Árak yama nagkamchaku jukmaunmaya Yuus sumain pachisa timau
26
“Yuus nugkan suramsattsa anajmatramawa nui jearum atumnau amajsarum pujakrumka, 2 árak ajanam arakmau aina nuiya yama nagkamchakrum juktatrum nuka akankarum chikichik chagkinnum jukirum Yuus atumjai igkuniaktinan nugkan etegkatna nui ejétin ataarma”. 3 Turarum nu tsawantin sacerdote aina takainak matsatmaunam jeari chicharkurum: “Yuusa emtin tajai, ina uuntri ainan Yuus nugkan anajmatawa nui yamaika wika jeaan pujajai”, tusarum titinaitrume. 4 Tura árak aina juka chagkinum itamu aina sacerdote susatnaitrume. Turam ni sacerdote nuna juki Yuusa emtin tagku aina maa patasa epetai amaunam nui ayanas apujsatnaiti.5 Nuna turamtai Yuusa emtin chichakrum: Wina uuntur arameo shuar ajakarua nuka nukapchau, nuiyasha nugkenchau aya yujajaku ainawai. Egipto nugkanam shiakar nui pujusaru ainawai, nui pujusar shir nukap pampagkar pegkesha nepetmainchau senchirtin jasaruiti. 6 Turasha egiptonmaya aina aantar inatmainak, shir senchi waitkarmasu ainaji. 7 Imatikramainakai Yuus ina uuntri umiru jakmauwa nu ina yainmakti tusar aujsamiaji, turamu asa ii timaun anturtamkauwaitji. Tuma atsumaku senchi waitamun ii umimainchau inatmainakai senchi takámun, tura waitamun Yuus wainkauwaiti. 8 Tuma asa Yuus nina senchirijai wainchatai ashammain ainan iwainar, Egipto nugkanam pujarin jiirmaruitji. 9 Tura juramki ju nugkanam itarmawaitji. Imajai itarma nugka shir pegker asamtai árak aina shir tsapak neren ainan suramsauwaitji. 10 Tura asamtai Yuus nugka surusmaunam yama nagkamchak árak ara jukmaurum yamai jui itajai, tusarum titinaitrume.
“Nu tusa takurum araka jigkai chagkinnum itamu jukirum Yuus emematku tagku aina maa patasa epetai amaunam ejérum apujsatnaitrume. Nu turarum Yuus emematkurum nina emtin tikishmartinaitrume. 11 Nu turarum umikrum Yuus amina, tura pataim ainajaimak pegker ainan suramsau asamtai, maake takurum shir aneakrum jiistamatarma. Nuiyasha Leví weantu aina, tura chikich nugkanmaya shuar aina atumjai pujuinaka, atumjai metek shir aneasarti, tusa Moisés ni shuar ainan tinaiti.
Ame takasa jukimunmaya aina dieznumia Yuusnau atii tusam chikichik akankata tusa timau
12 Tres uwí jeamu nukapek dieznumia chikichik akankata tusa timauwa nuka, ashi ame árak aina arakmamua nuiya juukam akantram umikam Leví weantu aina, chikich nugkanmaya shuar aina, uchi mitaik aina, tura nuwa waje aina, atumin yaaktarin atumjai pujuina nu nita wakeramun yuawarti tusarum susatarma. 13 Nu turam umikam Yuus chicharkum: Ame turatarma tusam tinaitam nuna kajinmattsuk metek umiakun, wii árak aramu ainanmayan jukan aminu atinan dieznumian chikichkinak akankan umikan, Leví weantu aina, chikich nugkanmaya shuar aina ijai pujuina nuna, uchi mitaik aina, tura nuwa waje aina nuna susarjai. 14 Yuusru, ame umiktarma tusam tinaitam nuna metek umiakun, dieznumia aminu atii tusan chikichik akankamu aina nuiyanka útkun wake mesemar pujaknasha, tura pegkerchau jasan pujaknasha pegkesha achikchamjai. Tura shuar jakau aina nunau atii tusancha anajmatachmajai. 15 Nayaimpinam amina pujutairam pegkera nui pujusmek iikrattsata. Tumam ina uuntri aina anajmatawaitam turusmek, Israel shuar ainatin nugka pegker asamtai, árak aina pegker tsapau aina asamtai pegkernum chicharkartukta”, tusarum titin ataarma.
Israelita ainanka winau arti tusan etegkawaitjai tusa Yuus timau
16 Moisés ni shuar ainan chicharuk: Ina Yuusri, chicham umiktin ainan umiktarma tusa yamai turamrum nuka, senchi wakerusrum, tura ima nuke enentaimtusrum umiktarma. 17 Yuuska nekas wina Yuusruiti wii umirnaitaj nu, tuma asamtai chicham umiktarma tusa ni turamnaitaj nunaka metek umiktatjai tusam yamai tinu asam, chicham umiktin ataarma tusa ni turamnaitrum nuka metek umiktin atá. 18 Yuus ina chichartamuk atumka winau ainarme, tusa yamai turamji. Ika ninu asar chicham umiktarma tusa ni turamnaitaj nuka metek umirkarmi. 19 Nu turamka chikich shuar aina nuna nagkasau senchirtin, tura araantusa iitai amajtamsatnaitji. Yuus ima winak umirtukarti tusa ni etegkamu ainaji.