan anajmatawaitaj nui, yaruakam Jordán entsa amain ikatiarta. 3 Atum pujustinan nugkan Moisésan anajmatawaitaj turusnak susattajrume. 4 Aya nugkanmag, Líbanonam nagkama entsa Éufrates tutaiya imanai, tura hitita ainan nugken nagkama nayants Mediterráneo imanai nagkamsan nugka ainanka amastatjarme. 5 Moisésjai pujuyaj tumasnak amijaisha tuke pujuttajai. Amina shuarum ainaka pegkesha nepettamkachartin ainawai. 6 Ichichmamrata, tura sapijmakaipa, wii atumin uuntri ajakarua nuna nugkan anajmatawaru ainaj nu, nugka ame nita susartinaitme. 7-8 Turatin asam ashamkartukaipa. Chicham umiktinan Moisésan susauwaitaj nu metek umiakum, amee shuar aina tuke tsawantin ujata. Tumakmeka ame takámu ainasha ashi pegkerak atinaiti. 9 Wii aminka tajame ichichmamrata, tura ashamkartukaipa, nuiyasha pimpikipa, wii amina Yuusrum asan ame tuig wekaitam, imanaisha amijaigka tuke pujuttajai”, tusa tinaiti.10 Josué apu ainan chicharuk: 11 Shuar aina nita jeen jearum chicharkurum: Yutai aina ashi iwarkatarma. Tres tsawanta jui entsa Jordán katitkattaji. Ina Yuusri, nugkan ii matsamsatnun amastajrume tusa turamaj nui weartatji, tusarum titarma tinaiti. 12 Nuiyasha Josué Rubén weantu ainan, Gad weantu ainan, tura Manasés weantu ainancha chicharuk: 13 “Yuus, nina inatairi Moisésan chicharuk: Ina Yuusri, atum pujusa inamratnun nugkan amastajrume tina nu enentaimsarum iistarma. 14 Tuma asamtai atumin nuwe aina, atumin uchiri aina, tura atumin tagkuri ainasha, Moisés atumin nugkan Jordán entsanam ju yantamnumian amasuitrum juig ikuktarrna. Turasha atum aishmagtiram maanimain ainatirmeka atumin yachi aina maniamunam yaigtin asarum shir umintsarum wetaarma. 15 Yuus atum matsamsatnun nugkan amasarua numamtuk nitasha Yuus nugka susaram shir nugkena pujusarmatai, Moisés Yuusa inatairi, atumin Jordán yantamnum nugkan amasarua nui waketrarum tuke nugkenarum pujustatrume”, tusa tinaiti.
16 Tutai nita, Josuén chicharainak: Ame wetá tusam tukartam nuigka wetatji. 17 Ii yaunchuk Moisés umirin ayaj turusrik amesha umiram atatme. Moisésan yai jakua turusag amincha Yuus, yainmakti taji. 18 Yáki ame tamasha chichamrumin umikchat nuka aya mantamnati. Ichichmamra pujakum nepetmakta tusar taji, tusa tiaru ainawai.